მაშინ ერთობ მოულოდნელი იყო პარტიულ ღონისძიებაზე სარაიონო კულტურის ცენტრის რეჟისორის გია ქურიძის გამოჩენა, თუმცა, მისი ჟურნალისტური წარსულის გათვალისწინებით მივიჩნიეთ, რომ რომელიმე გამოცემისთვის მასალას ამზადებდა. მაგრამ, როცა მეორე დღესაც იგი პარტიის შტაბში ვნახეთ, დავინტერესდით, რა აკავშირებდა ქურიძეს პარტიასთან. აღმოჩნდა, რომ იგი “ქართული პარტიის” ლანჩხუთის ორგანიზაციის საინიციატივო ჯგუფის წევრია.
_ დიახ, პოლიტიკაში გადავწყვიტე აქტიურად ჩართვა, _ გვითხრა მან.
_ ბატონო გია, სურვილი გასაგებია, მაგრამ თქვენ ხომ სახელმწიფო სამსახურში ხართ? ფიქრობთ, რომ იქ პრობლემას არ შეგიქმნიან?
_ იყო საუბრები, რომ განცხადება დავწერო, ამის გაკეთებას კი ნამდვილად არ ვაპირებ. ვნახოთ, რა საფუძველს დამიდებენ გასათავისუფლებლად. კულტურის ცენტრში რეჟისორი ვარ და დროში ნამდვილად არ შემზღუდავს პარტია.
მოგვიანებით, გია ქურიძე დაგვიკავშირდა და გვითხრა, რომ განცხადების დაწერას აღარ თხოვენ და კულტურის ცენტრშიც რჩება.
ჩვენ ამ თემაზე სასაუბროდ “ქართული პარტიის” ადგილობრივი ოფისის ერთ-ერთ ხელმძღვანელს ეკა ალექსაიას დავუკავშირდით. მასთან ისიც გვაინტერესებდა, რატომ დაუთმო ადგილობრივი ოფისის ხელმძღვანელობა მერაბ ქარჩავას და თავად ჩრდილში გადასვლა რა მიზეზით ამჯობინა:
_ ქალბატონო ეკა, ერთობ დამაინტრიგებელი გადაწყვეტილებაა გია ქურიძის თქვენს პარტიაში მოხვედრა. ამასთან, ხელისუფლების გამოწვევაც _ ფაქტობრივად, ცხვირწინ ააცალეთ კადრი.
_ (გაეცინა) ჩვენ ხელისუფლებას კიდევ მრავალ სიურპრიზს ვპირდებით. გიას თავად გაუჩნდა სურვილი, რომ ჩვენს პარტიასთან ეთანამშრომლა. ერთ საიდუმლოს გაგიმხელთ _ გიას პარტიაში მოყვანაზე თვით გია გაჩეჩილაძე გვესაუბრა. ეროსის რომ ჰგავს, ის კაცი, გამიხარდება, ჩვენთან თუ იქნებაო. დაველაპარაკეთ და გიაც დაგვთანხმდა.
_ საიდან იცოდა “უცნობმა” გია ქურიძის შესახებ?
_ როცა ლანჩხუთში იყო ჩამოსული, კულტურის ცენტრში შეშვებაზე პრობლემა შეგვექმნა. მაშინ მოეწონა გიას საუბარი და იქედან ახსოვდა.
_ საინტერესოა, როგორც გახდა მერაბ ქარჩავა თქვენი ორგანიზაციის თავმჯდომარე?
_ ჯერ თავმჯდომარე არ არის. საინიციატივო ჯგუფმა უნდა აირჩიოს, მაგრამ წინადადება ჩემი იყო.
_ თქვენ პარტიასთან თანამშრომლობდა?
_ არა, მაგრამ ჩვენი პარტია ახალჩამოყალიბებულია რაიონში. მე მის კანდიდატურას დავუჭირე მხარი.
ეს წერილი უკვე მზად იყო, როცა შევიტყვეთ, რომ “ქართული პარტიის” ლანჩხუთის საინიციატივო ჯგუფის წევრმა სარაიონო კულტურის ცენტრის რეჟისორის თანამდებობა დატოვა. ეს ინფორმაცია პარტიის ადგილობრივ ოფისშიც დაგვიდასტურეს: _ ლანჩხუთში პოლიტიკური ნიშნით რეპრესიები დაიწყო _ განსხვავებული შეხედულებების მქონე ადამიანებს განცხადების დაწერას აიძულებენ. გიას შემთხვევაში, ეს იყო თხოვნა, თუ არ გადადგებოდა, მის ხელმძღვანელს მოხსნიდნენ. ლანჩხუთის ერთ-ერთ ხელმძღვანელ პირს უთქვამს, მაგან ოპოზიციის დროშები აფრიალოს და მე ბიუჯეტის ფულიდან ხელფასი გადავუხადოო? ასე ცდილობენ ნაციონალები აკრძალული ხერხებით პოლიტიკური ოპონენტების ჩამოშორებას. რა თქმა უნდა, ამ ამბავს ასე არ დავტოვებთ, _ გვითხრა ეკა ალექსაიამ.
ჩვენ გია ქურიძის აწ უკვე ყოფილ ხელმძღვანელს, კულტურის ცენტრის დირექტორს სოფო ჭელიძესაც დავუკავშირდით. მისი თქმით, ქურიძემ თავად დაწერა განცხადება და მისთვის არავის არაფერი დაუძალებია.
