“საჯარო მოხელეები სოციალურად დაუცველთა ხარჯზე ფუფუნებაში ცხოვრობენ”

“სოციალურად დაუცველების დახმარებების ეკონომიის ხარჯზე, საჯარო მოხელეების ხელფასები და ხარჯები მატულობს”, _ ეს განცხადება ოზურგეთის მუნიციპალიტეტის საკრებულოს წევრმა ლელა ნაცვალაძემ გუშინწინ, საკრებულოს რიგგარეშე სხდომაზე, ოზურგეთის მუნიციპალიტეტის საფინანსო-საბიუჯეტო სამსახურის უფროსის ლია ქათამიძის სიტყვით გამოსვლის შემდეგ გააკეთა.
დღის წესრიგით გათვალისწინებული ოთხი საკითხის განხილვა ლია ქათამიძის გამოსვლით დაიწყო. მან ოზურგეთის მუნიციპალიტეტის საკრებულოს 2009 წლის 28 დეკემბრის “2010 წლის ბიუჯეტის დამტკიცების შესახებ”  #46 დადგენილებაში ცვლილებებისა და დამატებების შეტანის შესახებ ისაუბრა.
ქათამიძის თქმით, 2010 წლის 7 დეკემბრის მდგომარეობით, 2010 წლის ბიუჯეტის საშემოსავლო ნაწილი 103.8%-ით არის შესრულებული. მათ შორის, საწარმოთა ქონების გადასახადი შესრულებულია წლიური გეგმის 108%-ით, სასოფლო-სამეურნეო დანიშნულების მიწაზე ქონების გადასახადი _ 117.7%-ით, შემოსავალი საგზაო მოძრაობის წესების დარღვევისთვის _ 159.2%-ით(?!). ეს იძლევა საშუალებას, წლის ბოლომდე, ბიუჯეტში დამატებით მობილიზებული იქნას შესაბამისად, საწარმოთა ქონების გადასახადი _ 138 000 ლარი; სასოფლო-სამეურნეო დანიშნულების მიწაზე ქონების გადასახადი _ 21 000 ლარი, არასასოფლო-სამეურნეო დანიშნულების მიწაზე ქონების გადასახადი _ 115 000 ლარი, შემოსავალი საგზაო მოძრაობის წესების დარღვევისთვის _ 46 000 ლარი. სულ დამატებით მიღებული შემოსავალი 320 000 ლარს შეადგენს. 
მიღებული შემოსავლებიდან, სოციალური და ჯანდაცვის პროგრამები 41 200 ლარით დაფინანსდა; სპორტული და კულტურული ღონისძიებები _ 153 700 ლარით, წარმომადგენლობითი და აღმასრულებელი ორგანოები _ 12 100 ლარით. ამას ემატება ადმინისტრაციული სამსახურის, საფინანსო-საბიუჯეტო სამსახურის, არქიტექტურისა და ურბანული დაგეგმარების სამსახურის, სოფლის რწმუნებულების ხელფასები, ისევე, როგორც სპორტის ცენტრის ადმინისტრაციის ნოემბერ-დეკემბრის ხელფასი _ 17 360 ლარი.
ნაცვალაძეს შენიშვნები სწორედ ამ ცვლილებების მოსმენის შემდეგ გაუჩნდა: _ თექვსმეტზე მეტი შეჭირვებული არ გვყავს, თუ იმ ადამიანების განცხადებებს არაფრად აგდებთ, წლის დასაწყისში რომ მოგმართათ და დღემდე არანაირი დახმარება არ გასწევიათ? როგორ აირჩიეთ მხოლოდ სამი ონკოლოგიურად დაავადებული მაშინ, როცა ახლავე ჩამოგითვლით ათი ონკოლოგიურად დაავადებულის სახელსა და გვარს? ხელფასები ასეთი შეჭირვებული ადამიანების ხარჯზე იზრდება, მთელი წლის განმავლობაში არ არის განსაზღვრული სახელფასო ფონდი და მეთორმეტე თვეში ითხოვენ დაფინანსებას. რაც შეეხება იური სიხარულიძისადმი მიძღვნილ ღონისძიებას, ნისიად ჩაატარეთ? _ შეეკითხა ნაცვალაძე საფინანსო-საბიუჯეტო სამსახურის უფროსს, რომელმაც დაუდასტურა, რომ აღნიშნული ღონისძიება ნისიად ჩაატარეს:   _ კი, ასე გამოდის, _ თქვა ქათამიძემ.
