სამაგიეროდ, რუსულ გამოცემებში თითქმის ყოველდღიურად იბეჭდება ვრცელი ინტერვიუები, რომლებშიც მომღერალი თავისი უდანაშაულობას ამტკიცებს.
“გურია ნიუსს” მოკლული ბიზნესმენის ოჯახის ახლობლები დაუკავშირდნენ, რომლებიც აცხადებენ, რომ “იძულებული გახდნენ, სოსო პავლიაშვილს რუსული მედიით გავრცელებულ სიცრუეზე უპასუხონ.”
ადუაშვილის ახლობლები ანონიმურად დარჩენას გვთხოვენ, თუმცა, ამბობენ, რომ “დრო მოვა და ყველაფერს საჯაროდ იტყვიან”:
_ სოსო და ავთო ნახალოვკაში ერთ ეზოში გაიზარდნენ. ავთოს ოჯახი ფინანსურად ძლიერი იყო და პავლიაშვილებს მუდმივად ეხმარებოდა. სოსო ვიოლინოზე დადიოდა. ხომ წარმოგიდგენიათ “ნახალოვკაში” იმ ბიჭის ცხოვრება, რომელიც “სკრიპკაზე” დადის, მაგრამ, ავთოს ხათრით, მას ზედმეტს ვერავინ უბედავდა. სოსო რომ ჯარში წავიდა, ავთომ მას ტალინში ჩააკითხა, ვიოლინო ჩაუტანა და მუსიკალურ გუნდში ჩაარიცხინა. ავთოს არ უნდოდა, რომ სხვა სამხედროებივით სოსოსაც სანგრები ეთხარა. სოსოს და მისი გულშემატკივრების იურმალაში გამგზავრებაც ადუაშვილებმა დააფინანსეს _ ნიჭიერი ბიჭია და გვერდში დგომა სჭირდებაო. მერე სოსო მოსკოვში წავიდა და წარმატებას მიაღწია.
_ სოსოს მოსკოვში წასვლის შემდეგ როგორ გაგრძელდა მათი ურთიერთობა?
_ წარმატება უცებ არ მოსულა. სოსოს მოსკოვში ჩასვლისთანავე შეექმნა პრობლემები. ქართველმა ძმებმა (გვარს არ დავასახელებ) ფირმა “ჯოკერი” დააარსეს, რომელსაც რეალურად თვითონ მართავდნენ, მაგრამ სოსოს სახელს იყენებდნენ. ამ ძმებმა უამრავი ადამიანი “გადააგდეს” და გაიქცნენ. პასუხის გაცემა სოსოს უწევდა და ბოლოს მასაც მოსკოვიდან გასაქცევად გაუხდა საქმე. ავთო სასწრაფოდ ჩაფრინდა მოსკოვში და გავლენიანი მეგობრების დახმარებით, სოსოს ყველა პრობლემა მოუგვარა. იმ დროს მოსკოვში ფეხის მოკიდება ადვილი არ იყო, იმის მიუხედავად, რომ სოსო მართლაც ძალიან ნიჭერი მუსიკოსი იყო. ავთო ყველაფერს აკეთებდა სოსოს წარმატებისთვის. მაგალითად, იმ დროს ძალიან პოპულარულ მომღერალ ვლადიმერ პრესნიაკოვს ავთომ სწორედ სოსოს გამო ყველაზე ძვირადღირებულ სასტუმრო “ოლიმპიკ პენტაში” გადაუხადა დაბადების დღე. სოსო რომ 30 წლის გახდა, ავთომ 100-კაციანი იუბილე “ზალატოე რუნოში” გადაუხადა, რომელიც ყველაზე ძვირადღირებული რესტორანი იყო და სოსო იქ ყავის დასალევადაც ვერ შევიდოდა.
ხმის პირველი ჩამწერი სტუდიაც სოსოს ავთომ აჩუქა _ მსგავს სტუდიას, მაშინ მთელ პოსტსაბჭოთა სივრცეში ვერ იპოვიდით. მოსკოვში სოსო ჯერ ავთოს მეგობრის ბინაში ცხოვრობდა, მერე კი ავთომ ქალაქის ცენტრში სამოთახიანი ბინა იყიდა და სოსოს დაუთმო. ავთო მუდმივად აწუხებდა რუსეთში მცხოვრებ მეგობრებს, რომ სოსოს დახმარებოდნენ, ნიჭიერი ქართველი არ დაგვეჩაგროსო. მაშინ სოსო პავლიაშვილს კონცერტში 200-300 დოლარს უხდიდნენ, ასეთი ანაზღაურებით კი, მოსკოვში თავს ვერ გაიტანდა. ავთოს დახმარების გარეშე, სოსო პავლიაშვილი დღეს, მინიმუმ, სტეფანე, მაქსიმუმ _ თათარაშვილი იქნებოდა.
რამდენიმე წელი ავთო მოსკოვში ცხოვრობდა, 90-იანი წლების ბოლოს კი თბილისში დაბრუნდა და საკუთარი ბიზნესი დაიწყო. პარალელურად, მას და სოსოს საქართველოს გარეთ საერთო ბიზნესი ჰქონდათ.
