გასულ კვირას, გურიას საქართველოს შრომის, ჯანმრთელობის დაცვისა და სოციალური უზრუნველყოფის მინისტრი ანდრია ურუშაძე სტუმრობდა. იმ ფონზე, რომ ბოლო დროს რეგიონში მინისტრების “ცვენაა”, ქვეყნის “მთავარი ექიმის” ვიზიტი გამორჩეული არც იმით იყო, ოზურგეთიდან ლანჩხუთში ჩამოსვლა დაგეგმილზე 3 საათზე მეტი დროით რომ დააგვიანა. წინა დღეებში, ნიკოლაიშვილის მომლოდინე მეეზოვეებს მოუხდათ 6-საათიანი ყურყუტი იმის გამო, რომ ადგილობრივმა ხელისუფლებამ დასუფთავების სამსახურის თანამშრომლებს ვიზიტის მიახლოებითი დროც კი არ გააგებინა. ამჯერად კი, ურუშაძეს “დღის ცენტრის” ის მოზარდები ელოდებოდნენ, რომლებიც მზრუნველობამოკლებულთა კატეგორიას განეკუთვნებიან. სწორედ ეს ბავშვები ალოდინა ურუშაძემ მთელი 3 საათის მანძილზე, თუმცა, როგორც ჩვენი წყარო ამბობს, მინისტრს დაგვიანების ობიექტური მიზეზი ჰქონია _ იგი ოზურგეთში, სადაზღვევო კომპანია “ალფას” მშენებარე საავადმყოფოს დათვალიერებისას დამტვრეულა. მართალია, თვითმხილველებს კომენტარები არ გაუკეთებიათ, თუმცა ინფორმაციამ მაინც გამოჟონა _ ურუშაძეს, თურმე ფეხი დაუცდა და სამშენებლო ნარჩენებზე დაეცა. მისი, თუნდაც სამსაათიანი დაგვიანების შემდეგ, ლანჩხუთში ჩამოსვლა იმაზე მიანიშნებს, რომ მინისტრი შედარებით იოლად გადარჩა. ერთ-ერთი ვერსიით, მინისტრს ხელი გურიის გუბერნატორმა და მუშებმა შეაშველეს. სამწუხაროდ, ვერ გავარკვიეთ _ მშენებლობაზე უსაფრთხოების ნორმები არ იყო დაცული თუ მინისტრმა შეაბიჯა იქ, სადაც შესვლა არ შეიძლებოდა.
სხვათა შორის, ეს პირველი შემთხვევა არ არის, როცა საავადმყოფოში სტუმრად მოსული მინისტრები გურიაში ასეთ სიტუაციაში ვარდებიან _ ჯერ კიდევ ვარდების რევოლუციამდე, ლანჩხუთის გარემონტებულ საავადმყოფოს მაშინდელი პრემიერი ავთანდილ ჯორბენაძე სტუმრობდა. მას მოახსენეს, რომ კარზე დაბნეული საკეტები მოიპარეს და ამიტომაც იყო პალატები საკეტის გარეშე. ჯორბენაძემ კბილებში გამოსცრა: _ კი, მაგრამ კარებზე საკეტის ჭრილები გაკეთებული არ არის და მიწებებული გქონდათო? ანერვიულებულმა მინისტრმა ცუდად დაგებულ იატაკზე ფეხი წამოიკრა და ხელები რომ არ შეეშველებინა, ქვის იატაკს სახით დაენარცხებოდა.
აი, რას ამბობს ჯანდაცვის მინისტრის დამტვრევის შესახებ სამინისტროს პრეს-შეფი სოფო გვალია:
_ ქალბატონო სოფო, გვაქვს ინფორმაცია, რომ ოზურგეთში, მშენებარე საავადმყოფოს დათვალიერებისას, მინისტრი დაიმტვრა. რაიმე ტრავმა ხომ არ მიუღია?
_ (გაეცინა) თქვენ შეგეძლოთ გენახათ ტელევიზიით _ მეორე დღეს ხობში იმყოფებოდა პრეზიდენტთან ერთად. ასე რომ, რამე რომ მოსვლოდა…
_ ოზურგეთში საერთოდ არაფერი შემთხვევია?
_ არა, პირველად მესმის. არაფერი მოსვლია მინისტრს.
ჩვენ გურიის გუბერნატორ ვალერი ჩიტაიშვილსაც დავუკავშირდით:
_ ბატონო ვალერი, ოზურგეთის მშენებარე საავადმყოფოს დათვალიერებისას მინისტრი ანდრია ურუშაძე დამტვრეულა…
_ (მაწყვეტინებს) მე არ მაქვს ეგ ინფორმაცია!
_ ჩვენ კი გვითხრეს, რომ თქვენ ხელიც შეაშველეთ, თორემ მაგრად დაიმტვრეოდაო…
_ არ მაქვს ეგ ინფორმაცია!
