როგორც კონცერტის ორგანიზატორები ამბობენ, ეს არის უპრეცედენტო შემთხვევა აბაშის ისტორიაში, როცა სამთავრობო და არასამთავრობო სტრუქტურები გაერთიანდნენ, როცა წაიშალა ზღვარი პოლიტიკური შეხედულებისა და ყველა, ერი თუ ბერი ერთად დადგა 21 წლის თორნიკე ქარცივაძის სიცოცხლის გადასარჩენად.
“გურია ნიუსს” კონცერტის ორგანიზატორები დაუკავშირდნენ.
მარიამ ჩიქოვანი, იურისტი: “ჩვენ გავერთიანდით ჩვენი მეგობრის, თორნიკეს სიცოცხლის გადასარჩენად. ქველმოქმედება უდიდესი ნიჭია და, სამწუხაროდ, ყველა ადამიანს არ შეუძლია უანგაროდ გააკეთოს სიკეთე. თავად ის ფაქტი, რომ ჩვენ გვიხდება ახალგაზრდის სიცოცხლის გადასარჩენად თანხის შეგროვება, ძალიან მძიმეა, მაგრამ ძალიან მიხარია, რომ მთელი აბაშა გაერთიანდა. ეს იყო პირველი შემთხვევა, როცა ახალგაზრდებმა შესაწირი ყუთით აბაშის მაღაზიები დაიარეს. სიმართლე გითხრათ არ ველოდით, რომ ვინმე რამეს ჩააგდებდა ყუთში, მაგრამ, ჩვენდა სასიხარულოდ, შევცდით. მიხარია, რომ ხალხის ცნობიერება იცვლება და სიკეთის კეთების სურვილი ბევრს აქვს.”
თაზო ბენიძე, ჟურნალისტი: “თორნიკე ყოველთვის პირველი იდგა სხვების დასახმარებლად აბაშაშიც და თბილისშიც. სწორედ ამიტომ, როგორც მის მშობლიურ ქალაქში, ასევე თბილისშიც სხვადასხვა ინსტიტუტის სტუდენტებმა გამოთქვეს დახმარების სურვილი. 13 აპრილის კონცერტის მერე, უკვე თბილისში დაიწყება საქველმოქმედო კონცერტები და საღამოები. ნამდვილად უპრეცედენტო შემთხვევაა _ მთელი აბაშა გაერთიანდა. ახლა საკრებულოს თავმჯდომარესთან ვიყავით და აბაშის მუნიციპალიტეტიც გვერდით დაუდგა თორნიკეს. ბევრი ისეთი ადამიანი გამოგვეხმაურა, არც კი ვიცნობთ _ სოციალურ ქსელში ნახეს ინფორმაცია და გამოთქვეს დახმარების სურვილი. ვიცი, რომ თქვენ ძალიან ბევრი მკითხველი გყავთ. თქვენი საშუალებით უფრო მეტი ადამიანი შეძლებს აქციის შესახებ ინფორმაციის მიღებას და მინდა გთხოვოთ რეკვიზიტების გამოქვეყნება.”
თამარ ჩიქოვანი, სტუდენტი, თორნიკეს მეგობარი: “პირველ რიგში, მინდა ყველას მადლობა გადავუხადო იმისთვის, რომ გვერდით დაგვიდგნენ თორნიკეს გადასარჩენად. აღსანიშნავია ისიც, რომ კონცერტში მონაწილეობის მიღება ჩვენ არავისთვის გვითხოვია _ როგორც კი ნახეს სოციალურ ქსელში გაკეთებული განცხადება, მომღერლებმა _ მალუ მამფორიამ და იაგო კუპრეიშვილმა თვითონ დაგვირეკეს და შემოგვთავაზეს საქველმოქმედო კონცერტში მონაწილეობა. მიხარია, რომ ჩვენს გვერდით დგანან ის ადამიანები, რომლებიც ესწრაფვიან უანგაროდ სხვების დახმარებას და კიდევ უფრო სასიხარულოა, რომ მათ მხარდამჭერები გამოუჩნდნენ. თორნიკემ კიდევ ერთხელ გააერთიანა ხალხი. მჯერა, რომ კონცერტის მსვლელობის დროს ბევრი ადამიანი დარეკავს და მართლა შევძლებთ ჩვენი წვლილი შევიტანოთ ახალგაზრდა ბიჭის გადარჩენაში.”
“გურია ნიუსი” გაწვდით სატელეფონო ნომერს, რომელზეც შეგიძლიათ დარეკოთ და საკუთარი წვლილი შეიტანოთ ქველმოქმედებაში:
თიბისი ბანკი: GE42TB762113608010001/GEL
მობილურიდან _ მაგთი, ჯეოსელი, ბილაინი: 0901500546 ზარის ღირებულება 1 ლარი
კონცერტზე დასწრების და ადგილზე ქველმოქმედების გაწევის მსურველებს კი კონცერტის მონაწილეები 13 აპრილს, 15 საათზე ეპატიჟებიან.
