“ნურავის ჰგონია, რომ გარდავიცვალეთ”

ბოლო დროს, საქართველოს მედიასაშუალებებით საკმაოდ ხმაურიანი განცხადებები კეთდება “მოძრაობა სამართლიანი
საქართველოსთვის” ლიდერის ზურაბ ნოღაიდელის პარტიის რიგებიდან გადაყენებისა და გარიცხვის შესახებ, რასაც კატეგორიულად უარყოფს ამავე პარტიის ოზურგეთის რაიონული ორგანიზაციის თავმჯდომარე ლელა ნაცვალაძე,  უფრო მეტიც, მისი საუბრის ტონი და ლოგიკა იმდენად შეუვალია, თითქოს ნოღაიდელის ცხვირწინ ბუზიც არ აფრენილიყოს.
“გურია ნიუსი” ქალბატონ ლელას ინტერვიუს ჩასაწერად ესტუმრა, რაზეც იგი სიამოვნებით დაგვთანხმდა და გაკვირვებითაც გვკითხა, აქამდე რატომ არ გაგახსენდით,  ჩვენს პოლიტიკურ მოძრაობას ხომ მერაბიშვილის “დაგეგმილი” კრებით ებრძვიანო.
_ ხელისუფლება ყოველთვის ცდილობს, გზიდან ჩამოიშოროს ის პოლიტიკური პარტია, რომელიც დისკომფორტს უქმნის, ამიტომ სამთავრობო კაბინეტებში იწერება სცენარები და შემდეგ ეძებენ ადამიანებს, ვინც იკისრებს ამ სცენარის მიხედვით სპექტაკლის დადგმას.
აღნიშნული ყრილობა დაიგეგმა მერაბიშვილის ერთ-ერთი სცენარით, რომელშიც გამოიყენეს საკმაოდ უნიჭო და უვიცი, მაგრამ ზედმეტად ამბიციური ადამიანები. მათ დაარღვიეს პარტიის წესდება და კანონი პოლიტიკური პარტიების შესახებ. აღნიშნულ საქმეში ხელისუფლებამ ზოგი მონაწილე დააშინა, ზოგს ფული გადაიხადა, ზოგს პირველობის ამბიცია გაუღვიძა, მაგრამ მთავარი, რასაც გეგმავდა, ვერ გააკეთა.
_ იმ ყრილობაზე მერაბიშვილი ძალით ვის მიიყვანდა?
_ დარბაზში მჯდომი დელეგატებიდან, უმეტესობა ჩვენი მოძრაობის მხარდამჭერიც არ ყოფილა, რომ არაფერი ვთქვათ, პარტიის წევრობაზე.
_ თქვენ თუ იყავით იქ მიწვეული?
_ ვერც გამიბედავდნენ, მე ჯერ კიდევ აგვისტოს თვეში გავიგე მათი ავი ზრახვებისა და “საქმენი საგმირონის” შესახებ. “მოძრაობა სამართლიანი საქართველოსთვის” გურიისა და აჭარის ორგანიზაციების დაფუძნებით ჩამოყალიბდა. ოზურგეთი საუკეთესოთა  ჩამონათვალში პირველი გახლდათ, ჩვენი რაიონის გარდა, 44 რაიონულ ორგანიზაციას არ ჰქონია მიწვევა, ესე იგი, ვინ არიან ესენი?
_ თქვენ უარყოფთ, რომ ნოღაიდელის პარტიას აქვს სახელფასო დავალიანება იმ ადამიანებისა, ვინც არჩევნების პერიოდში ამუშავა?
_ ოპოზიციური პარტიები, ხელისუფლებისგან განსხვავებით, შეზღუდულები არიან ფინანსურად. თანხებზე და დავალიანებებზე საუბარი პარტიის შიგა სამზარეულოა და ამაზე მხოლოდ ერთის თქმა შემიძლია: ჩვენმა ყველა წევრმა და თანამშრომელმა კარგად იცის, რომ საკუთარი შრომა, როგორც წარსულში, ისე მომავალშიც, დაუფასდება.
_ ნოღაიდელის რუსეთში ხშირ ვიზიტებს როგორ აფასებთ? სად არის ახლა იგი და რას აკეთებს?
_ ზურაბ ნოღაიდელი არ არის მოღალატე _ იგი აქტიურ კონსულტაციებს ეწევა საზღვრებს გარეთ, ხვდება, როგორც პოლიტიკოსებს, ისე ქართული სათვისტომოს  წარმომადგენლებს. შემდეგ რაიონული ორგანიზაციების წევრებს ესაუბრება ამ შეხვედრებისა და მომავალი გეგმების შესახებ.
_ რა ვითარებაა ამჟამად ყრილობის ჩამტარებელ მოძრაობაში?
_ იუსტიციის სამინისტროში შეიტანეს წერილი პარტიის რეგისტრაციის შესახებ, რომლის ხელმძღვანელად სხვა მოიაზრება განახლებული გამგეობითურთ.  ელოდებიან პასუხს, მაგრამ ჩვენც შევიტანეთ იმავე უწყებაში წერილი, სადაც კონკრეტული ფაქტებით ვადასტურებთ მათი ქმედების უკანონობას.
_ თქვენთან, ვინც ნოღაიდელთან დარჩა, რა ხდება?
_ მე გავიმეორებ ზურას სიტყვებს: ვაგრძელებთ ბრძოლას სააკაშვილის რეჟიმის წინააღმდეგ, მაგრამ ბრძოლა იქნება მხოლოდ მოგებაზე ორიენტირებული.
_ ასე ადრეც ამბობდა, მაგრამ რა მოიგო?
_ ბრძოლა გრძელდება, როგორც გითხარით, ჩვენი მოძრაობა 44 რაიონული ორგანიზაციისგან შედგება, 32 რაიონში გვყავს საკრებულოს წევრი, თითოეული ყოველ შეხვედრაზე ანგარიშს ვაბარებთ მოძრაობის ლიდერს. ბოლო ჩვენი შეხვედრა ბიუჯეტთან დაკავშირებით მოხდა.
_ განსაკუთრებული სამომავლო გეგმა თუ გაქვთ?
_ თებერვლის დასაწყისიდან გავაქტიურდებით, შევხვდებით პირველად ორგანიზაციებს, პირადად მე ძალიან კარგი რესურსი მყავს.