გაუქმდებოდა თუ არა “ობიექტივის” ფუნქციონირება საერთოდ, მედიაკავშირის გამგეობის სხდომის გადაწყვეტილებაზე იყო დამოკიდებული. სხდომის დამთავრების შემდეგ ცნობილი გახდა, რომ გამგეობამ დააკმაყოფილა ინაშვილის განცხადება და ის “ობიექტივს” აღარ უხელმძღვანელებს.
ირმა ინაშვილი “ობიექტივის” ხელმძღვანელის პოსტიდან წასვლის მიზეზებს არ აკონკრეტებს და აცხადებს, რომ მაყურებლის მოთხოვნიდან გამომდინარე, არხი განახლებული მენეჯმენტით, უახლოეს ერთ კვირაში აღდგება.
მედია-კავშირ “ობიექტივის” გამგეობის თქმით, ახალი მენეჯმენტის ფარგლებში შეიცვლება გადაცემების ფორმატი, ასევე შეიცვლება წამყვანთა უმეტესობა, მომზადდება ახალი სატელევიზიო ბადე და “ობიექტივი” მომავალშიც დაიცავს საზოგადოებრივი მაუწყებლის პრინციპს. სიახლეა ისიც, რომ შემუშავდება სატელეფონო ზარების მიღების ახალ ფორმა.
ობიექტივში მიმდინარე მოვლენებზე შეფასებები გააკეთეს გადაცემების ახლანდელმა და ყოფილმა წამყვანებმა.
ბონდო მძინარაშვილი: _ “ობიექტივის” ძალიან ბევრმა გულშემატკივარმა დამირეკა და მომწერა. უღრმესი მადლობა ყველას! აქვე გაცნობებთ, რომ “ობიექტივი” მაუწყებლობას განაახლებს ერთ კვირაში. ამ დროს გამოვიყენებთ მენეჯმენტის გასაუმჯობესებლად და უკეთეს გადაცემებს შევთავაზებთ მაყურებელს. იმედი მაქვს, საეთერო ბადის ცვლილებები საზოგადოების მოწონებას დაიმსახურებს, რადგან მისი შედგენისას ბევრი თქვენგანის მიერ ამ სამი წლის მანძილზე გამოთქმული შენიშვნები იქნება გათვალისწინებული. ჩვენთვის ჩვენი მაყურებლებისა და მსმენელების აზრი უმნიშვნელოვანესია!
ლილი ხურითი: _ ემოციურად მესმის ირმასი. თუმცა საყვედურობენ, მაყურებელზე რატომ არ ფიქრობო. მაყურებელმაც ცოტა თავი უნდა შეიწუხოს და უფრო აქტიურად ჩაერთოს პროცესებში. როდესაც მე განვაცხადე, სოხუმის თეატრში აღარ დავბრუნდები,-მეთქი, ასევე მისაყვედურეს _ ეს როგორ შეიძლება, მაყურებელმა რა დააშავაო. არც მე არ დამიშავებია, მაგრამ გამომაძევეს თეატრიდან, რომელსაც ჩემი ცხოვრების 27 წელი მივუძღვენი. ჩემმა მაყურებელმა ეს “გადაიტანა”, ესე იგი შესაძლებელია, სოხუმის თეატრი იყოს უჩემოდ.
_ თქვენი გადაცემა დარჩება არხზე?
_ წარმოდგენა არა მაქვს, რა იქნება. ახალი სატელევიზიო ბადე მზადდება და გადაცემებიც ახალი ფორმატით გავა. ჯერ დაზუსტებით არაფერი არ ვიცით.
ზაზა სვანაძე: _ ძალიან ვწუხვარ, რომ ირმა ინაშვილმა მედიაკავშირის ხელმძღვანელის პოსტი დატოვა. ამ მედიასაშუალებას ბევრი ტალახი ესროლეს 2012 წლის სექტემბრიდან მოყოლებული, მაგრამ მე არასდროს მიფიქრია, რომ მედიაკავშირი “ობიექტივი” გარე ძალების მიერ მართულია, მით უმეტეს, ყოფილი შინაგან საქმეთა მინისტრის ივანე მერაბიშვილის მიერ. მე მინდა, რომ ამ მედიაკავშირმა განაგრძოს მაუწყებლობა. “ობიექტივი” დღეს როგორც არასდროს, ისეა საჭირო.
