_ ეს მატჩი კიდევ დიდხანს დაამახსოვრდებათ ფეხბურთის ლანჩხუთელ გულშემატკივრებს. სამწუხაროდ, ეს იყო ნამდვილი შოკი, რაც “გურიის” ფანებმა მიიღეს “დინამო არენაზე” (სადაც მრავლად შეიკრიბნენ და სრულ უპირატესობას ფლობდნენ) და ინტერნეტში მატჩის ხილვისას (ვიდეო-რეპორტაჟს “დინამოს” საიტი აწარმოებდა).
მატჩი ლანჩხუთელებისთვის კოშმარულად დაიწყო _ უკვე მეორე წუთზე მსაჯმა ჯენერი ხორავამ მეტად საეჭვო სიტუაციაში “გურიას” კარში 11-მეტრიანი დანიშნა, პლუს არნო ჩუენსუ გააფრთხილა. პენალტი გიორგი მერებაშვილმა უნაკლოდ შეასრულა, ხოლო 5 წუთში მანვე ლანჩხუთელები უმძიმეს სიტუაციაში ჩააგდო, როცა რამდენიმე მცველს იოლად გასცდა და ანგარიში გაზარდა, 2:0.
ამას არ დაუბნევია სტუმრები და უკვე 12 წუთზე ბრწყინვალე კონტრშეტევა გიორგი სალარიძის პასის შემდეგ მიხეილ კაკალაძემ გოლად აქცია! მიუხედავად იმისა, რომ უპირატესობა “დინამოს” რჩებოდა, “გურიას” შანსი მიეცა. მეტად ნაყოფიერი და აქტიური იყო გოლის ავტორი. თუმცა, ტაიმი 2:1 დასრულდა. ამაში დიდი წვლილი გიორგი ძაძამიამ დაიდო _ მან არა ერთი რთული ბურთი მოიგერია.
თამაშის განახლების შემდეგ სრულ უპირატესობას “გურია” დაეუფლა _ ჩვენებურებმა ქვეყნის მთავარი გუნდი თანდათან საკუთარ საჯარიმოს მიაჯაჭვეს, ხოლო თავად “დინამო” რეალურ ხიფათს ვეღარ ქმნიდა. გურულთაგან განსაკუთრებით კობა შალამბერიძე, არნო ჩუენსუ, ალეკო შენგელია გამოირჩეოდნენ, საიმედოდ ირჯებოდა სევასტი თოდუა, ამწვავებდა გიორგი სალარიძეც…
ისიც აშკარა იყო, რომ თემურ ლორიას შეგირდები უკანმოუხედავად წინ არ მიდიოდნენ, რადგან “დინამოს” კონტრშეტევა მეტად სახიფათო იქნებოდა, თუმცა, ბოლო 10 წუთში “გურიამ” შეტევა გააძლიერა და ერთგვარ რისკზეც წავიდა, მაგრამ უკან დასახევი გზაც არ იყო. ამან გაამართლა კიდეც _ მარჯვენა ფრთაზე გაილაღა ალეკო შენგელიამ და საჯარიმოში კი ყველას გიგა კვერენჩხილაძემ აჯობა _ 83-ე წუთზე გურულებისთვის სასურველი _ 2:2 “ენთო” ტაბლოზე!
თუმცა, კოშმარულად დაწყებული მატჩი კოშმარულადვე დასრულდა _ 87-ე წუთზე სრულიად უწყინარ სიტუაციაში მიუტევებელი შეცდომა დაუშვა “გურიას” მეკარემ, უფრო ზუსტად, ეს იყო ფატალური უიღბლობა: კარისკენ ჩაწოდებული “პარაშუტი” გიორგი ძაძამიას “გავლით” კარში აღმოჩნდა, რითაც წყალში ჩაიყარა მისი და თანაგუნდელების ნაღვაწი. ამას ისეთი შოკი მოჰყვა, რომ “გურია” გამტანი აღარ იყო და ასეც მოხდა.
სამწუხაროდ, უღბლობის გარდა “გურია” მსაჯებმაც დააღალატეს _ თუ მთელი მატჩის მანძილზე მათი სიმპათიები მხოლოდ “დინამოს” მხარეს იყო, საეჭვო 11-მეტრიანისა და ალეკო გოგობერიშვილის გაძევების გარდა, ჯენერი ხორავამ და კომპანიამ მესამე გოლისას შეცდომა დაუშვეს _ ძაძამიას წინ მდგარი ერთბაშად სამი “დინამოელი” თამაშგარეში იყო, აქედან, ჯაბა დვალი _ აქტიურში. შესაბამისად, გოლი არ უნდა ჩათვლილიყო.
მოკლედ, “გურია” სათასო მარათონს გამოეთიშა და რაც ყველაზე სამწუხაროა, ეს მაშინ და ისე მოხდა, როცა ამის ღირსი “გურია” არ იყო და ქვეყნის მთავარ გუნდს თამაშით მისსავე არენაზე აჯობა.
დასასრულ, ერთი საინტერესო ფაქტის შესახებ. ოთხი სათასო მეოთხედფინალიდან ტოტალიზატორებმა მხოლოდ 3 გაუშვეს, ხოლო “დინამო” _ “გურიაზე” ფსონები არ მიიღეს. ამასთან დაკავშირებით “დინამომ” კითხვით (!) მიმართა “ევროპა-ბეთის” ადმინისტრაციას, საიდანაც მიიღეს პასუხიც, რამაც ლანჩხუთელი ქომაგები ფრიად გაანაწყენა. პატივცემული კანტორის პატივცემული მენეჯერი თამაშზე ფსონების არმიღების მიზეზად კლასში სხვაობას ასახელებს. არადა, შეხვედრამ გამოაჩინა, რომ “გურიამ” “დინამოს” ტოლსწორად ეთამაშა. “ევროპა-ბეთის” ადმინისტრაცია “დინამოს” მიმართ პატივისცემას გამოხატავს, რისი საწინააღმდეგოც არაფერი გვაქვს, მაგრამ ქართულ ტოტო-კანტორაში ეტყობა “გურიის” წარმატებების შესახებ არაფერი სმენიათ, თორემ უფრო პატივისცემით მოგვექცეოდნენ. რა თქმა უნდა, ტოტალიზატორი თავად საზღვრავს, რაზე მიიღოს ფსონები, მაგრამ განმარტებით “სუსტი” გუნდის ინტერესებიც არ უნდა შელახოს. აი, “ევროპა-ბეთის” განმარტება: “გამომდინარე იქიდან, რომ “დინამო” თამაშობს უმაღლეს ლიგაში და ლიდერობს სატურნირო ცხრილს, ხოლო “გურია” თამაშობს პირველ ლიგაში (“გურიაც” რომ ლიდერობს, ეს “გამორჩათ”. რედ.), გუნდების სიძლიერის, ურთიერშეხვედრების სტატისტიკის, სათამაშო ფორმისა და მოტივაციისა, ამასთან ვინაიდან მატჩი იმართება თბილისში (იმიტომ არ იყვნენ გაცილებით მეტი “გურიის” ქომაგები. რედ.), მატჩის მონაწილე ერთ-ერთი გუნდი არის იმდენად ფავორიტი (პირველი 0:0-ისა და “ზესტაფონის” გაგდების მერეც?! რედ.), ბუკმეიკერული დეპარტამენტის გადაწყვეტილებით, შეუძლებელი იყო ნუმერაციულად რეალური კოეფიციენტის დადგენა”.
კომენტარი მართლაც ზედმეტია.
