16 იანვარს, ოზურგეთის მუნიციპალიტეტის საკრებულოს რიგგარეშე სხდომა შედგა.
დღის წესრიგით გათვალისწინებული ოთხი საკითხი საკრებულოს წევრებს, ტრადიციულად საკრებულოს თავმჯდომარემ დავით დარჩია გააცნო.
ოზურგეთის მუნიციპალიტეტის მერიის და საკრებულოს თანამდებობის პირთა და სხვა მოსამსახურეთა თანამდებობრივი პირების სარგოებისა დამტკიცების შესახებ, საფინანსო სამსახურის უფროსმა, პავლე ჭყონიამ ისაუბრა.
ის მიესალმა კოლეგებს, წარმატებები უსურვა ახალ 2026 წელს და მოკლედ ისაუბრა თანამდებობრივი სარგოების ზრდის და საშტატო ნუსხის დამტკიცების შესახებ:
“დღეს ოზურგეთის საკრებულოში დაინიცირდა თანამდებობრივი სარგოების გაზრდა. პროექტი გულისხმობს საბაზისო განაკვეთის _ 1 600 ლარი გამრავლებას შესაბამის კოეფიციენტზე, რაც აქამდე არსებობდა. ასევე, პროექტი გულისხმობს ხელშეკრულებით მომუშავე პირებისთვის ანაზღაურების განსაზღვრას. პროექტი შესაბამისობაშია საქართველოს კანონმდებლობასთან”, _ განაცხადა ჭყონიამ.
დავით დარჩიას კითხვაზე, ჰქონდათ თუ არა შენიშვნა აღნიშნული საკითხის მიმართ, პასუხი არ ყოფილა.
მომდევნო საკითხზე, რომელიც იგივე თემას ეხებოდა, ოზურგეთის მუნიციპალიტეტის საკრებულოს სამანდატო, საპროცედურო, იურიდიული საკითხთა და ეთიკის კომისიის თავმჯდომარემ მარიკა ჩხიკვიშვილმა ისაუბრა:
“ოზურგეთის მუნიციპალიტეტის საკრებულომ განიხილა პროექტი საკრებულოს თანამდებობის პირთა საშტატო ნუსხის დამტკიცების შესახებ. ასევეა მერიის მიმართულებით. განვიხილეთ საკრებულოს წევრების ხარჯვის ანაზღაურების საკითხი. საქმე იმაშია, რომ საჯარო სექტორში ანაზღაურება ნაკლებია, ვიდრე კერძოში. აქედან გამომდინარე კვალიფიციური კადრების გადინება ხდება მუნიციპალიტეტიდან. და ეს რომ არ მოხდეს, უნდა გატარდეს ისეთი პოლიტიკა, არ იყოს კორუფციის რისკები. ხელი შეეწყოს მუნიციპალიტეტში კვალიფიცირებული კადრების შენარჩუნებისა და ახალი მაღალკვალიფიციური პერსონალის მოზიდვას; თანამშრომელთა მოტივაციის ამაღლებასა და მოქალაქეებისათვის მოწოდებული მომსახურების ხარისხის გაუმჯობესებას; კორუფციული რისკების მინიმუმამდე დაყვანასა და ინსტიტუციური ნდობის გაძლიერებას”, _ თქვა მარიკა ჩხიკვიშვილმა.
მანვე ისაუბრა ოზურგეთის მუნიციპალიტეტის საკრებულოს დეპუტატების ხარჯების ანაზღაურებაზეც.
“წარმოგიდგენთ პროექტს, რომელიც ეხება ოზურგეთის საკრებულოს წევრის მიერ მოვალეობის შესრულებასთან დაკავშირებული ხარჯების ანაზღაურების ზღვრული ოდენობის განსაზღვრის შესახებ პროექტს, რომელიც ვფიქრობ თითოეული წევრისთვის მნიშვნელოვანია. აღნიშნული ხარჯის ანაზღაურების ოდენობა იყო 935 ლარი და გახდება 1 050 ლარი. აღნიშნული ცვლილება გამოწვეულია საკრებულოს წევრის მოვალეობის შესრულებასთან დაკავშირებით მოქმედი ხარჯთაღრიცხვის შეუსაბამობით საკრებულოს წევრის მიერ ფაქტობრივად გაწეული ხარჯების დონესთან. მე დარწმუნებული ვარ, თქვენ, საკრებულოს თითოეული წევრი, გაცილებით მეტს აკეთებთ და ამიტომ ძალიან მნიშვნელოვანია ამ ხარჯების შესაბამისი ანაზღაურება”, _ თქვა მარიკა ჩხიკვიშვილმა.
