რეალურად კი, მათი ხელფასები ბევრად დაბალი იყო, ვიდრე საარსებო მინიმუმი. თუმცა, არც სოციალური სააგენტო ტყუოდა, ოფიციალურად მათ სახელზე მართლაც იყო გამოწერილი ათჯერ მეტი ოდენობის სახელფასო სარგო, ვიდრე იღებდნენ.
ასე მოხდა “ალდაგის“ შვილობილი კომპანიის “ჩემი ოჯახის კლინიკის“ შემთხვევაშიც. მათ მიერ გაწერილ არარეალურ ხელფასებს სოციალურად დაუცველი მედდების დახმარება შეეწირა. არარეალურად მაღალი ხელფასების დაფიქსირების გამო მათ სოციალური მომსახურების სააგენტომ დახმარება შეუწყვიტა.
მარტო ქობულეთში, ამ ფაქტის გამო, სოციალური დახმარება 5 სამედიცინო მუშაკს შეუწყდა.
მედდები გული ანანიძე და ფატი კაიკაციშვილი ამ ინფორმაციას “გურია ნიუსთან“ ადასტურებენ და დახმარებას ითხოვენ.
“მე რომ დახმარებას შემიწყვიტავს ადამიანი, იმას ნამუსი თუ მოეთხოვება საერთოდ? მე ვარ ბინადაკარგული ქალი. 6 სული ვართ სახლში და ავადმყოფი დედა მყავს, ქალი ჯოხით დადის, თუ არ გჯერათ, მოდით და თქვენ თვითონ ნახეთ, რანაირად ვცხოვრობ. ვისაც უნდა მივიდეს და ნახოს ჩვენი მდგომარეობა”, _ აცხადებს “გურია ნიუსთან” ფატი კაიკაციშვილი, რომელსაც 102 ლარის ნაცვლად 400-იდან 1000 ლარამდე ჰქონდა დაფიქსირებული.
“სოციალური დახმარების მისაღებად რომ მივედი, მითხრეს, თქვენ ამოღებული ხართ სიიდან, იმიტომ რომ მაღალი ხელფასები გერიცხებათო. რომ მოვიკითხე და მითხრეს 400-500 ლარი გერიცხებათო, კინაღამ ინფარქტი მივიღე. სინამდვილეში, ხელზე 98 ლარს ვიღებ და მითხარით ერთი რა დავაშავე? ვიღაცამ შეცდომა დაუშვა თუ რა ქნა, მე რატომ უნდა ვიყო ამ დღეში?” _ აცხადებს გული ანანიძე.
თუმცა, აღნიშნული სადაზღვევო კომპანია გამონაკლისი არ არის. მსგავსი ფაქტების რაოდენობამ, როგორც სოციალური სააგენტოს უფროსი, ნოე ქინქლაძე “გურია ნიუსთან” აცხადებს, 30-ს გადააჭარბა.
“ეს არის პროკურატურის და ფინანსური პოლიციის გამოსაძიებელი საქმე. ჩვენ ნამდვილად შევუწყვიტეთ დახმარება, რადგან მათ ანგარიშზე საკმაოდ დიდი თანხა იყო. ალბათ დამეთანხმებით, იმ თანხის მიმღები სოციალური დახმარების მიმღები არ უნდა იყოს.
ასეთი 30-ზე მეტი შემთხვევა გვაქვს დაფიქსირებული, სადაც ადამიანები ამბობენ, რომ მათ ანგარიშზე ერიცხებათ ფული, მაგრამ ეს ფული არ აუღიათ და საქმეში გარკვევას გვთხოვენ. ჩვენ ეს მასალები ფინანსურ პოლიციას გადავეცით.” _ აცხადებს სააგენტოს უფროსი.
საქართველოს შრომის, ჯანმრთელობისა და სოციალური დაცვის სამინისტროს ინფორმაციით, თებერვალში, შემოსავლების სამსახურიდან მოპოვებული ინფორმაციის საფუძველზე სოციალური დახმარება შეუწყდა და შეუჩერდა 17 781 ოჯახს.
ნოე ქინქლაძე: “შეწყვეტილი დახმარების აღდგენის მოთხოვნით სააგენტოს მომართა 8 373-მა ოჯახმა. 2013 წლის 1 აპრილის მდგომარეობით, შეწყვეტილი დახმარება აღუდგება 2 721 ოჯახს, ხოლო შეჩერებული დახმარება – 905 ოჯახს. რაც, საერთო რაოდენობის 20,4%-ს შეადგენს. სააგენტო აგრძელებს რეაგირებას როგორ ზემოთ აღნიშნული შემთხვევების შედეგად შემოსულ განცხადებებზე, ასევე მოქალაქეთა ნებისმიერ განცხადებაზე, რომელიც კანონმდებლობით დადგენილი წესით მისაღებ დახმარებებს ეხება“.
ამასთან დაკავშირებით, საქართველოს შრომის, ჯანმრთელობისა და სოციალური დაცვის სამინისტრომ განცხადებაც გაავრცელა: ” მივმართავთ იმ მოქალაქეებს, რომლებიც თვლიან, რომ მათ უსაფუძვლოდ შეუჩერდათ სოციალური დახმარება დახმარება, შემოიტანონ განცხადება სოციალური მომსახურების სააგენტოში და წარმოადგინონ მათი შემოსავლების დამადასტურებელი საბუთები, _ აღნიშნულია გავრცელებულ განცხადებაში.
“გურია ნიუსისთვის” მიცემულ ვრცელ ინტერვიუში შრომის, ჯანმრთელობისა და სოციალური დაცვის მინისტრი დავით სერგეენკო ვრცლად საუბრობს სოციალური უზრუნველყოფის სააგენტოსა და მის ფუნქციებზე, რომელიც წლების განმავლობაში არამიზნობრივად იყო მიმართული და კონკრეტული პოლიტიკური ჯგუფის ინტერესებს ემსახურებოდა.
“ის კანონზომიერება, რომ სოციალური დახმარება რიგ შემთხვევებში გარკვეულ ინსტრუმენტად გამოიყენებოდა, ეს გამოკვეთილია ძალიან მარტივი არითმეტიკული ანალიზით. დიახ, ვადასტურებ, რომ ხშირ შემთხვევაში, ეს ინსტრუმენტები გამოიყენებოდა პოლიტიკური მიზნებისთვის. ძალიან კარგ კორელაციაშია დახმარების მიმღებების რაოდენობა გარკვეულ პოლიტიკურ პროცესებთან, ძირითადად არჩევნებთან. ეს იმდენად ცხადია, რომ ზედმეტ კვლევას აღარ საჭიროებს. დიახ, ვადასტურებ, რომ ხშირ შემთხვევაში ეს ინსტრუმენტი გამოიყენებოდა პოლიტიკური მიზნებისთვის.
დაგეგმილი გვაქვს ამ მიმართულებით ძირეული მეთოდოლოგიური რეორგანიზაცია, რათა ერთი პატარა ხვრელიც კი არ დარჩეს თავისუფალი და სუბიექტური გადაწყვეტილებებისთვის. ყველა დეტალს ვერ გავაჟღერებ, მაგრამ დამერწმუნეთ, რომ ძალიან კონკრეტული მუშაობა მიდის ამაზე და ამ ყველაფერს მალე დაინახავთ. უსამართლობის და სუბიექტური გადაწყვეტილებებს ინსტრუმენტები გაქრება“. _ აცხადებს დავით სერგეენკო.
