აქედან ოზურგეთში მდებარე სოფლები: მთისპირი, ასკანა, ფამფალეთი, ეწერი, ბახვი, კონჭკათი, ხრიალეთი, შრომა, ნატანები, ახალსოფელი, ნასაკირალი, მერია, ჯუმათი, სილაური, ძიმითი, ნაღობილევი, ცხემლისხიდი, უკანავა, ჭანიეთი. ლანჩხუთის მუნიციპალიტეტში: ხაჯალია, ნიგვზიანი, ჩოჩხათი, ხორეთი, ჩიბათი, ომფარეთი და მოედანი. ჩოხატაურის მუნიციპალიტეტში: ვანი, სამება, განახლება, გოგოლესუბანი, ფარცხმა, ჭაჭიეთი, ქვენობანი, ხევი, ნაბეღლავი, ქვაბღა, ჩხაკაურა, ზემო და შუა სურები, ზომლეთი. გურიის რეგიონში 1980-1998 წლებში გეოლოგიური პროცესების საშიშროების ზონაშია მოქცეული 3 631 საცხოვრებელი სახლი, ამათგან 541 სახლი დაკვირვების ქვეშ იმყოფება. უკანასკნელი 30 წლის განმავლობაში გურიაში, საშიში გეოლოგიური პროცესებიდან გამომდინარე, ძალიან დაზიანდა და მთლიანად დაინგრა 800-მდე საცხოვრებელი სახლი. 1999 წლისთვის გამოვლენილია და რეგისტრირებულია 101 მეწყერული ზონა. გეოლოგიურად საშიში უბნების ტერიტორიებიდან გადასახლების რეკომენდაცია მიეცა 54 ოჯახს, მეთვალყურეობა დაუწესდა 22 საცხოვრებელ სახლს. 1999 წელს გააქტიურებულმა მეწყერულმა პროცესებმა სოფლებში: ნატანების, შრომის, თხინვალის, კონჭკათის ტერიტორიებზე ძლიერ დააზიანა და საცხოვრებლად უვარგისი გახადა 50-მდე სახლი”, _ ვკითხულობთ ინფორმაციულ ბიულეტენში _ “მიწისქვეშა ჰიდროსფეროს, ეკოლოგიური მდგომარეობის, საშიში გეოლოგიური პროცესების შესწავლის და პიდროპროგნოზირების შესახებ” _ რომელიც გამოცემულია 2000 წელს საქართველოს გეოლოგიის სახელმწიფო დეპარტამენტის მიერ.
ოზურგეთის მუნიციპალიტეტის სოფელი თხინვალი, როგორც ამ ბიულეტენშია აღნიშნული, მეწყერსაშიშ ზონას განეკუთვნება. აქ მცხოვრებ 14 ოჯახს გეოლოგების დასკვნის თანახმად, საცხოვრებლიდან სასწრაფოდ გამოსახლება ესაჭიროება.
“გურია ნიუსი” ოზურგეთის მუნიციპალიტეტის სოფელ თხინვალში ერთ-ერთ დამეწყრილ ოჯახს მას შემდეგ კიდევ ერთხელ ეწვია, რაც ანასტასია ბაღიშვილი “გურია ნიუსის” ოზურგეთის განყოფილებას, თავისი ოჯახის გასაჭირზე სასაუბროდ სტუმრობდა: _ სანამ თოვას დაიწყებდა, ოზურგეთის გამგეობაში მივედი და გამგებლის მოადგილეს, ლადო ქვილორიას შევხვდი. იქ სხვებიც იყვნენ. ვუამბე ჩემი ოჯახის გასაჭირის შესახებ _ ორი ინვალიდი მყავს სახლში, ორივე მოხუცია, პატარა შვილიშვილსაც ვზრდით. მე და ჩემი მეუღლე არ ვმუშაობთ, მარტო მოხუცების პენსიით ვსულდგმულობთ. დახმარება ვთხოვე _ ჩვენი სახსრებით ვერაფერს გავაკეთებთ, ჯერ კიდევ შეიძლება სახლის გამაგრება, ერთი კედელი კი მთლიანად ჩამოინგრა, შეიძლება ჯებირის ჩამოსხმაც, ან სამშენებლო მასალა მაშოვნინეთ, ან რაიმე საშუალება მომაძებნინეთ, რომ შევაჩერო სახლის ნგრევა,-მეთქი. ქვილორია მეუბნება, მთლად რომ დაგენგრეს სახლი, ვერ დაგეხმარებით, მაგის იმედი არ გქონდეს, არ გვაქვს საშუალებაო. ასე ტუტუცურად გამომიშვა გარეთ. ვიფიქრე, გუბერნატორთან მივალ,-მეთქი, მაგრამ ადგილზე არ დამხვდა. მერე თოვა დაიწყო და ვეღარ ჩამოვედი _ მოხუცებს ვერ ვტოვებ. სახლში არც კარი იკეტება, არც _ ფანჯარა. მე არავის დახმარება არ მინდოდა, ჩემი ნაშრომი ამ სახლის გაკეთებას შევალიე. არაფერს არ ვითხოვდი, მეწყერს რომ არ ჩაენგრია. მიწა ერთხელაც რომ დაიძრას კიდევ, ჩვენს მეზობელსაც ჩაიტანს. წლების განმავლობაში, წინ და უკან დავდივარ. მთელი ჩემი ოჯახი, ყოველთვის მთავრობას ვემსახურებით, არასოდეს ოპოზიციაში არ ჩავდგომივართ. რვა სული ვართ ოჯახში და ამდენი ხმა მთავრობისთვის მისწრებაა. როცა გიჭირს და მომადგები, ხმა მომეციო, ახლა, მე რითი მეხმარები? აწი მაგათ ვინ მისცემს ხმას და თავს მოატყუებინებს? ქვილორიას დედა რომ მისულიყო იქ, იმასაც იგივეს ეტყოდა თუ, უკაცრავად და, სხვა ჰკიდიათ ფეხებზე?! ადრე ვალერისთანაც ვიყავი შესული და მითხრა, გამოვნახავთ რაღაც საშუალებას და დაგეხმარებით, როცა ფული გადმოგვერიცხებაო. მპირდებიან და ვართ ასე… კაი, ადრე ნგრევა იყო, ახლა ხომაა შენება?! ჩვენი პრეზიდენტი გამოდის და აცხადებს, ვაშენებთ, ვაშენებთო და თუ აშენებს, პატარა ჩვენც მოგვეხმაროს! ჩემი თავი ჯანდაბას, მაგრამ ორი ინვალიდი სად წავიყვანო? _ კითხულობს ანასტასია ბაღიშვილი.
