“გურია ნიუსის” რედაქციაში ვან-ზომლეთიდან მოსული რამდენიმე მოქალაქე მიიჩნევს, რომ ჯინჭარაძემ ისინი მოატყუა და სოფლის გამგებლად ძველი ხელისუფლების ფავორიტი კადრი დანიშნა: _ სოფელში რომ მოვიდა, საუბარი ისე დაიწყო, თითქოს არაფერი ხდებოდა. შემდეგ, წარმოგვიდგინა ადამიანი და გადაჭრით განაცხადა, ეს იქნება თქვენი გამგებელიო. გავბრაზდით, რადგან სოფელს “ქართული ოცნების” წევრებიდან 3 კანდიდატურა ჰყავდა, თუმცა, გამგებელმა ეს არაფრად ჩააგდო და წარდგენის შემდეგ, მანქანაში უკანმოუხედავად ჩაჯდა, _ ამბობს ჩვენთან საუბრისას ამირან ქურიძე.
მისივე თქმით, სოფელში დიდი ხანია “ხუხუნაიშვილების კლანი” მოქმედებს, რომლებმაც “ქართულ ოცნებასთან” კოჰაბიტაცია მშვენივრად მოახერხეს: _ ამდენი წელია სოფელში თემურ ხუხუნაიშვილი (სოფლის მაჟორიტარი დეპუტატი. ავტ.) წარმოადგენს “ნაციონალურ მოძრაობას”. ყველაფერს ის აკონტროლებს. გასულ წელს, გზების დაგებაზე ფული იშოვა და სოფელში, თითქმის ყველა ოჯახს, წინასაარჩევნოდ დაურიგა 200-200 ლარი. შესაბამისად, ის ადამიანები იმას გააკეთებენ, რასაც თემური ეტყვის. სწორედ ამის გამოა, რომ ხმას არ იღებენ, _ აღნიშნეს რედაქციაში მოსულმა ვანზომლეთელებმა.
ამირან ქურიძე ამბობს, რომ გამგეობის ადმინისტრაციული სამსახურის ხელმძღვანელი, ნუკრი დუმბაძეც ამ კლანის წევრია: _ ნუკრი დუმბაძე, რომელიც რაიკომის ყოფილი მდივანი იყო, ჩვენთან ერთად იბრძოდა, თუმცა, მას შემდეგ, რაც სამსახური მისცეს, იმათ მხარეზე გადავიდა. წინასაარჩევნოდ, როცა ვეუბნებოდი, რომ ესა თუ ის პიროვნება გადმოვიბიროთ,-თქო, გაეშვიო, მეუბნებოდა. ამის მიზეზი ახლა გავიგე _ თურმე, ისიც “ნაციონალი” ყოფილა, _ ამბობს ქურიძე.
როგორც გვითხრეს, სოფლის გამგებლად, სოფლისთვის უცნობი პიროვნების და თანაც “ნაციონალური მოძრაობის” მხარდამჭერის დანიშვნა ჩოხატაურის ნოტარიუსის, ლია ვადაჭკორიას დამსახურებაცაა: _ ლია ვადაჭკორია 20 წელია სოფელში არჩევნებს ატარებს და ხელისუფლების სასარგებლოდ იგებს კიდეც. სწორედ მისი დამსახურებაა, ამირან დუმბაძის გამგებლად დანიშვნა, რადგან მისი მამიდაშვილია, _ ამბობს ამირან თოხაძე.
რაც შეეხება ვანზომლეთის ახალდანიშნულ რწმუნებულს, ამირან დუმბაძეს, იგი 1961 წლის 13 აგვისტოს, სოფელ ზომლეთში დაიბადა. აქვე დაამთავრა საშუალო სკოლა. შემდგომ სწავლა განაგრძო საქართველოს პოლიტექნიკურ ინსტიტუტში მშენებლის სპეციალობით. მუშაობდა მე-15 სამშენებლო ტრესტში ქალაქ თბილისში. ჰყავს მეუღლე და ორი შვილი.
დუმბაძესთან დაკავშირება ვერ მოვახერხეთ _ მას ტელეფონი ჰქონდა გამორთული. როგორც სოფელში გვითხრეს, კარგი პიროვნებაა და სოფლის საკმაოდ დიდი ნაწილი უჭერს მხარს.
თუმცა, რედაქციაში მოსული ადამიანები, საპირისპიროს ამტკიცებენ და ამბობენ, რომ ამ პროცესებში პოლიტიკური პარტია “ქართული ოცნების” ჩოხატაურის ოფისის ხელმძღვანელი, ირაკლი კუჭავაცაა ჩართული.
როგორც რედაქციაში მოსულებმა განაცხადეს, იმ შემთხვევაში, თუკი სიტუაცია არ შეიცვლება და გამგებელი თავის გადაწყვეტილებას არ შეცვლის, პროტესტის სხვა ფორმებს გამოიყენებენ: _ გამგებელს კარებს ავუჭედავთ და პროტესტის ნიშნად, პარლამენტში ფეხით ჩავალთ. ყველამ უნდა გაიგოს, რომ ჩოხატაურის ახალი ხელმძღვანელობა “ნაციონალებთან” გარიგდა, _ დასძენენ რედაქციაში მოსული “ქართული ოცნების” ვანზომლეთელი აქტივისტები.
