მოსამართლეთა კორპუსის რღვევას კუბლაშვილი წინასაარჩვენო პროცესს უწოდებს

რომლებიც ღიად უჭერენ მხარს იუსტიციის სამინისტროს ინიციატივას სასამართლოს ძირეული რეფორმირების შესახებ. ყველაზე ქმედითმა ჯგუფმა გუშინ განცხადებაც კი გაავრცელა, რომელშიც ნათქვამია:

“მივიჩნევთ, რომ საქართველოს პარლამენტის მიერ მიღებული კანონპროექტი, რომელიც საქართველოს იუსტიციის უმაღლესი საბჭოს მოქმედი შემადგენლობისთვის უფლებამოსილების ვადამდე შეწყვეტის შემდეგ, ამ უმნიშვნელოვანესი ორგანოს დაკომპლექტების გაცილებით დემოკრატიულ წესს ითვალისწინებს, მხოლოდ წაადგება სასამართლო ხელისუფლების რეალურ დამოუკიდებლობას და მოსამართლეთა პროფესიონალიზმის განუხრელი ზრდის პირობებში შექმნის მყარ საფუძვლებს ქვეყნის სტაბილური და სწორი განვითარებისთვის.

გამოვთქვამთ იმედს, რომ საკანონმდებლო ცვლილების შედეგად საქართველოში გახდება შესაძლებელი აღმასრულებელი და საკანონმდებლო ხელისუფლების მხრიდან სასამართლო ხელისუფლებასთან სწორ პრინციპებზე დაფუძნებული ურთიერთობების ტრადიციის საბოლოოდ ჩამოყალიბება”, _ ნათქვამია განცხადებაში, რომელსაც ხელს აწერს 27 მოსამართლე, მათ შორის ისინიც, რომელთა სახელებიც ძალიან ხშირად ისმოდა უსამართლო და პროკურატურასთან გარიგებული მოსამართლის კონტექსტში.

უზენაესი სასამართლოს თავმჯდომარე კოტე კუბლაშვილი მოსამართლეთა გააქტიურებას ბუნებრივ პროცესად მიიჩნევს. ის ამტკიცებს, რომ თვითგადარჩენის ინსტიქტზე მეტად, მოსამართლეების გააქტიურება მომავალ არჩევნებს უკავშირდება.

“ზუსტად ვერ გეტყვით, რაში დასჭირდათ ამ მოსამართლეებს გუშინდელი განცხადების გავრცელება. აშკარაა, ისინი საარჩევნოდ აქტიურობენ. ეს ბუნებრივი პროცესია. ისინი ცდილობენ, ამ აქტივობით წარმატებას მიაღწიონ არჩევნებზე,“ _ აცხადებს უზენაესი სასამართლოს თავმჯდომარე.

მართლმსაჯულების რეფორმასთან დაკავშირებული საკანონმდებლო ცვლილებების ძალაში შესვლიდან ოთხი კვირის ვადაში, მოსამართლეთა კონფერენციამ იუსტიციის უმაღლესი საბჭოს ახალი მოსამართლე წევრები და მდივანი უნდა აირჩიოს. იმავე ვადაში, მოსამართლეთა კონფერენციამ სადისციპლინო კოლეგიის მოსამართლე წევრები და იუსტიციის უმაღლესი სკოლის დამოუკიდებელი საბჭოს თავმჯდომარეც უნდა აირჩიოს.

მოსამართლეები, რომლებმაც უჩვეულო სითამამე გამოიჩინეს და კოლექტიურ განცხადებას მოაწერეს ხელი, პერსონალურად ერიდებიან მედიასთან კომენტარის გაკეთებას. “გურია ნიუსმა” სცადა მოსამართლეებისგან მოესმინა მათ მიერ ამ განცხადების გავრცელების მიზანი და მნიშვნელობა, თუმცა, ყველა მათგანმა კომენტარზე უარი თქვა და ეს განსაკუთრებული ემოციური მდგომარეობით ახსნა.

ამასობაში კი, იუსტიციის მინისტრმა ღია წერილით მიმართა უზენაესი სასამართლოს თავმჯდომარეს და ობიექტური არჩევნების ჩატარება სთხოვა:

“საქართველოს იუსტიციის სამინისტრო, როგორც რეფორმის ავტორი, მოგმართავთ რამდენიმე სახის თხოვნით.

პირველ რიგში, აუცილებლად მიგვაჩნია, თქვენ, როგორც მართლმსაჯულების მესვეურმა და იუსტიციის უმაღლესი საბჭოს თავმჯდომარემ, ხელი შეუწყოთ არასამთავრობო სექტორისა და მედიის წარმომადგენლებს, აქტიურად დააკვირდნენ არჩევნების პროცესს, არა მხოლოდ არჩევნების დღეს, არამედ _ დღეიდანვე.

მეორე საკითხი ინფორმაციის ხელმისაწვდომობას ეხება. ამიტომაც გთხოვთ, საჯარო და ადვილად ხელმისაწვდომი გახადოთ საზოგადოებისათვის მოსამართლეთა კონფერენციის რეგლამენტის ამჟამინდელი რედაქცია და იმ ცვლილებების პროექტი, რომლებიც მასში იქნება შესატანი ახალი კანონიდან გამომდინარე. აგრეთვე, გთხოვთ, გვაცნობოთ:

_ როგორი იქნება კანდიდატების დასახელების ფორმა და წესი;

_ რა საშუალებები ექნებათ კანდიდატებს, მოსამართლეთა კორპუსის შიგნით აწარმოონ თავისუფალი საარჩევნო კამპანია;

