გარდა ამისა, გიორგი მარგველაშვილი აცხადებს, რომ სახელმძღვანელოების სიდიდე და მოცულობა არის დიდი: “მიდის სტამბებთან მოლაპარაკება, რომ მოხერხდეს წიგნების დაშლა უფრო მცირე ერთეულებად და შესაბამისად, ბავშვები არ იყვნენ განწირულნი სქოლიოზისთვის”.
ასევე დაგეგმილია წიგნებისა და სამუშაო რვეულების განცალკევებაც, რათა სახელმძღვანელოს შეძენა ყოველწლიურად არ გახდეს აუცილებელი.
“გურია ნიუსი” დაინტერესდა, რას ფიქრობენ თავად მოსწავლეები განვითარებულ მოვლენებთან დაკავშირებით და საქართველოს სხვადასხვა ქალაქების სკოლის მოსწავლეებს ესაუბრა.
მარი ბუღაძე, ჭიათურის #1 საჯარო სკოლა: _ ძალიან კარგი, მნიშვნელოვანი და დროული გადაწყვეტილებაა. ჩემი ოჯახისთვის დიდი შეღავათია, წიგნები რომ უფასო იქნება. ძალიან ბევრია ისეთი ბავშვი, რომელთა მშობლებს არ აქვთ იმის შესაძლებლობა, რომ ყველა წიგნი შეიძინონ. როდესაც წიგნს ვერ ყიდულობენ, გაკვეთილებს აქსეროქსებენ, რომ სკოლაში მოუმზადებლები არ მოვიდნენ. წიგნები რომ უფასოდ დარიგდება, ეს ყველას მისცემს შესაძლებლობას, უფრო კარგი განათლება მიიღონ.
_ როგორ ფიქრობ, უნდა შეიცვალის წიგნების ფორმატი და შედგენილობა?
_ ჩემი აზრით, უნდა შეიცვალოს, რადგან სასკოლო წიგნებში არის ძალიან მცირე ინფორმაცია, თანაც ზოგ შემთხვევაში გაუგებრად დაწერილი. გაკვეთილი უნდა ეწეროს ვრცლად და უფრო გასაგებად. წიგნები ძალიან დიდია, შესაბამისად მძიმეა ჩანთებიც, მაგრამ ჩემს გვერდით მერხზე მჯდომ კლასელთან ვარ მოლაპარაკებული და წიგნებს ვიყოფთ _ ნაწილი მას დააქვს, ნაწილი _ მე.
ეკა ჯარიაშვილი, თბილისი: _ ჩემს ოჯახში 3 მოსწავლე ვართ. ძალიან გაუხარდათ ჩემს მშობლებს, რომ სექტემბერში წიგნები საყიდელი არ ექნებათ. გუშინ ჩემი მეზობელი, რომლის შვილი კერძო სკოლაში სწავლობს, დედაჩემს ეუბნებოდა, შეიძლება, სექტემბრიდან ბავშვი საჯარო სკოლაში გადავიყვანო, რადგან წიგნები უფასო მხოლოდ სახელმწიფო სკოლებშიაო. რაც შეეხება წიგნების ფორმატს, ნამდვილად შესაცვლელია. გაკვეთილები ისეთ მცირე ინფორმაციებს გვაძლევს, იძულებულები ვართ სხვა წიგნები მოვიშველიოთ, თან მძიმეა და დიდიც, ჩანთაშიც კი არ ეტევა ზოგიერთი. არადა, რომ გადახედოთ, ზოგ ფურცელზე მხოლოდ ნახატები და სურათებია. კარგი იქნება, თუ ზომებიც დაპატარავდება და გაკვეთილებიც გასაგებად იქნება დაწერილი. შარშან, სასწავლო წელი რომ დაიწყო და წიგნების ავტორები და გამომცემლობები ჩაგვაწერინეს, მოგვეწონა, მაგრამ რას ვიტყოდით? ჩემი მეგობარი სხვა სკოლაში სწავლობს, ისიც მე-11 კლასშია და სხვა ავტორის წიგნით სწავლობს, რომელიც უფრო გასაგები ენითაა შედგენილი და ჩვენც გვინდოდა ამ წიგნით სწავლა, მაგრამ მასწავლებელმა გვითხრა, ჩვენმა სკოლამ ეს წიგნი აირჩიაო. ალბათ, ეს მიდგომაც უნდა შეიცვალოს და ყველამ ერთნაირი წიგნით ისწავლოს.
ლევან ჩიქოვანი, აბაშის მე-2 საჯარო სკოლის მოსწავლეთა “ახალგაზრდული ფრთის” პრეზიდენტი: _ მივესალმები განათლების სამინისტროს ახალ ინიციატივას, რომლის მიხედვითაც ახალი სასწავლო წლიდან წიგნები ყველა კლასში უფასოდ დარიგდება. ეს შეღავათია იმ ოჯახებისთვის, სადაც რამდენიმე მოსწავლეა და თან არც სოციალურად დაუცველის სტატუსი აქვთ. სკოლაში ბევრია ისეთი მოსწავლე, რომელსაც წიგნის კი არა, რვეულის საყიდელი ფულიც არ აქვს. ეს წამოწყება სწავლის სურვილსა და მოტივაციას გაუჩენს ბავშვს. ზოგიერთი საგნის წიგნში ბევრი რამ არის სასწავლო მასალიდან ამოღებული, რაც, ჩემი აზრით, აუცილებელია, ისწავლებოდეს. გასათვალისწინებელია ისიც, რომ ზოგიერთი წიგნი იმდენად დიდი და მძიმეა, რომ ზრდასრულ ადამიანსაც გაუჭირდება ყოველდღე მათი ტარება, არა თუ მე-5-მე-6 კლასელ ბავშვს. იმედია, განათლების მინისტრი ამ მნიშვნელოვან დეტალებსაც გაითვალისწინებს.
შეგახსენებთ, რომ 2013-2014 სასწავლო წლისთვის, მთელი საქართველოს მასშტაბით, 2084 საჯარო სკოლის 650 000 ათასი მოსწავლე სასკოლო სახელმძღვანელოებს უფასოდ მიიღებს.