ოზურგეთის მუნიციპალიტეტის გამგებლის მოადგილე, ლადო ქვილორია: _ მასეთი პასუხი მე არ გამიცია. მიღებაზე მხოლოდ ერთი ადამიანი არ ზის _ ჩემთან ერთად იქნებოდნენ სხვებიც, კომისიაც, რომელიც საგანგებოდ უსახლკაროების საკითხს იხილავს და რომლის გადაწყვეტილებით ვაძლევთ პრივილეგიას 416 ოჯახიდან ყველაზე უფრო დაზარალებულს. წინასწარ რაიმეს თქმა არ შეგვიძლია, იმიტომ, რომ ყველა იმ 416 ოჯახიდან ერთიმეორეზე უარეს მდგომარეობაში იმყოფება. გეოლოგების დასკვნით, არსებობს 85 ოჯახზე პირველი კატეგორიის დაზიანება, ერთ-ერთი ეს ქალბატონი, მაგრამ ხომ უნდა ამოარჩიოს კომისიამ? მე არ ვწყვეტ აქ ყველაფერს. ძალიან გთხოვთ, გადაამოწმოთ ის, რაც თქვა იმ ქალბატონმა ჩემს შესახებ _ მიღებაზე მარტო არ ვიყავი, იქ სამი-ოთხი ადამიანი კიდევ იყო ჩემს გარდა. კომისიის გადაწყვეტილებიდან გამომდინარე, დაიდება დასკვნა, ვის მიეცემა დახმარება.
ოზურგეთის მუნიციპალიტეტის გამგეობის ეკონომიკის, ინფრასტრუქტურისა და საინვესტიციო გარემოს განვითარების სამსახურის უფროსი კოტე სარიშვილი “გურია ნიუსთან” საუბარში აღნიშნავს, რომ მას არ აქვს უფლება ჟურნალისტებთან კომენტარი გააკეთოს(?!):
_ მე რამდენადაც ვიცი, არ შეიძლება გაგცეთ პასუხი. თუ რაიმე პირადი გაინტერესებთ ჩემი (?!) შემიძლია, გიპასუხოთ. არსებობს პრესსამსახური და გამგებელი _ იმათ უნდა მიაკითხოთ. თუ სახსრები არ არის, რით დაეხმარებიან? ჩემი საქმეა, ეს ყველაფერი დავასაბუთო და მივიტანო კომისიამდე, _ ამბობს სარიშვილი.
გუბერნატორი ვალერი ჩიტაიშვილი: _ მეწყერი, სამწუხაროდ, რთული პროცესია. საკმაოდ ძვირადღირებული სამუშაოებია ჩასატარებელი _ ეს კედლები დამცავი გაბიონით უნდა გავამაგროთ. ასეთი ადგილები ბევრია გურიაში _ ნატანები, შრომა, თხინვალი, კონჭკათი, ძიმითი, ასკანა, მთისპირი _ ყველგან მეწყერსაშიში ზონაა. საკმაოდ ბევრია თხინვალში ოჯახები, რომლებიც პირველ კატეგორიას მიეკუთვნებიან. მე თავად ვარ იქ ნამყოფი და მართლაც გაუსაძლისია იმ ოჯახებში ცხოვრება. ყველაფერს რომ თავი დაანებო, არის მეორე ვარიანტი _ მოსახლეობას ვეუბნებით, რომ ვუქირავებთ ბინას და სახლიდან დროებით გამოვიდნენ, მაგრამ ხშირად უჭირთ საცხოვრებლის დატოვება. ეს ოჯახები, მათი თანხმობით დროებით სხვაგან უნდა გადავიყვანოთ. ფაქტობრივად, არც იქნება შესაძლებელი, რომ ძველ ადგილს დაუბრუნდნენ, რადგან მეწყერი დაიძრა და ის აღარ შეჩერდება.
