(გურია ნიუსი, ოზურგეთი) _ ოზურგეთის მუნიციპალიტეტის ფიზიკურ და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების კომისიის მიერ გაწეული საქმიანობის შესახებ ანგარიში, ოზურგეთის მუნიციპალიტეტის საკრებულოს რიგგარეშე სხდომაზე აღნიშნული კომისიის თავმჯდომარემ პეტრე სალუქვაძემ წარმოადგინა.
სალუქვაძის თქმით, აღნიშნულ კომისიაში სულ 76 დაინტერესებული პირის განცხადება შევიდა, მათ შორის 55 განცხადება _ 2010 წელს, ხოლო მიმდინარე წელს _ 19. კომისიამ უკვე განიხილა 28 საქმე, რომლიდანაც 6 დააკმაყოფილა. აქედან, სამმა დაინტერესებულმა პირმა სასამართლოს მიმართა. ამჟამად კომისია მხოლოდ ერთ სასამართლო დავაში მონაწილეობს.
“ახალგაზრდები სამართლიანობისათვის _ საქართველოს” ადამიანის უფლებათა ევროპულ სასამართლოში უფლებამოსილი წარმომადგენლები ოზურგეთის მუნიციპალიტეტის საკრებულოს ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების კომისიის 2011 წლის 18 იანვრის გადაწყვეტილებას უკანონოს და დაუსაბუთებელს უწოდებენ: “გური ურუშაძეს უფლება აქვს, მიმართოს ადამიანის უფლებათა ევროპულ სასამართლოს და ამტკიცოს, რომ მასთან მიმართებაში ირღვევა ადამიანის უფლებათა და ძირითად თავისუფლებათა დაცვის ევროპული კონვენციის მე-6 მუხლი, რომლითაც გარანტირებულია სამართლიანი სასამართლო განხილვის უფლება”, _ მიიჩნევენ შესაბამისი კვალიფიკაციის მქონე იურისტები მას შემდეგ, რაც შესაბამის დოკუმენტაციას, ჩვენი თხოვნით, გაეცნენ. სწორედ, ამის შემდეგ მიმართა გური ურუშაძემ ოზურგეთის რაიონულ სასამართლოს. სხდომა 20 აპრილს არის დანიშნული.
