“მერცხალს” ახალი სტადიონი ახალი სეზონისთვის ექნება!”

(გურია ნიუსი, ლანჩხუთი) _ ჩვენი გაზეთის წინა ნომერში ვწერდით იმის შესახებ, რომ ოზურგეთში, სტადიონის რეკონსტრუქცია იგეგმება. პუბლიკაციის გამოქვეყნებიდან მალევე, სამშაბათს საღამოს, ზვიად სიჭინავას განმარტება ფეხბურთის ფედერაციის ოფიციალურმა ვებსაიტმა სასწრაფოდ გაავრცელა. ამ ინტერვიუში აშკარად ჩანს, რომ ქართული ფეხბურთის მესაჭეს ჩვენ დავანახეთ განმარტება-კომენტარის გაკეთების აუცილებლობა გურიაში სტადიონების მშენებლობასთან დაკავშირებით: _ მუშაობა მიმდინარეობს ოზურგეთის ცენტრალური სტადიონის პროექტზე. კვირის ბოლოსათვის ხელთ გვექნება სარეაბილიტაციო სამუშაოების სრული ხარჯთაღრიცხვა და რეკონსტრუქციის პროექტი. საპრეზიდენტო არჩევნების დროს, განვაცხადე, რომ ჩემს ერთ-ერთ პრიორიტეტად საქართველოში ფეხბურთის განვითარებისათვის, ინფრასტრუქტურის შექმნა მიმაჩნდა, რაც მომავალი ოთხი წლის მანძილზე ჩემი მიზანია. დასავლეთ საქართველოში დიდია ფეხბურთის მიმართ ინტერესი. იმერეთის რეგიონში კეთდება და უახლოეს მომავალში დასრულდება ზესტაფონის საფეხბურთო კლუბის ბაზა და სტადიონი. ამავე რეგიონში შარშან სრული რეკონსტრუქცია ჩაუტარდა ქუთაისის “ტორპედოს” სტადიონს. კომპანია “ვისოლის” ინიციატივით კი, მიმდინარეობს “ტორპედოს” ბაზის რეკონსტრუქცია. რაც შეეხება სამეგრელოს, იქ  ზუგდიდის შესანიშნავი ბაზა ფუნქციონირებს, რომელიც ამ რეგიონისა და მთლიანად საქართველოსათვის ძალიან მნიშვნელოვანი ობიექტია. სამწუხაროდ, გურია იმ რეგიონთა შორის აღმოჩნდა, სადაც საფეხბურთო ინფრასტრუქტურის მხრივ ვითარება სავალალოა _ არც ერთ რაიონში არ არსებობს გამართული საფეხბურთო სტადიონი. რაც შეეხება შიდა რეგიონალურ არჩევანს. ჩვენი მიზანი იყო, ყურადღება შეგვეჩერებინა ისეთ სპორტულ ობიექტზე, რომლის სრულ რეკონსტრუქციასაც ჩვენი ბიუჯეტით შევძლებდით. ოზურგეთის სტადიონზე დაგეგმილია ტრიბუნების სრულიად განახლება, კვების ბლოკის, საცხოვრებელი კორპუსის, დახურული დარბაზის, გასახდელების, სამედიცინო პუნქტისა და სველი წერტილების მოწესრიგება. რეკონსტრუქციის დასრულების შემდგომ, ოზურგეთის სტადიონი 3 000-მდე მაყურებელს დაიტევს, _ აცხადებს სფფ-ის თავკაცი და თუ ჩვენი წინა პუბლიკაცია წაკითხული გაქვთ, აშკარად შეამჩნევთ “მსგავსებას”.
ზვიად სიჭინავას განცხადებით, ახალ სეზონს ოზურგეთის “მერცხალი” რეაბილიტირებული სტადიონით შეხვდება. რაც შეეხება მოედანს, მისი სარეაბილიტაციო სამუშაოები უფრო მოგვიანებით დამთავრდება: _ ვფიქრობ, საფეხბურთო კლუბ ოზურგეთის “მერცხალისთვის”, რომელიც ახლა ეროვნული ჩემპიონატის პირველი ლიგის მე-12 ადგილზეა, ახალი სტადიონი დიდი სტიმული იქნება და გუნდს დაეხმარება მომავალი სეზონის წარმატებით გასავლელად, _ ამბობს სიჭინავა.
დასასრულ, ერთსაც შევნიშნავთ _ ფეხბურთის ფედერაცია ნამდვილად კარგ საქმეს აკეთებს, როცა ოზურგეთის სტადიონს რეკონსტრუქციას უტარებს. თუმცა, აუცილებელია აღინიშნოს, რომ ეს არ უნდა გახდეს გურული საფეხბურთო დაპირისპირების მიზეზი და ამისთვის ორივე მხარემ უნდა შეინარჩუნოს ის, რასაც თუნდაც ბოლო ერთი წლის მანძილზე მიაღწიეს. გვჯერა, ორივე მხარე (ვგულისხმობთ ოზურგეთისა და ლანჩხუთის როგორც საფეხბურთო, ასევე პოლიტიკურ ელიტას, რადგან ამ რაიონებს შორის წლების მანძილზე არსებული დაპირისპირება საფეხბურთო ჩარჩოებს მუდამ სცდებოდა) ღირსეულად იმოქმედებს, რაც სამომავლოდ გურული ფეხბურთის წინსვლის საფუძველი გახდება.