ჩოხატაურის მუნიციპალიტეტის გამგებლის მოვალეობის შემსრულებელი, თამაზ ჯინჭარაძე ამბობს, რომ ყველასთან თავის მართლების რეჟიმში ვერ იქნება: _ ვერანაირად ვერ ჩავდგები ყველასთან თავის მართლების რეჟიმში. ძალიან ადვილია, ადამიანს რამე დააბრალო. სიმართლესთან მიახლოება ბევრს უჭირს. ძალიან მალე მოვა ადგილობრივი არჩევნები და ყველას თავის ადგილს მიუჩენს. ხომ არ შეიძლება ერთი სოფლიდან 10 ადამიანს უნდოდეს გამგებლობა და ყველა იძახდეს, სოფელი მე მიჭერს მხარსო? ამიტომ, გაიგოს ყველამ ერთხელ და სამუდამოდ, რომ ახლა საპარლამენტო არჩევნები იყო. რაც შეეხება ნათესაობას, არ ვიცი, ვინ ვისი დეიდაშვილი ან მამიდაშვილია. ჩოხატაურში ყველა ყველას ახლობელია, _ აღნიშნა ჩვენთან საუბრისას ჯინჭარაძემ.
სოფლის მაჟორიტარი დეპუტატი, თემურ ხუხუნაიშვილი ამბობს, რომ თანასოფლელების ბრალდებები უსაფუძვლოა და დასძენს, რომ ამისთვის კანონის წინაშე მოუწევთ პასუხისგება: _ ეს არის ჭორი და მაგის მთქმელი, ცილისწამებისთვის კანონის წინაშე აგებს პასუხს. გზების დაგებასთან არანაირი შეხება არ მქონია და არც ერთი თეთრი არ დამირიგებია წინასაარჩევნოდ. სიმართლე გითხრათ, ვერც ის გავიგე, რა კლანზეა საუბარი. ჩვენ, ჩვეულებრივ, სოფელში ბევრი მხარდამჭერი გვყავს.
_ “ნაციონალურ მოძრაობას” ვანზომლეთში ბევრი მხარდამჭერი ჰყავს?
_ არავითარი “ნაციონალური მოძრაობა” და არავითარი პარტიულობა. გარკვეული წლები გამგებელი ვიყავი, შემდეგ _ დეპუტატი და სოფელში მაქვს ისეთი რაღაც-რაღაცეები გაკეთებული, რომელიც ხალხმა დაინახა და ამიტომაც მიჭერენ მხარს, _ გვითხრა ხუხუნაიშვილმა.
ბრალდებებს კატეგორიულად უარყოფს ირაკლი კუჭავაც, რომლის თქმით, არც ვანზომლეთში და არც სხვა სოფელში მიმდინარე საკადრო ცვლილებებში არ ერევა: _ ჩემი ჩართულობა, არათუ კონკრეტულად ვანზომლეთთან, არამედ საერთოდ არც ერთ სოფელში გახორციელებულ ცვლილებებთან არ არსებობს იმ უბრალო მიზეზის გამო, რომ ჩვენ ვართ პარტიის მშენებლობის პროცესში და ადგილობრივი კადრების შერჩევაზე გავლენას არ და ვერ ვახდენთ კანონის შესაბამისად. აქედან გამომდინარე, ვინმე შეცდომაშია შეყვანილი ან ვიღაც ცრუობს. თუ ვინმეს ჩემთან რაიმეს გარკვევა უნდოდა, მობრძანდებოდნენ ან ჩვენს ოფისში, ან ჩემს სამსახურში, სადაც უფრო ხშირად ვარ, ჯერჯერობით, _ გვითხრა კუჭავამ.
ამ თემაზე კომენტარის გაკეთება არ ისურვა ნუკრი დუმბაძემ, ლია ვადაჭკორიას კი ვერ დავუკავშირდით _ მან ჩვენს სატელეფონო ზარებს არ უპასუხა.
აღსანიშნავია, რომ მსგავსი ბრალდებები ჩოხატაურის ახალი ხელმძღვანელობის მისამართით მხოლოდ ვანზომლეთიდან არ ისმის _ წიფნარში, კოხნარში, შუასურებში და სხვა სოფლებშიც, ადამიანთა გარკვეული ჯგუფი მიიჩნევს, რომ თამაზ ჯინჭარაძე “ნაციონალურ მოძრაობასთან” გარიგებაშია და ამის დასტურად ის მოჰყავთ, რომ პირველი ოქტომბრის არჩევნების შემდეგ, თანამდებობა არ დაუტოვებია “ნაციონალური მოძრაობის” დროინდელ არც ერთ ჩინოვნიკს.
ამის საპასუხოდ თამაზ ჯინჭარაძეს, პრემიერ მინისტრის განცხადება მოაქვს, რომელშიც ბიძინა ივანიშვილი მოუწოდებს ყველას, რომ პოლიტიკური ნიშნით სამსახური არავინ არ უნდა დატოვოს.