_ ავთო ადუაშვილი სოსოს სიძეს _ ვახტანგ ჩხაპელიას იცნობდა?
_ როგორ არ იცნობდა. ჩხაპელია რომ შიმშილით არ მომკვდარიყო, ავთომ დაასაქმა თავის ფირმაში. სოსოს მაშინ არაფერი ჰქონდა და დის ოჯახს ვერ ეხმარებოდა. ჩხაპელიამ რომ თბილისში ბინა იყიდა, ფული დააკლდა, სოსომ არ დაუმატა და დაბოღმილი დადიოდა. ავთომ დააწყნარა, ეტყობა, არა აქვს და სოსოზე გული ნუ დაგწყდება, მე დაგიმატებო. ასეთი ადამიანი იყო ავთო და ამიტომაცაა, რომ მთელ თბილისში სოსო პავლიაშვილმა საკუთარი სიძის გარდა ვერავინ მონახა, ვისაც მის მოკვლაზე დაითანხმებდა.
_ ჯერ სასამართლო არ დასრულებულა და ეს ძალიან მძიმე ბრალდებაა… ჩხაპელიას ჩვენების მიხედვით, ადუაშვილის დასჯის იდეა მისგან მოდიოდა.
_ ვინც სოსოს და მისი სიძის ურთიერთობას ახლოს იცნობს, მიხვდება, რომ ჩხაპელიასგან ასეთი ინიციატივა წარმოუდგენელია. ის ამის თქმასაც ვერ გაუბედავდა სოსოს, რადგან, ეს უკანასკნელი, სიძეს ყოველთვის “შნირად” თვლიდა.
_ ავთო ადუაშვილის მკვლელებმა ბევრი შეცდომა დაუშვეს…
_ გეთანხმებით _ მკვლელობა ნაჩქარევად გახორციელდა. 24 ნოემბერს ავთო და სოსო ერევანში უნდა შეხვედროდნენ ერთმანეთს. როგორც ჩანს, სოსოს არ უნდოდა, რომ ავთო იქ ჩასულიყო. ამიტომაც გადაწყდა კაცის მოკვლა გიორგობა დღეს. მკვლელები ავთოს მაშინ დაესხნენ თავს, როდესაც ის ვაკეში, ერთ-ერთი კაფედან გამოვიდა და მანქანაში ჯდებოდა. ჩვენი ინფორმაციით, გელა უბილავამ ელიავას ბაზრობაზე სპეციალურად იყიდა ხანჯლის ტიპის დანა, რომელიც ავთოს პირველად მანქანაში ჩაჯდომამდე დაარტყეს. მკვლელებმა ის მანქანაში ჩააგდეს და დაახლოებით 40 წუთის განმავლობაში დაჰყავდათ ქალაქში, ბოლოს კი გვამი ზაზიაშვილის ქუჩაზე დატოვეს. სხვათა შორის, შემთხვევის ადგილზე ჩხაპელიაც მოვიდა და თავს ურტყამდა, თითქოს ძალიან განიცდიდა ავთოს სიკვდილს.
_ რა ვერსიები ჰქონდა ოჯახს _ ეჭვმიტანილთა შორის როდის გაჩნდა პავლიაშვილი?
_ ადამიანს სამი მიზეზით კლავენ: ეს არის ქალი, რაც ავთოს შემთხვევაში გამორიცხული იყო მისი ცხოვრების წესიდან გამომდინარე. შურისძიება _ ავთოს არ ჰყავდა მტრები და ამაზე არც არასოდეს დაუჩივლია; და ბიზნესი. ამ შემთხვევაში, მკვლელობის მიზეზი მხოლოდ ბიზნესი შეიძლებოდა ყოფილიყო, ავთოს კი ერთადერთი ბიზნეს პარტნიორი ჰყავდა _ სოსო პავლიაშვილი. ეჭვი უფრო გაღრმავდა, როდესაც ერევანში მყოფი სოსო ბავშვობის მეგობრის დაკრძალვაზე არ ჩამოვიდა, არც შვილს მისცა ჩამოსვლის უფლება, რომელიც ავთოს ნათლული იყო. უფრო მეტიც, მას არც კი დაურეკავს და მიუსამძიმრებია ავთოს ოჯახისთვის.
_ ერთ-ერთ ინტერვიუში სოსო პავლიაშვილი ამბობს, რომ ავთო ადუაშვილს მტრები ჰყავდა, რომლებიც მას მოკვლით ემუქრებოდნენ. მან მეგობარს ქვეყნიდან წასვლაც კი შესთავაზა, მაგრამ ავთოს უარი უთქვამს, აზრი არ აქვს, ყველგან მომაგნებენო.
_ ტყუილია, ავთოს მტრები არ ჰყავდა, არც არავინ ემუქრებოდა. ამიტომაცაა, რომ საქართველოში სოსომ საკუთარი სიძის გარდა ვერავინ იპოვა, ვინც ავთოს მოკვლას ითავებდა. რის სანაცვლოდ გააკეთა ვახო ჩხაპელიამ ეს, არ ვიცით, თუმცა, ვერსიები გვაქვს… სავარაუდოდ, სოსომ მას ავთოს წილი და ბიზნეს პარტნიორობა შესთავაზა.
