გავრცელებული ინფორმაციით, სკოლის პედაგოგმა თეა დარჩიამ თავის მოსწავლეს ფიზიკური შეურაცხყოფა მიაყენა, რის გამოც რიგგარეშე პედსაბჭო დაინიშნა და განხილული იქნა ეს საკითხი. სხდომას ოზურგეთის მუნიციპალიტეტის საგანმანათლებლო რესურსცენტრის უფროსი, ირინა ინარიძე ესწრებოდა.
11 წლის მოსწავლის დედა, მ. კ. ამბობს, რომ მის შვილთან ერთად კიდევ ორ ბავშვს შეეხო პედაგოგი ხელით.
მ. კ., მშობელი: _ გასულ ხუთშაბათს 12:30-ზე ჩემი შვილი აღელვებული და ატირებული მოვიდა სახლში. მან მითხრა, რომ პედაგოგი მას ხელით შეეხო. სკოლაში ბავშვები თამაშობდნენ და ერთ-ერთს ხელი მოყვა კარებში და ამის გამო დაისაჯა ჩემი შვილი თავის ორ მეგობართან ერთად. სახეზე და ტანზე შემოარტყა ხელი. შემდეგ ბავშვი საკლასო ოთახში დატოვა და სხვა ბავშვები გარეთ გამოიყვანა. ამოვედი პარასკევს სკოლაში და სკოლის დირექტორთან შევედი, რომელიც ჩემი შვილის პედაგოგის მეუღლეა. თეას ვუთხარი, რა დააშავა ბავშვმა ასეთი, რომ ხელით შეეხე-მეთქი. თეა მასწავლებელმა მითხრა, დაჯექი და ყველაფერს აგიხსნიო, ბავშვი არის ძალიან ცელქი და შეგიძლიათ დამატებით სპორტზე ატაროთო. მან არ ჩათვალა დამნაშავედ თავი და მე გამოვედი გარეთ, აზრი არ ჰქონდა იქ საუბარს. ტყუილს არაფერს ვამბობ.
თავად პედაგოგი, თეა დარჩია ამბობს, რომ ბავშვი დასაჯა, მაგრამ ხელით არ შეხებია.
_ ბავშვი მხოლოდ დავსაჯე და რეალობას არ შეესაბამება ის ცილისწამება, რაც მოსწავლის მშობლიდან მოდის. ბავშვი დავსაჯე იმით, რომ ხმამაღლა ვუთხარი, ეს არ უნდა გაეკეთებინა-თქო, საკლასო ოთახში დავტოვე, მასთან ერთად კიდევ იყო სამი ბავშვი, დანარჩენებთან ერთად კი სკოლის ეზოში გავედით ხატვის გაკვეთილზე. მეტი არაფერი იყო.
_ ქალბატონო თეა, ითქვა ისიც, რომ თქვენ ბავშვებს ხშირად სჯით.
_ ნამდვილად არა. ეს შეიძლება იყო ვიღაცის ინტერესებიდან გამომდინარე.
_ ჩვენს მიერ მოპოვებული ინფორმაციით, ეს ბავშვი მარტო ზის მერხთან.
_ ზოგი მარტო ზის და ზოგი ერთ მერხზე _ ორი. ეს იმის გამო ხდება, რომ ზოგი უფრო ცელქია და ხელი ეშლებათ. თავად ბავშვები მეუბნებიან, იქნებ მარტო დავსვათ. ხან გვთხოვს გადავსვა, რადგან ძალიან ცელქობს. ერთი ის ვიცი, რომ ბავშვისთვის ფიზიკური შეურაცყხოფა არ მიმიყენებია. აქ არიან მშობლები, პედაგოგები და მათ კითხეთ. _ განაცხადა პედაგოგმა თეა დარჩიამ.
