მასთან ერთად იმყოფებოდნენ აბაშის მუნიციპალიტეტის გამგეობაში მომუშავე ადამიანები, რომლებიც გაემიჯნენ “ნაციონალურ მოძრაობას” და ღიად დააფიქსირეს თავიანთი პოზიცია.
გიორგი გვილავა: “მინდა მივმართო აბაშის რაიონის იმ მოსახლეობას, ვისაც ჯერ კიდევ გზა-კვალი აბნეული აქვს და ჯერაც ვერ გაუცნობიერებია თუ რა ცვლილებები მოხდა 1 ოქტომბრის შემდეგ ქვეყანაში. მიხეილ სააკაშვილისა და მისი გუნდის 9 წლიანი მმართველობის პერიოდში დარღვეული იყო ადამიანის უფლებები, იყო დაშინება, ტერორი, ბევრ დედას ჩააცვეს შავი, ბევრი უკანონო პატიმარი სასჯელს იხდიდა ციხეში, ბევრ მეუღლეს ადინეს თვალზე ცრემლი და ბავშვები ობლად დატოვეს. უმოწყალოდ არბევდნენ დემონსტრაციებს, მიტინგებს, სადაც ჩვეულებრივი ადამიანები თავისუფალ აზრს გამოთქვამდნენ. მინდა შევეხო აბაშის რაიონს და იმ ცვლილებებს, რაც არჩევნების შემდეგ განხორციელდა. ჩვენ პატივს ვცემთ კანონს და შესაბამისად რაიონის საკრებულოს, რადგან ეს ორგანო არის არჩევითი, მაგრამ უნდა აღინიშნოს, რომ აბაშაში არჩევნების შემდეგ არანაირი ცვლილება არ განხორციელებულა, საკადრო ცვლილებების დროს მოხდა შიდა ძალთა გადაადგილება. მინდა მივმართო იმ საჯარო მოხელეებს, რომლებიც ცდილობენ თავის გადარჩენას და სხვადასხვა პარტიებში გადაბარგებას. აბაშის მოსახლეობამ ზედმიწევნით კარგად იცის, ვის რა ცხოვრებით უცხოვრია და ვის რა საქმე უკეთებია ამ წლების მანძილზე. დღეს ჩვენს გვერდით დგანან და სურთ მიმართონ თავიანთ ხალხს იმ წესიერმა ადამიანებმა, რომლებიც წინა რეჟიმის დროს მუშაობდნენ საჯარო სამსახურებში. ესენი არიან: გელა ზაქარაია _ გამგეობის იურიდიული სამსახურის ხელმძღვანელი, დიმიტრი ცანავა _გამგეობის აპარატის უფროსი, თემურ ნოდია _ გამგეობის საფინანსო სამსახურის უფროსი და ვახტანგ გაბელაია, რომელიც არჩევნებამდე იყო გამგებლის პირველი მოადგილე, ახლა კი მუნიციპალური ქონების მართვისა და ადგილობრივი გადასახდელების ადმინისტრირების სამსახურის უფროსი. მე სრული პასუხისმგებლობით ვაცხადებ, რომ ეს ადამიანები არიან მართლაც პროფესიონალები და საზოგადოებისთვის მეტად პატივსაცემი პიროვნებები. მათ უნდათ დღეს გააკეთონ მიმართვა და სწორედ ამიტომ დგანან ჩვენს გვერდით.”
ვახტანგ გაბელაია: “ჩვენი შეკრების მიზანია მიმდინარე პოლიტიკური პროცესის მიმოხილვა და საზოგადოებისთვის ჩვენი შეხედულებების და მოსაზრებების გაცნობა. პირველ რიგში მინდა განვაცხადოთ, რომ წინა ხელისუფლების დროს ვერ მოვახერხეთ ჩვენი პოზიციის და პროტესტის გამოხატვა იმ უსამართლობის შესახებ, რომელიც იყო გამეფებული ქვეყანაში. მოგეხსენებათ იმ დროინდელი წყობა და ხელისუფლება არ გვაძლევდა საშუალებას მკაფიოდ დაგვეფიქსირებინა ჩვენი პოზიციები, რამეთუ ეს იყო დაკავშირებული დიდ რისკებთან და ჩვენი ოჯახების უსაფრთხოების მიზნით ჩვენ ეს ნაბიჯები ვერ გადავდგით აქამდე მიუხედავად იმისა, რომ ყველანი ვაცნობიერებთ რა უარყოფითი პროცესები მიმდინარეობდა ქვეყანაში. გვინდა ქედი მოვიხაროთ იმ ადამიანების წინაშე, რომლებმაც იპოვეს თავიანთ თავში ძალა ღიად და ხმამაღლა დაეფიქსირებინათ პროტესტი. ჩვენ ვხედავთ, რომ დღეს დაცულია ადამიანის უფლებები და ღიად ვაცხადებთ, რომ ვემიჯნებით “ნაციონალური მოძრაობის” ე. წ. პოლიტიკურ კურსს და მოგახსენებთ, რომ ადგილობრივი თვითმმართველობის დონეზე ბევრგან ჯერ კიდევ ნაც. მოძრაობის პოზიციები და გავლენაა. აქედან გამომდინარე ღიად ვაფიქსირებთ ჩვენს პროტესტს და ვუცხადებთ თანადგომას პარტია “ქართული ოცნება-დემოკრატიულ საქართველოს” და მის ლიდერს, ბატონ ბიძინა ივანიშვილს. ვიზიარებთ მის შეხედულებებს ქვეყნის პოლიტიკური მოწყობის თაობაზე. ამასთან ჩვენ არ ვაძლევთ თავს უფლებას ამ ეტაპზე მოვითხოვოთ ამ პოლიტიკურ პარტიაში გაწევრიანება, თუმცა ჩვენი შრომით, პროფესიონალიზმით და თანადგომით დავამტკიცებთ, რომ ვართ ერთგული მხარდამჭერები ამ პოლიტიკური კურსისა. ვფიქრობთ მომავალში ჩვენს პოზიციას გაიზიარებენ ადგილობრივ თვითმმართველობებში მომუშავე პატიოსანი, პროფესიონალი მუშაკებიც. ჩვენ მხარდაჭერას ვუცხადებთ პარტია “ქართული ოცნება- დემოკრატიული საქართველოს” აბაშის რაიონული ორგანიზაციის გუნდა და მის ლიდერს, გიორგი გვილავას, ვთვლით, რომ ისინი რაიონისთვის ნამდვილად ავტორიტეტული და ღირსეული ადამიანები არიან, იცნობენ რაიონის პრობლემებს და არაერთხელ დაამტკიცეს თავიანთი ბრძოლისუნარიანობა და სიმტკიცე. აქვთ განათლება, ხედვა და უნარი ბოლომდე გაატარონ ახალი კურსი და შეძლებენ რაიონის მოსახლეობის პირობების გაუმჯობესებას. კიდევ ერთხელ მივმართავ ყველას, გვერდით დაუდგნენ ამ პარტიას.”
შეხვედრის დასასრულს პარტია “ქართული ოცნება-დემოკრატიული საქართველოს” აბაშის რაიონული ორგანიზაციის ლიდერმა, გიორგი გვილავამ აღნიშნა, რომ თუ ამ მიმართვის შემდეგ ამ ადამიანებს გაათავისუფლებენ დაკავებული თანამდებობებიდან, ეს აღიქმება როგორც პოლიტიკური ზეწოლა და მიეცემა შესაფერისი რეაგირება.