_ პავლიაშვილი ამბობს, რომ ის ავთო ადუაშვილს ფინანსურად ეხმარებოდა, რომ სასტუმრომდე მისასვლელ ბილეთს ყიდულობდა, რომ ავთოს არანაირი ბიზნესი არ ჰქონდა, რადგან მას ელემენტარულად ბილეთის ფულიც კი არ გააჩნდა…
_ უსინდისოდ იტყუება. ავთო ადუაშვილს არასოდეს დასჭირვებია სოსოს დახმარება. პირიქით კი ხშირად ხდებოდა. მათ ჰქონდათ საერთო ბიზნესი და რეგულარულად ხვდებოდნენ ერთმანეთს, როგორც ბიზნესპარტნიორები და როგორც მეგობრები. სოსო რომ თბილისში ჩამოდიოდა, ყოველთვის ავთო მასპინძლობდა. ზოგჯერ ერთად დადიოდნენ დასასვენებლად. შარშანაც ერთად დაისვენეს სეიშელებზე. ბოლო პერიოდში სოსო საქართველოში ჩამოსვლას ვერ ახერხებდა, ამიტომ, ავთო მას ხან სომხეთში ხვდებოდა, ხან _ უკრაინაში. სწორედ ამ შეხვედრების დროს აგვარებდნენ ბიზნესთან დაკავშირებულ საკითხებს.
_ პავლიაშვილი ამბობს, რომ ის დღემდე ეხმარება მოკლულის ოჯახს, უგზავნის ფულს და გვერდში უდგას მას.
_ სოსო ამ განცხადებებით საკუთარი დანაშაულის დამალვას ცდილობს. ვადასტურებთ, ის ოჯახს ფულს უგზავნის, მაგრამ ეს არის ავთოს ბიზნეს წილი და არა სოსოს ქველმოქმედება. ამ თანხას სოსო მაშინაც გზავნიდა, როცა ავთო ცოცხალი იყო.
_ ამბობენ, რომ ვახო ჩხაპელიაზე ზეწოლა ხორციელდება, რათა მან გამოძიებისას მიცემული ჩვენება შეცვალოს.
_ რა თქმა უნდა, სოსო ამ საქმიდან თავის დაძვრენას ცდილობს. სხვათაშორის, ერთადერთი, ვისაც ჩხაპელიას ციხეში ლიკვიდაცია “აწყობს”, პავლიაშვილია. ჩვენთვის ის უმნიშვნელოვანესი მოწმეა; ამიტომ, არც ვახტანგ ჩხაპელიას და არც სხვა ბრალდებულებს ადუაშვილებისგან არანაირი საფრთხე არ ემუქრებათ. ჩვენ ველოდებით სასამართლოს სამართლიან ვერდიქტს, არ ვახდენთ არავისზე ზეწოლას, არ ვიყენებთ პირად კონტაქტებს, არ ვემუქრებით არავის.
_ რა ბედი ეწევა ავთო ადუაშვილის და სოსო პავლიაშვილის საერთო ბიზნესს?
_ ჭირისუფალს ჯერ ამისთვის არ სცალია. ისე, როგორც ჩვენ ვიცით, ავთო იმდენად ენდობოდა სოსოს, რომ თავის სახელზე არაფერი არ ჰქონდა დარეგისტრირებული.
“გურია ნიუსს” ბიზნესმენის მკვლელობის ბრალდებით დაკავებული ვახტანგ ჩხაპელიას ნათესავებიც დაუკავშირდნენ, რომლებიც ამბობენ, რომ “სოსო პავლიაშვილმა ვახოს ტვინი აურია და მკვლელობის ჩადენაზე დაითანხმა”: “ძალიან გაგვიკვირდა, როდესაც შარშან ზაფხულში, სოსომ ვახო დასასვენებლად თურქეთში დაპატიჟა _ ეს იყო პირველი შემთხვევა. თავის დას, მაკას სოსო ყოველთვის სწყალობდა, ვახოს მიმართ კი ასეთი მზრუნველი არასდროს ყოფილა. ახლა ვხვდებით, რომ, ალბათ, ამ დროს ურევდა ტვინს და ჩასჩიჩინებდა, რომ ადუაშვილი უნდა მოეშორებინათ. დღემდე შოკში ვართ _ რატომ გააკეთა ეს ვახომ? რის სანაცვლოდ? მას ხომ უვადო პატიმრობა გარანტირებული აქვს?”
ჩვენი მცდელობა დავკავშირებოდით სოსო პავლიაშვილს, კვალავ უშედეგო აღმოჩნდა. “გურია ნიუსი” მზად არის, ნებისმიერ დროს, ნებისმიერ ფორმატში, სურვილის შემთხვევაში, მოუსმინოს სოსო პავლიაშვილს, რომელსაც მოკლული ბიზნესმენის ოჯახი და ნათესავები მკვლელობის ორგანიზებაში სდებენ ბრალს.
