ქალაქ ოზურგეთში, ჭავჭავაძის ქუჩის #19-ში, ბინას სახურავი ისევ აძვრა _ მობინადრეები დახმარებას ითხოვენ.
ძლიერი ქარის შემდეგ საცხოვრებელი ბინის სახურავი დაზიანდა, თუმცა, არც მანამდე იყო კარგ მდგომარეობაში. სახურავიდან გადაყრილ თუნუქს მცხოვრებლები ქუჩაში ეძებდნენ.
_ თუნუქები ვიპოვე და სახლში შევინახე. შიფერს რა გადაარჩენდა? დაიმსხვრა, ამ ძლიერი ქარის შემდეგ ჩვენი ბინის სახურავი მთლად გამოვიდა მწყობრიდან და თავზე გვაწვიმს. ადგილობრივმა ხელისუფლებამ, ალბათ, ხალხის თვალის ასახვევად გააკეთა ეს სახურავი, რადგან უხარისხოდ გადახურულია და კედლებიდან თუ ჭერიდან წყალი მოჟონავს. ყურადღება გვჭირდება და საქმის მცოდნე ადამიანები, რომ ნორმალურად გადაგვიხურონ ბინა, თორემ ჩვენი ოთახები არაფრად ივარგებს, ვერც კოსმეტიკურ რემონტს გავაკეთებთ და არც ცხოვრება არ შეიძლება ასეთ პირობებში. წინასაარჩევნოდ მოვიდნენ, ხმების შეგროვება გვთხოვეს, მიიღეს კიდეც, მაგრამ ჩვენ უხარისხოდ გაკეთებული სახურავი შეგვრჩა. ახლა იძულებული ვართ, ისევ ადგილობრივ ხელისუფლებას მივმართოთ _ მათი გაფუჭებული საქმე თვითონ გამოასწორონ, _ გვითხრა ჭავჭავაძის ქუჩის #19-ში მცხოვრებმა მოქალაქემ.
_ ჩვენი ბინის სახურავი წინასაარჩევნოდ, ზუსტად საპარლამენტო არჩევნების ჩატარებამდე ერთი კვირით ადრე გადახურეს. სახურავი მთლიანად ამორტიზირებული იყო, შიფერი საერთოდ დაიმტვრა და თუნუქით მხოლოდ ნახევარი გადაიხურა. წვიმის დროს ქოლგებით ვსხედვართ სახლში. სახურავი იმდენად უხარისხოდ არის გაკეთებული, რომ ადვილად ძვრება და გადმოვარდნილი შიფერი თუ თუნუქი აზიანებს ჩვენი მეზობლად მდებარე რესტორან “ნატახტარის” სახურავს. ეს რესტორანი ესაზღვრება საცხოვრებელ ბინას და რესტორნის მეპატრონეც იძულებული გახდა სახურავი გამოეცვალა. გვინდა, რომ თქვენი გაზეთის საშუალებით ვთხოვოთ ადგილობრივ ხელისუფლებას, ხარისხიანად სახლი და გადმოყრილი თუნუქი და შიფერი ქუჩა-ქუჩა არ ვეძებოთ. თუმცა ამის შესახებ მათ იციან _ გამგეობაში დევს ჩვენი განცხადება. შეგვპირდნენ კიდეც, რომ ჯერ სახურავის ერთ ნაწილს გამოცვლიდნენ და შემდეგ _ მეორეს, მაგრამ არაფერი არ გამოუცვლიათ _ ძველი დარჩა ისევ ისე, ახალდახურულ თუნუქს კი ქარი აფრიალებს. ყურადღებას ვითხოვთ და დაპირებულის შესრულებას. ნეტავ, ისევ არჩევნებს უნდა დაველოდოთ? _ გვითხრა ერთ-ერთმა მობინადრემ, რომელსაც სხვებიც ეთანხმებოდნენ.
“გურია ნიუსი” ამ საკითხზე ოზურგეთის მუნიციპალიტეტის გამგებლის მოადგილეს მიხეილ გოგოტიშვილს ესაუბრა. გოგოტიშვილის თქმით, ის ინფორმაცია არ ფლობდა და მისთვის განცხადებით არ მიუმართავთ:
_ არ ვარ საქმის კურსში. ალბათ, ახალი ამბავია და მოგვმართავენ. რამდენადაც ვიცი, ამ სახლის სახურავი გადახურულია. ვერ გეტყვით ახლა რა მდგომარეობაშია, მაგრამ გპირდებით, პრობლემას შევისწავლით და ჭავჭავაძის ქუჩის მცხოვრებლებს დავეხმარებით, ჴ გვითხრა გოგოტიშვილმა.