_ ძალიან ცუდი ფაქტის წინაშე დავდექით ჯუმათის საჯარო სკოლა. მოხდა ფაქტი, მაგრამ არ დადასტურდა. მშობელს არ ჰყავს მოწმე და აქედან გამომდინარე, არ დადასტურდა. მშობელი ამბობდა, რომ იყო ბავშვის დასჯის მცდელობა, რომ პედაგოგმა ყური აუწია ბავშვს, მაგრამ ამ ფაქტს არავინ ჰყავს მოწმე. ამ ფონზე, ქალბატონ თეა დარჩიას რიგგარეშე თათბირის შემდეგ გამოეცხადდა საყვედური, _ ეს განცხადება სხდომის დასრულების შემდეგ სასწავლო ნაწილის გამგემ, ლია მეგრელიშვილმა გაგვაცნო. თუმცა, არ უთქვამს, თუ ბავშვის ცემის ფაქტი არ დადასტურდა, მაშინ რატომ მიიღო საყვედური პედაგოგმა?!
სკოლის ერთ-ერთმა მოსწავლემ ჟურნალისტებთან საუბრის დროს თქვა, რომ პედაგოგმა მოსწავლეს შეურაცხყოფა მიაყენა.
“ვიცით ის, რომ კუთხეში დააყენა და ცოტათი ყური აუწია, მეტი არაფერი არ ვიცით.”
ჯუმათის საჯარო სკოლის პედაგოგები ჩვენთან საუბრის დროს ამბობენ, რომ კარგი იქნებოდა, სხვა თემებით დავინტერესებულიყავით:
_ ამ სკოლაში სხვა პრობლემებია, ჩვენ ვიფიქრეთ, რომ ამის გამო იყავით მოსულები. სკოლის შენობას რემონტი სჭირდება, ინვეტარია ძველი და კარგი იქნებოდა, ეს საკითხები წამოგეჭრათ. ყოველთვის სახელგანთქმული იყო ჩვენი სკოლა და ახლა უნდათ, რომ სახელი შეულახონ. ბავშვის ცემის ფაქტი თუ დადასტურება, ეს არ იქნება კარგი, მაგრამ დარწმუნებულები ვართ, რომ მსგავსი რამ არ მომხდარა. იშოვა საქმე ტელევიზიამ ხომ?! _ გვითხრეს პედაგოგებმა.
თენგიზ მითაიშვილი: _ მე ვარ მშობელი და თეა დარჩია ჩემი შვილის მასწავლებელია. ახლა სასწავლო ტურზე ჰყავდა ექვსი ბავშვი წაყვანილი და ექვსივე გადავიდა შემდეგ ტურში. ვინმეს მისი მოხსნა თუ უნდა, ასე არ შეიძლება. ვიღაცას შეიძლება მისი ადგილი უნდა. საქართველოს პრემიერ-მინისტრი გამოვიდა ამასწინათ და სკოლასთან დაკავშირებითაც ისაუბრა, სიგარეტიო, ზოგს დანა აქვს ჯიბეშიო. ბავშვს თუ არ უყვირე და ცოტა არ იგრძნო უფროსის რიდი, ისე არ იქნება. მე არ ვამბობ, რომ ცემო, ეს ნამდვილად არ შეიძლება. ჩემს პედაგოგს რამდენჯერ აუწევია ჩემთვის ყური და ახლა არ მითხრათ, რომ თქვენთვის არ უქნიათ!
პედაგოგი, ნელი ოკუჯავა: _ ვინც ამ ბავშვს თავგზა აუბნია, იმას ჰქონდეს მისი ცოდვა. ექვსი დირექტორი გამოვიცვალე და ასეთი არაფერი მინახავს. ის წერილი, რომელიც მშობელმა დაწერა, ისე არ არის მისი დაწერილი, როგორც მე არ ვიცი ახლა თურქული. იმ კლასში 11 მოსწავლე არის და აქედან 10 მშობელი კმაყოფილია. ეს ახალგაზრდა პედაგოგია, ჩემი მოსწავლე იყო. უმაღლესის დამთავრების შემდეგ მოვიდა აქ სამუშაოდ, ინფორმატიკას ასწავლიდა. ერთ-ერთი მასწავლებელი გახდა ავად, სამწუხაროდ გარდაიცვალა და ვთხოვთ თეა დარჩიას, კლასი ხელმძღვანელის გარეშე არ დარჩენილიყო და შესულიყო დროებით კლასში.
და ბოლოს, “გურია ნიუსის” ინფორმაციით, მოსწავლის შობელმა განცხადებით უკვე მიმართა სამართალდამცავებს და საქმეს ოზურგეთის რაიონული პოლიციის სამმართველო იძიებს.
