ქალბატონი ლილი ჭეიშვილი მარტოხელაა. ის რვა წლის განმავლობაში იღებდა სოციალურ დახმარებას, თუმცა, როგორც თავად ამბობს, ერთ დღეს მასთან მივიდა სოციალური აგენტი და დახმარება მოუხსნა. როცა მიზეზი იკითხა, აგენტის თქმით, თურმე, მას შეშის აბანო დენის აბანოში აერია, რის გამოც, ქალბატონ ლილის ქულები მოემატა და დახმარება შეუჩერდა.
_ ადამიანები ვართ და, ალბათ, უნებლიე შეცდომა მოუვიდა ბაღანას, _ გვითხრა ლილი ჭეიშვილმა და პრობლემებით დატვირთულ სახეზე ღიმილმა გადაუარა, თან დასძინა, _ იყო დრო, კარგად ვიყავი. მერე ყველაფერი დავკარგე _ ქმარი, შვილი, მარა იუმორის გრძნობა არ დამიკარგავს!
ქალბატონი ლიანა კიღურაძე ღრმად მოხუცებულია, მოძრაობის უნარი შეზღუდული აქვს, არც საუბარი შეუძლია. ის შვილთან, დავით კიღურაძესთან ერთად ცხოვრობს.
დავით კიღურაძე: _ ერთი წლის წინ, ერთი გოგონა მობრძანდა, სოცაგენტი ვარო. როცა დედაჩემი დაინახა ასეთ მდგომარეობაში, მოეფერა, ჩვენს საკარმიდამოს გადახედა და დახმარებაც დაგვენიშნა. ახლა კი ისევ მოვიდნენ, ოღონდ სხვები და დახმარება მოგვიხსნეს, მიზეზი კი, თურმე, ტოტალიზატორში ჩემი შესვლა ყოფილა (?!).
ბატონი დავითი ნიჭიერი კაცია, გურიაში ცნობილი მოჭადრაკე. როგორც სოფლის უმრავლესობა, ისიც უმუშევარია. იქნებ რაიმე მოვიგოო და ერთი-ორჯერ, თურმე ტოტალიზატორშიც შესულა (საინტერესოა, ადამიანს ვინ ართმევს იმის უფლებას, რომ ტოტალიზატორში შევიდეს?!). აღსანიშნავია, რომ დავით კიღურაძე სოფელ ასკანაში ახალგაზრდებს ჭადრაკში უანგაროდ, ყოველგვარი გასამრჯელოს გარეშე ამეცადინებს.
ნათელა ქუთათელაძე ასაკოვანი ქალბატონია. მას გადაადგილება უჭირს. როგორც თავად ამბობს, ფულადი დახმარება ხუთი წლის განმავლობაში ეძლეოდა. ოთხი თვის წინ მასთან აგენტები მივიდნენ და დახმარება მოუხსნეს.
_ ვკითხე, რეიზა მიხსნით, ნენა, რა გეიგეთ ამისთანა, მე ჯანმრთელობა გამიუმჯობესდა თუ ეკონომიკურად გავძლიერდი,-მეთქი? აგენტმა მიპასუხა, არა, არ გიხსნით, დროებით შეგიჩერებთო. დროებით ვართ, ნენა, ყველა ამ ქვეყანაზე, სად ნახეს ამფერი მიდგომა? _ კითხულობს ნათელა ქუთათელაძე.
ოჯახში სამნი ცხოვრობენ: ქალბატონი ნათელა, ონკოლოგიურად დაავადებული რძალი და უმუშევარი შვილი. ქუთათელაძეების ოჯახს აინტერესებს, თუ არ ეკუთვნოდა დახმარება, რატომ აძლევდნენ და თუ ეკუთვნის, რატომღა წაართვეს?!
ლილი ჭეიშვილი
ლიანა კიღურაძე
ნათელა ქუთათელაძე
აქ ცხოვრობს ნათელა ქუთათელაძე
“შეშის აბანომ დამღუპა” _ ამბობს ლილი ჭიშვილი
ლილი ჭეიშვილის საკარმიდამო ნაკვეთი
