პირველი კვარტლის მონაცემები გასული წლის შედეგებს ყველა პარამეტრით აჭარბებს

მიმდინარე წლის პირველ კვარტლის მაჩვენებელი 36%-ით აჭარბებს 2012 წლის ამავე პერიოდში დაფიქსირებულ მონაცემებს.

გაწეული ხარჯების საკასო შესრულება 2013 წლის პირველ კვარტალში შეადგენს 87 118 615,0 ლარს, მაშინ, როცა 2012 წლის პირველ კვარტალში 55 349 347,16 ლარს შეადგენდა. შესაბამისად, წლევანდელი მაჩვენებელი 31 769 267,84 ლარით აღემატება გასული წლის მაჩვენებელს.

ბიუჯეტის ძირითადი ნაწილი საგზაო ინფრასტრუქტურის გაუმჯობესების ღონისძიებებზე დაიხარჯა. 2013 წლის პირველ კვარტალში საგზაო ინფრასტრუქტურის გაუმჯობესებაზე დაიხარჯა 64 814 793,2 ლარი, მაშინ, როცა 2012 წლის ამავე პერიოდში 28 661 203.0  ლარი იყო დახარჯული. შესაბამისად, ამ მიმართულებით დაფინანსებულია 115%-ით მეტი ღირებულების პროექტი, ვიდრე 2012 წლის ამავე პერიოდში დაფინანსდა.

მზარდი მაჩვენებელი დაფიქსირდა გზების მოვლა-შენახვაზე დახარჯული თანხების მიმართულებითაც. ეს თანხა მიმდინარე წლის პირველ კვარტალში 23 734 007,65 ლარს შეადგენს, რაც 65,7%-ით აღემატება ამავე მიზნით 2012 წლის I კვარტლის  საკასო ხარჯების მაჩვენებელს.

ინტენსიურად მიმდინარეობს ჩქაროსნული ავტომაგისტრალის მშენებლობა. ამ ეტაპზე სამშენებლო სამუშაოები მიმდინარეობს ავტომაგისტრალის სამ მონაკვეთზე.

პირველი კვარტლის მონაცემებით, ავტომაგისტრალის მშენებლობის მიმართულებით დაფინანსებულია 170%-ით მეტი ღირებულების სამუშაო, ვიდრე გასული წლის ამავე პერიოდში დაფინანსდა (2013 წელი – 39, 910 ,969,30 ლარი; 2012 წელი – 14 ,748 ,481,40 ლარი).

ზემოთ მოყვანილი ციფრები ნათლად ცხადყოფს, რომ 2012 წელთან შედარებით, რეგიონული განვითარებისა და ინფრასტრუქტურის სამინისტროს 2013 წელს ყველა მაჩვენებელში მზარდი მონაცემი აქვს.

სახელმწიფო შესყიდვები

მიუხედავად იმისა, რომ ოპონენტების მხრიდან ხშირად ისმის უსაფუძვლო ბრალდებები, სახელმწიფო შესყიდვების ნაწილში დაფიქსირებული მონაცემებიც ადასტურებს, რომ 2013 წლის პირველი კვარტალი 2012 წლის ამავე პერიოდთან შედარებით მაღალი მაჩვენებლით დასრულდა.

მიმდინარე წლის პირველ კვარტალში გზების მშენებლობა-რეაბილიტაციისთვის გამოცხადდა 65 ტენდერი საერთო ღირებულებით 54 მილიონი ლარი, ხოლო 2012 წლის ამავე პერიოდში გამოცხადებული იყო 52 ტენდერი საერთო ღირებულებით 43 მილიონი ლარი. ტენდერების მაჩვენებელი ასეთია:

2013 წელი – ხიდების განახლების სამუშაოებზე გამოცხადდა 13 ტენდერი (10 მილიონზე მეტი ლარი)

2012 წელი – ამავე სამუშაოებზე გამოცხადდა 1 ტენდერი (ნახევარი მილიონი ლარი)

2013 წელი – საავტომობილო გვირაბების მშენებლობა – 1 ტენდერი (5 მილიონ ლარამდე)

2012 წელი – ამავე სამუშაოებზე არც ერთი ტენდერი არ გამოცხადებულა.

2013 წელი – გზის მშენებლობა-რეაბილიტაციაზე გამოცხადდა 35 ტენდერი

2012 წელი – ამავე სამუშაოებზე გამოცხადდა 29 ტენდერი

2013 წელი – ნაპირსამაგრ სამუშაოებზე გამოცხადდა 12 ტენდერი

2012 წელი – ამავე სამუშაოებზე გამოცხადდა 8 ტენდერი

რეგიონებში განსახორციელებელი პროექტების ფონდი

გარდა რეგიონული განვითარებისა და ინფრასტრუქტურის სამინისტროს ბიუჯეტისა, რომლითაც სხვადასხვა ინფრასტრუქტურული პროექტები ხორციელდება, საქართველოს მუნიციპალიტეტები რეგიონებში განსახორციელებელი პროექტების ფონდიდან დამატებით მიიღებენ თანხებს იმისათვის, რომ ადგილობრივი მოსახლეობის პრობლემები მოგვარდეს. რეგიონებში განსახორციელებელი პროექტების ფონდიდან 643 პროექტი დაფინანსდება, ხოლო პროექტების ჯამური ოდენობა 200 მილიონ ლარამდეა.

ფონდიდან გამოყოფილი თანხის დიდი ნაწილი მუნიციპალური გზების რეაბილიტაციას მოხმარდება. ამისათვის გამოყოფილია 114 მილიონ ლარამდე და ამ თანხით საქართველოს მასშტაბით 277 პროექტი დაფინანსდება. ნაპირსამაგრი სამუშოებისთვის გამოყოფილია 10 მილიონ ლარზე მეტი, რითაც 56 პროექტი განხორციელდება, ხიდების მშენებლობა-რეაბილიტაციისთვის გამოყოფილია 11 მილიონ 500 ათას ლარამდე და დაფინანსდება 38 პროექტი. წყლისა და კანალიზაციის მოწესრიგებისთვის დაიხარჯება 40 მილიონ ლარამდე და დაფინანსდება 215 პროექტი. სხვადასხვა ინფრასტრუქტურულ პროექტებზე გამოყოფილია 25 მილიონი ლარი და დაფინანსდება 57 პროექტი.