“წარმოდგენილი კანდიდატის აფხაზეთის ავტონომიური რესპუბლიკის მთავრობის თავმჯდომარის თანამდებობაზე დანიშვნაზე თანხმობის მიცემა მიზანშეუწონლად მიმაჩნია.”
მიხეილ სააკაშვილი წერილში ყოლბაიას საკმაოდ სერიოზულ ბრალდებას უყენებს და აღნიშნავს, რომ დევნილებს ლეგიტიმურ ხელისუფლებაში კოლაბორაციონისტები არ სჭირდებათ:
“ახლა, საქართველოს, განსაკუთრებით, დევნილებს აფხაზეთის ლეგიტიმურ ხელისუფლებაში სჭირდებათ არა კოლაბორაციონისტები, არამედ საქართველოს დეოკუპაციისა და დამოუკიდებლობის მყარი დამცველები.”
აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა გვაზავა “გურია ნიუსთან” აცხადებს, რომ პრეზიდენტის ბრალდება ვახტანგ ყოლბაიას მიმართა კოლაბორაციონისტობაზე მძიმე ბრალდებაა და მას დამტკიცება სჭირდება.
_ ბატონო ელგუჯა, ამ წერილით პრეზიდენტმა ვახტანგ ყოლბაიას კანდიდატურაზე უარი განაცხადა?
_ არა. ეს არ არის უარი. ამ ეტაპზე მიზანშეუწონლად მიაჩნია, მაგრამ პოლემიკა ხომ უნდა იყოს? აქ შეთანხმებაზეა საუბარი. ერთი სიტყვით, პრეზიდენტი ყოლბაიას კანდიდატურას დადებითად არ აფასებს. წერილში საუბარია კონსტიტუციურ შეთანხმებაზე. თუ მას არ მოეწონა, დავიწყებთ მსჯელობას და ვეცდებით დავუმტკიცოთ, რატომ გვინდა ჩვენ.
აფხაზეთი უმაღლესმა საბჭომ, დეპუტატების უმრავლესობით, ერთის გარდა, რომელმაც თავი შეიკავა, ყველამ მხარი დაუჭირა. თავი შეიკავა ქალბატონი დალილა ხორავას მეუღლემ, ბატონმა თამაზ ხუბუამ. ხალხს შემოაქვს საბუთი, მიდის მსჯელობა, როგორ პროგრამა აქვთ, როგორ უყურებენ ამას. არაფერი გადაწყვეტილი არ არის.
_ როდის იწურება აფხაზეთის ავტონომიური რესპუბლიკის მთავრობის თავმჯდომარის პოსტზე დანიშვნის ვადები?
_ ვადები არ არის, მაინცდამაინც ერთ დღეში, ერთ კვირაში რომ იყოს ასეთი ვადები არ არის. აქ არის ასეთი რაღაც: პრეზიდენტმა გამოგვიგზავნა წერილი და შეიძლება ჩვენც გაუგზავნოთ და იმას არ მოეწონოს. შემდეგ ისევ გავუგზავნოთ და მაინც არ მოეწონოს. მესამეჯერ კი, ჩვენ თვითონ დავნიშნოთ.
_ თუ არ შედგა შეთანხმება აფხაზეთის ავტონომიური რესპუბლიკის უმაღლესი საბჭოსა და პრეზიდენტს შორის?
_ შეთანხმება რას ნიშნავს? შეხვედრას, პოლემიკას და განსჯას, ხო?
_ მიხეილ სააკაშვილი წერილში აღნიშნავს, რომ “საქართველოს განსაკუთრებით, დევნილებს აფხაზეთის ლეგიტიმურ ხელისუფლებაში სჭირდებათ არა კოლაბორაციონისტები”
_ ჩვენ ვახტანგ ყოლბაიას კოლაბორაციონისტობას ვერ დავაბრალებთ, მიუხედავად იმისა, რომ მე და მას სხვადასხვა ხედვა გვქონდეს ბევრ საკითხზე. კოლაბორაციონისტობა ცოტა მძიმე ბრალდებაა. ამას დამტკიცება უნდა. მიმაჩნია, რომ პრეზიდენტის შეფასება ყოლბაიას მიმართ არასწორია. აქ პოლიტიკურ საკითხებზეა საუბარი. პოლიტიკურის გარდა, ჩვენ ცოტა სხვანაირად ვუყურებთ ამ საკითხს.