_ 153 ათასი ლარი სპორტულ ღონისძიებებზე გამოიყო, სოციალურ დახმარებებზე კი _ მინიმალური, მაშინ, როცა ახალი წელი მოდის და ხალხს ლუკმაპური არ აქვს, _ გააგრძელა ნაცვალაძემ.
საკრებულოს თავმჯდომარემ ალეკო მამეშვილმა აღნიშნა, რომ ძალიან ხშირად უწევთ ცვლილებების შეტანა ბიუჯეტში: _ ამიტომ უნდა ვიმუშაოთ ინტენსიურად 2011 წლის ბიუჯეტზე, რათა სწორად დაიგეგმოს. დეკემბერში რომ საუბრობთ ხელფასის დაფინანსებაზე, უხერხულია.
მამეშვილის განცხადებას ისევ ლელა ნაცვალაძე გამოეხმაურა და დასძინა, რომ ეს ის ადამიანები არიან, რომლებიც “ვიღაც-ვიღაცეების მეშვეობით ჩასახლდნენ ამა თუ იმ ორგანიზაციაში, რამაც ხელფასების ზრდის აუცილებლობა გამოიწვია”.
ამ მოსაზრებას საკრებულოს თავმჯდომარის მოთხოვნა მოჰყვა: _ მე ვთხოვ გამგეობას, დღის ბოლომდე მომაწოდოს თითოეული სამსახურის თუ ორგანიზაციის 2010 წლის დასაწყისში დასახული გეგმა, რათა გავარკვიოთ, რა მოხდა ამ შემთხვევაში.
ნაცვალაძე: _ ჟურნალისტებიც ჩაასახლეს აიპ-ებსა თუ სხვადასხვა ორგანიზაციებში. რომელი გაჭირვებული დაასაქმეთ?
ამ რეპლიკას მელექედურის მაჟორიტარი დეპუტატი ავთო ხინთიბიძე გამოეხმაურა და ქათამიძეს შეეკითხა, რისთვის გამოეყო ლიხაურის სპორტსკოლას 3 100 ლარი და იკითხა: _ ესეც ხელფასებია?
_ დიახ, _ უპასუხა ქალბატონმა ლიამ.
ალეკო მამეშვილმა  დეპუტატებს თხოვა, შენიშვნები გამოეთქვათ, რისი სურვილიც სოფელ ოზურგეთის მაჟორიტარმა დეპუტატმა გია ხუჭუამ გამოთქვა. მამეშვილმა მას განუმარტა, რომ თუ მას შენიშვნები მუხლობრივად ჰქონდა, კომისიებში განეხილა.
“აბა, რას ნიშნავდა, როცა თქვით, შენიშვნები თუ გაქვთ, განაცხადეთო? ჩემთვის გაუგებარია თქვენი ნათქვამი”, _ უპასუხა საკრებულოს თავმჯდომარეს ხუჭუამ და სხდომა დატოვა.
ოზურგეთის მუნიციპალიტეტის საკრებულოს 2011 წლის ბიუჯეტის დამტკიცების შესახებ დადგენილების მისაღებად ადმინისტრაციული წარმოების დაწყებას დეპუტატების უმრავლესობამ მხარი დაუჭირა.
_ გამოვიყენოთ ყველა რესურსი იმისთვის, რომ მაქსიმალურად ჩაერთოს ყველა დაინტერესებული მხარე 2011 წლის ბიუჯეტის ფორმირებაში, რომელსაც სავარაუდოდ, 25 დეკემბერს დავამტკიცებთ, _ მოწოდება გააკეთა მამეშვილმა.
