ცერემონიალს ამ საქმის ერთ-ერთი ინიციატორი და ლანჩხუთის გამგებლის, შესაბამისად ლანჩხუთის სახელისუფლო ლობი, ინფრასტრუქტურისა და რეგიონული განვითარების მინისტრი რამაზ ნიკოლაიშვილი დაესწრო.
მინისტრმა მოსვლა დააგვიანა _ ყოველ შემთხვევაში, მეეზოვეები 12 საათიდან შეკრიბეს და ნიკოლაიშვილი სადღაც 6-ისთვის მოვიდა. სანამ მეეზოვეები ცივ ამინდში ყურყუტებდნენ (ამაში თავად მინისტრი ყველაზე ნაკლებ დამნაშავე უნდა იყოს _ კარგი იქნებოდა, ადგილობრივ ჩინოსნებს მეეზოვეებისთვის სტუმრობის მიახლოებითი დრო ეცნობებინათ და მხოლოდ ისინი არ შეფარებოდნენ თბილ კაბინეტებს).
ჩვენ გავარკვიეთ, ავტომობილები სულაც არ ყოფილა ჩინური წარმოების, როგორც ხმები გავრცელდა _ ნაგავმზიდები ცნობილ “ფორდის” წარმოებისაა და თითოეული 250 ათასი ღირს. რაც შეეხება 250 ბუნკერს, ის ქალაქის მთელ ტერიტორიაზე განთავსდება.
ნიკოლაიშვილმა ავტომობილები მოიწონა, ვიზიტი ჟურნალისტებისადმი მის მიერ “აპრობირებული” მეთოდით დაიწყო და ასევე გააგრძელა _ თავიდან “შენიშვნა” მოგვცა, ფოტოს მე რას მიღებთ, შეხედეთ, რა მაგარი მანქანებიაო. გაუკვირდა კიდეც, ასეთი დიდი მანქანები ლანჩხუთს თუ სჭირდებოდა, არ მეგონაო. იქვე გურიის გუბერნატორს გაეხუმრ-“გაეღადავა” _ ვალერი, ოზურგეთისთვის ერთი მანქანა ხომ არ გათხოვონ? “ძაან მაგარი მანქანებია ნამდვილად. ლანჩხუთი მაგარი ქალაქია და იმსახურებს ყურადღებას!” _ აღნიშნა გურიის ექს-გუბერნატორმა.
ამის შემდეგ, მინისტრმა პრეზენტაციის ნაცვლად, ჩვენთან რეპლიკებით გასაუბრება გადაწყვიტა:
_ ჰა, რას მიყურებ, ხომ მაგარი მანქანებია? რა ხდება, რომ გაჩუმებულხარ, არ მეთანხმები, რომ ასეა? იქნებ, რამე წუნი ნახე? ხალხო, ჩართეთ ეს მანქანა, თორემ რაღაცას დაწერს. ვატყობ, რაღაც არ მოსწონს! _ მიმართა ორგანიზატორებს ნიკოლაიშვილმა და ისიც დაამატა, პირველი მანქანა გამგებელმა უნდა “გააკატავოსო”.
_ ამას გარდა, ჩემი აზრით, ძალიან მნიშვნელოვანია, რომ ხაჯალიაში გაკეთდება ახალი სკოლა, _ ისევ მოგვიბრუნდა ნიკოლაიშვილი.
_ დიახ, კარგია. იმედია, კიდევ გექნებათ პროექტები ლანჩხუთთან დაკავშირებით.
_ რა თქმა უნდა. კიდევ მკითხე რამე, თორემ ვიცი, მერე რაღაცებს დაწერ. ამიტომ, მირჩევნია კითხვები დამისვა, თორემ შენი ამბავი რომ ვიცი…
_ რაიმე არასწორი დავწერეთ?
_ ორ-სამჯერ კი მატკინე გული, მაგრამ ვიცი, ობიექტური ადამიანი ხარ. ამიტომაც გეკითხები. არ მოგწონს, რაც კეთდება?
ამის შემდეგ მინისტრმა გამგებელს უთხრა, რომ ლელოზე აუცილებლად ჩამოვა. გია გოგუაძემ უპასუხა, ლელობურთი სანახაობრივადაც გალამაზდება და იმ დღეს კონცერტზეც გეპატიჟებითო. ნიკოლაიშვილმა კი, რა კონცერტი, კაცო, რომელი მომღერალი მნახე, ლელოზე ჩამოვდივარო. ბოლოს მეეზოვეებთან სამახსოვრო ფოტოც გადაიღო და მრავალჯერ გაიმეორა: _ მე მიყვარს ლანჩხუთი!
სულ ბოლოს კი, ისევ მედიას მოუბრუნდა: _ გჯეროდეთ, რომ ლანჩხუთისთვის კიდევ ბევრ კარგ საქმეს გავაკეთებთო. წასვლის წინ კი “შეგვახსენა”: ლანჩხუთს კაი გამგებელი გყავთო. ვერ გეტყვით, ნიკოლაიშვილმა მის უკან მომავალი ჩიტაიშვილი დაინახა თუ ვერა, მაგრამ ისევ მოგვიბრუნდა, კაი კი არა, მაგარი გამგებელიო, ჟურნალისტებს თვალი ჩაგვიკრა, მასპინძელ ჩინოსნებს დაემშვიდობა და თბილისისკენ გაემართა.
მალე გუბერნატორიც წავიდა და დაგეგმილი “მნიშვნელოვანი სუფრა”, ალბათ, ადგილობრივი ჩინოსნების წრეში გაიმართებოდა.