_ რა რეაქცია ჰქონდა პრეზიდენტის წერილზე აფხაზეთი უმაღლესი საბჭოს დეპუტატებს?
_ პრეზიდენტის შეფასება არასწორად მიგვაჩნია, ამაზე ორი აზრი არ არსებობს. იმ ადამიანს თავის შეხედულება აქვს და გვითხრა. აქ არის პოლიტიკური გზავნილი და მეტი არაფერი. ვახტანგ ყოლბაია 2 მოწვევა იყო პარლამენტის თავმჯდომარის ვიცე-სპიკერი. მაშინ რატომ არ იყო ასეთი შეფასება? თვითონ ხომ ირჩევდნენ? მიხეილ სააკაშვილი ძალიან კარგად იცნობს ვახტანგ ყოლბაიას. ის რაც წერილში წერია, პრეზიდენტის მოსაზრებაა, მაგრამ ჩვენ შევეცდებით ავუხსნათ, რომ ეს ასე არ არის.
“გურია ნიუსი” უცვლელად გთავაზობთ წერილს, რომელიც პრეზიდენტმა აფხაზეთის ავტონომიური რესპუბლიკის უმაღლესი საბჭოს თავმჯდომარეს მიწერა.
ბატონო ელგუჯა,
პირველ რიგში, მინდა პატივისცემა გამოვხატო პირადად თქვენი და აფხაზეთის ავტონომიური რესპუბლიკის უმაღლესი საბჭოს მიმართ. ამ ორგანოს არსებობა ძალზე მნიშვნელოვანი იყო ჩვენი ქვეყნისათვის მრავალი წლის განმავლობაში. დარწმუნებული ვარ, აფხაზეთის ავტონომიური რესპუბლიკის უმაღლესი საბჭო მომავალშიც გააგრძელებს აქტიურ საქმიანობას ყოველი ჩვენგანის უმნიშვნელოვანესი მიზნის, აფხაზეთის დეოკუპაციის მისაღწევად. თქვენ ჩვენი სამშობლოსათვის საჭირო საქმეს ემსახურებით და სწორედ ამიტომ, ისტორიის ამ მომენტში ყველას გვმართებს მოვიქცეთ ფრთხილად. სწორედ ამასთან დაკავშირებით მოგახსენებთ ჩემს პოზიციას თქვენ მიერ წარმოდგენილ კანდიდატთან მიმართებით:
აფხაზეთის ავტონომიური რესპუბლიკის მთავრობის თავმჯდომარის თანამდებობაზე დასანიშნად თანხმობის მისაღებად წარმოდგენილი კანდიდატი ბოლო წლებში, სამწუხაროდ, იქცა აფხაზეთის ოკუპანტ ძალასთან საქართველოს ეროვნული ინტერესების საწინააღმდეგოდ კავშირში მყოფ პოლიტიკური გაერთიანების ერთ-ერთ ლიდერად. ეს ჯგუფი, როგორც ცნობილია, ადანაშაულებს საქართველოს 2008 წლის ომის დაწყებაში და არაერთხელ დააყენა საქართველოს სუვერენიტეტი დარტყმის ქვეშ, ვლადიმერ პუტინთან პირდაპირი თანამშრომლობით 2008 წლის ოკუპაციის შემდეგ. ახლა საქართველოს განსაკუთრებით, დევნილებს აფხაზეთის ლეგიტიმურ ხელისუფლებაში სჭირდებათ არა კოლაბორაციონისტები, არამედ საქართველოს დეოკუპაციისა და დამოუკიდებლობის მყარი დამცველები.
ზემოაღნიშნულის გათვალისწინებით, წარმოდგენილი კანდიდატის აფხაზეთის ავტონომიური რესპუბლიკის მთავრობის თავმჯდომარის თანამდებობაზე დანიშვნაზე თანხმობის მიცემა მიზანშეუწონლად მიმაჩნია.
პატივისცემით
მიხეილ სააკაშვილი #1/7
22.04.2013