ხელფასების და დეპუტატების ანაზღაურების გაზრდის საკითხს ოზურგეთის მუნიციპალიტეტის საკრებულოს წევრებმა ერთხმად დაუჭირეს მხარი.
აქვე აღსანიშნავია, რომ სხდომას ორი ოპოზიციონერი წევრი ამჯერადაც არ ესწრებოდა.
ოზურგეთის მუნიციპალიტეტის საკრებულოს, მერიის პირველი პირების და თანამშრომლების ხელფასები ასეთი რაოდენობის იქნება:
ოზურგეთის მუნიციპალიტეტის მერის ხელფასი (დარიცხული) 7 200 ლარი იქნება, პირველი მოადგილის _ 5 600 ლარი, მერის დანარჩენი მოადგილეების _ 5 120-5 120 ლარი.
ოზურგეთის მუნიციპალიტეტის საკრებულოს თავმჯდომარე ხელფასის სახით (დარიცხული) 6 500 ლარს მიიღებს, ოზურგეთის მუნიციპალიტეტის საკრებულოს თავმჯდომარის პირველი მოადგილე _ 4 960 ლარს, საკრებულოს თავმჯდომარის მოადგილე _ 4 320 ლარს, კომისიის თავმჯდომარე _ 3 680 ლარს, ფრაქციის თავმჯდომარე კი _ 3 680 ლარს.
საკრებულოს სხდომაზე კიდევ ერთი მნიშვნელოვანი ინფორმაცია გაჟღერდა _ დელეგირებული უფლებამოსილებით საჯარო სკოლების რეაბილიტაციის საკითხი ადგილობრივ მუნიციპალიტეტს გადაეცა.
აღნიშნულ თემის ირგვლივ ოზურგეთის მუნიციპალიტეტის მერის მოადგილემ გენო მორჩილაძემ ისაუბრა.
“გურია ნიუსი” დაინტერესდა, თუ რომელი სკოლების შენობის რეაბილიტაცია მოხდება 2026 წელს. გენო მორჩილაძემ კითხვაზე ასეთი პასუხი გაგვცა:
“არის სკოლები რომლის შენობები გადაუდებლად საჭიროებს სარეაბილიტაციო სამუშაოებს. ჩვენ ვმუშაობთ ამ საკითხებზე და დეტალების შესახებ მოგვიანებით გახდება ცნობილი”.
მისივე თქმით, წელსვე მოხდება არამარტო სკოლების მშენებლობა, არამედ სარეაბილიტაციო სამუშაოების შესრულება.
საუბარში ოზურგეთის მუნიციპალიტეტის საკრებულოს თავმჯდომარე დავით დარჩია ჩაერთო. მისივე თქმით, ამ წუთებში ოზურგეთის მუნიციპალიტეტის სოფელ ცხემლისხიდის სკოლაში დაწყებულია გათბობის დამონტაჟება და ასევე მალე დაიწყება გათბობის დამონტაჟება ვაკიჯვრის საჯარო სკოლაში.
საბოლოოდ რიგგარეშე სხდომაზე, დღის წესრიგით გათვალისწინებული ოთხი საკითხი დაამტკიცეს.
“ოზურგეთის მუნიციპალიტეტის მერიის თანამდებობის პირთა და სხვა მოსამსახურეთა თანამდებობრივი სარგოების ოდენობების განსაზღვრისა და საშტატო ნუსხის დამტკიცების შესახებ”;
“ოზურგეთის მუნიციპალიტეტის საკრებულოს თანამდებობის პირთა, საკრებულოს აპარატის საჯარო მოსამსახურეთა თანამდებობრივი სარგოების ოდენობების განსაზღვრისა და საკრებულოს აპარატის საშტატო ნუსხის დამტკიცების შესახებ”;
საქართველოს რეგიონული განვითარების სამინისტროსა და მუნიციპალიტეტს შორის უფლებამოსილების განხორციელების დელეგირების შესახებ ხელშეკრულების დამტკიცების თაობაზე;
ოზურგეთის მუნიციპალიტეტის საკრებულოს წევრის მიერ მოვალეობების შესრულებასთან დაკავშირებული ხარჯების ანაზღაურების ზღვრული ოდენობის განსაზღვრის შესახებ.
ავტორი