_ 25 დეკემბერს ვერ დავამტკიცებთ 2011 წლის ბიუჯეტს, ოცდღიანი ვადა გვაქვს ადმინისტრაციული წარმოების დაწყების დღიდან, _ თქვა სხდომაზე საკრებულოს საორგანიზაციო სამსახურის ხელმძღვანელმა გივი ყაზაიშვილმა, რომელსაც საკრებულოს თავმჯდომარის მოადგილე ავთანდილ მექვაბიშვილი შეეპასუხა, არ ინერვიულოთ, კანონს არ დავარღვევთო.
_ არც დაგირღვევიათ, _ მიაყოლა რეპლიკა ნაცვალაძემ მექვაბიშვილის გამონათქვამს.
რეპლიკებისა და განცხადებების გაკეთების გარეშე ჩაიარა მესამე და მეოთხე საკითხების განხილვამ. ოზურგეთის მუნიციპალიტეტის გამგეობის 2010 წლის სახელმწიფო შესყიდვების გეგმაში ცვლილებები და დამატებები შეიტანეს ზამთრის სეზონის დადგომასთან დაკავშირებით გასატარებელი ღონისძიებების შესახებ. ოზურგეთის მუნიციპალიტეტის საკრებულოს განკარგულების დამტკიცების შესახებ კი ავთანდილ მექვაბიშვილმა ისაუბრა.
ამის შემდეგ, საკრებულოს წევრებმა შპს “საქართველოს გაერთიანებული წყალმომარაგების” კომპანიის ოზურგეთის სერვისცენტრის ხელმძღვანელს იასონ ცინცაძეს მოუსმინეს, რომელიც საკრებულოში დეპუტატების მოთხოვნის შემდეგ მოვიდა.
საკრებულოს თავმჯდომარის თქმით, რიგგარეშე სხდომის ჩატარება აღნიშნულმა საკითხებმა გამოიწვია: _ 23 დეპუტატი ესწრება სხდომას. ამოიღეთ იმ დეპუტატების სია, რომლებიც სხდომებზე არ დადიან. უხერხულია, ამ პერიოდში, ამ სიტუაციაში ელემენტარულად, ქვორუმზე გვიწევდეს საუბარი, _ თქვა თავმჯდომარემ.
აღსანიშნავია, რომ ბიუჯეტში ცვლილება ბოლო სამი თვის განმავლობაში უკვე მეოთხედ გახორციელდა.
საკრებულოს წევრი თემურ სალუქვაძე “გურია ნიუსთან” საუბარში ამბობს, რომ ბიუჯეტის ფორმირება ისეთ სამუშაო რეჟიმში უნდა მიმდინარეობდეს, რომ ასეთი საკითხები არ უნდა წარმოიშვას: _ გარკვეული ცვლილებები, შესაძლოა, გახორციელდეს ბიუჯეტში, მაგრამ ამდენი ცვილილება? ეს იმას ადასტურებს, რომ თავის დროზე, 2010 წლის ბიუჯეტი არასწორად და არაკვალიფიციურად იქნა შედგენილი.
“ის, რომ ბიუჯეტი არასწორად დაიგეგმა, ამას დღევანდელი სხდომაც ცხადჰყოფს. თითქმის ყველა ორგანიზაციაში შექმნეს საზოგადოებასთან ურთიერთობის სამსახურები, ზოგთან ანგარიშვალდებულები არიან, ზოგსაც არჩევნების დროს შეპირდნენ. ეს ადამიანები, სოციალურად დაუცველთა ხარჯზე, ფუფუნებაში ცხოვრობენ. გამგეობა იმ ორგანიზაციებს აფინანსებს, საიდანაც ფულს ათეთრებს. ამას ვამბობ და დავამტკიცებ კიდეც!” _ გვითხრა სხდომის დასასრულს ლელა ნაცვალაძემ.