_ მიიღებენ თუ არა კენჭისყრაში მონაწილეობას: რეზერვში მყოფი მოსამართლეები, დეკრეტულ შვებულებაში მყოფი მოსამართლეები ან ის მოსამართლეები, რომლებსაც ამოეწურათ უფლებამოსილება, მაგრამ გაგრძლებული აქვთ ის მათ წარმოებაში არსებული საქმეების განხილვის ვადით;

_ როგორი იქნება კონფერენციაში მონაწილეთა რეგისტრაციის პროცესი;

_ როგორი იქნება საარჩევნო კომისიის შემადგენლობა და მისი დაკომპლექტების წესი; ხომ არ გეგმავთ მასში არასამთავრობო სექტორის წარმომადგენლების ჩართვას;

_ როგორი იქნება კენჭისყრის წესები;

_ როგორი იქნება საარჩევნო ყუთი;

_ როგორი იქნება საარჩევნო ბიულეტენი: მასზე დაბეჭდილი იქნება თითო კანდიდატის ვინაობა, თუ კანდიდატების სია;

_ როგორი იქნება ხმის დათვლის პროცედურა;

_ ნებისმიერი სხვა ინფორმაცია, რომელიც საარჩევნო პროცედურას ეხება და თქვენ თვლით, რომ საზოგადოება ან რეფორმის ავტორი უწყება მას უნდა ფლობდეს.

და ბოლოს, გთხოვთ აგრეთვე გვაცნობოთ, ხომ არ მიმდინარეობდა ან მიმდინარეობს მოსამართლეთა რიცხვის ზრდა რეფორმის შესახებ კანონპროექტის პარლამენტში შესვლის მომენტიდან და თუ მიმდინარეობდა ან მიმდინარეობს, რა მიზეზით.

მადლობას გიხდით სასამართლოს დამოუკიდებლობის მიღწევისა და მართლმსაჯულების რეფორმის მხარდაჭერისათვის და მზაობას გამოვთქვამ ამ საქმეში დახმარებისათვის”, _ ნათქვამია იუსტიციის მინისტრის წერილში. თეა წულუკიანმა მოსამართლეებს აქტიურობისა და საკუთარი კანდიდატურების წამოყენებისკენ მოუწოდა.

კოტე კუბლაშვილი იუსტიციის მინისტრ თეა წულუკიანის მიერ გავრცელებულ ღია წერილი მხრიდან სასამართლო ხელისუფლებაში ჩარევის მცდელობად შეაფასა: “მოსამართლეებს არავის შეგულიანება არ სჭირდებათ, რომ არჩევნები ჩაატარონ, განსაკუთრებით _ იუსტიციის მინისტრის. ეს არავის განსახილველი საკითხი არ არის, რომ მოუწოდონ, წამოაყენონ კანდიდატურები. ახლა თუ ვინმე კანდიდატურას წამოაყენებს, ამის უფლება აქვს, მაგრამ ეს არაფერს ნიშნავს, თუ კონფერენციაზე არ წამოაყენა თავისი კანდიდატურა, მხოლოდ მაშინ შეიძლება ჩაითვალოს ოფიციალურ კანდიდატურად, შემდეგ შევა საარჩევნო ბიულეტენში და ეყრება კენჭი. ამიტომ ასეთი განცხადებები, ერთი კუთხით ვიღაცამ შეიძლება დაინახოს კონფერენციის მხარდაჭერად, თუმცა, ჩემი აზრით, საჯარო პოლიტიკური პირების მხრიდან ასეთი განცხადებები არის კიდევ ერთი ნაბიჯი ჩარევისა, რათა მოსამართლეებს რაღაც უთხრან. არავის სჭირდება ამის შეხსენება. მოსამართლეებს ხშირად გაუმართავთ კონფერენცია და არჩევნები, ახლაც ყველაფერი იქნება ღიად და გამჭვირვალედ”, _ განაცხადა კონსტანტინე კუბლაშვილმა.

დღესვე მოსამართლეთა კონფერენციის ადმინისტრაციული კომიტეტის პირველი სამუშაო შეხვედრა ჩატადა , სადაც დამტკიცდა მოსამართლეთა კონფერენციის ადმინისტრაციული კომიტეტის სამდივნო. კუბლაშვილის განმარტებით, სამდივნო განახორციელებს მოსამზადებელ სამუშაოებს კონფერენციის ჩასატარებლად. ადმინისტრაციული კომიტეტის სხდომაზე, მისი თქმით, იმსჯელებს იმ საკითხებზე, რომელიც მომავალი რამდენიმე კვირის განმავლობაში იქნება გადასაწყვეტი.

უზენაესი სასამართლოს თავმჯდომარის თქმით, ყველაზე მთავარი, რაზეც დღეს მოხდა შეთანხმება, იუსტიციის უმაღლესი საბჭოს არჩევნები ღიად და გამჭვირვალედ უნდა ჩატარდეს.

“ჩვენთვის მთავარია, ავირჩიოთ იუსტიციის საბჭოს შემადგენლობა. ავირჩიოთ არა ხელოვნურად წამოყენებული ინიციატივებით, არამედ სუფთად და თავად მოსამართლეთა მიერ დაყენებული კანდიდატურებით და ამ ყველაფერმა ჩაიაროს გარეგანი ჩარევების გარეშე”, – განაცხადა კონსტანტინე კუბლაშვილმა.

როგორც უზენაესი სასამართლოს თავმჯდომარემ “გურია ნიუსთან” განაცხადა გუშინდელი განცხადების ავტორი 27 მოსამართლე წინასაარჩევნოდ გააქტიურებული ერთადერთი ჯგუფი არ არის. მისი თქმით მსგავსი ჯგუფები სხვა სასამართლოებშიც შეიქმნა.