დაწყებულ მშენებლობას აქ მცხოვრები ახალგაზრდები აპროტესტებენ და როგორც “გურია ნიუსს” უთხრეს, მათთვის მიუღებელია სკვერში რაიმე სახის შენობის აგება.
“ვარდების რევოლუციის” სახელობის სკვერი, სამი წლის წინ, შინაგან საქმეთა სამინისტროს გურიის სამხარეო მთავარი სამმართველოს უფროსმა ბესო გელენიძემ და გურიის საპატრულო სამსახურის, ასევე ყოფილმა უფროსმა დავით ცირდავამ აღადგინეს.
“ერთ დღეს მივდივართ და სამშენებლო მასალები გვხვდება დაყრილი, არავინ არ იცის, რას აკეთებენ. ნებართვა 32 კვადრატზეა გაცემულიო და ფუნდამენტი 62 კვადრატზე გააკეთეს. რაც ყველაზე მეტად გვაშფოთებს, ის არის, რომ იქ, სადაც ახლა მშენებლობა წამოიწყეს, ჯვარი იდგა, რომელიც სკვერის გახსნის დღეს აკურთხეს. ნაკურთხი ჯვარი აიღეს და მის ადგილზე რაღაცის მშენებლობა წამოიწყეს”, _ გვითხრეს ახალგაზრდებმა.
ასევე ფიქრობენ აქ მცხოვრები ხანდაზმულებიც.
მშენებლობაზე მომუშავე მუშები არ აკონკრეტებენ, რა კეთდება და არც მშენებლის ვინაობას ამხელენ. მეტიც, ერთ-ერთმა მათგანმა იცრუა _ გვითხრა, რომ იქ ცხოვრობდა და მშენებლობის გამო, კმაყოფილებაც კი გამოთქვა. თუმცა, სიმართლის დადგენა არ გაგვძნელებია, რადგან იქაურებმა გვითხრეს, რომ ეს ადამიანი მათ უბანში არ ცხოვრობს _ აღნიშნულ მშენებლობას კურირებს: _ ჩვენ როგორ გეტყვით, რომ აქ რაიმე სახის ობიექტის აშენებას მივესალმებით? ბუნებრივია, ეს ადამიანი დასაქმებულია და მისი ინტერესებიდან გამომდინარე საუბრობს. ჩვენ ამ მშენებლობის წინააღმდეგნი ვართ, მაგრამ ვინ გვყავს პატრონი და ვინ აქცევს ჩვენს აზრს ყურადღებას? _ გვითხრეს მათ.
როგორც ოზურგეთის მუნიციპალიტეტის საკრებულოში ამბობენ, მიწის ნაკვეთი კერძო პირის საკუთრებაა და ” აქედან გამომდინარე, მუნიციპალიტეტი ვერ მოახდენს გავლენას მშენებლობაზე”.
ოზურგეთის მუნიციპალიტეტის გამგეობის არქიტექტურისა და ურბანული დაგეგმარების სამსახურის უფროსი თემურ მურვანიძე “გურია ნიუსთან” საუბარში ამბობს, რომ მშენებლობის ნებართვა 36 კვადრატზე გაიცა და აღნიშნული ნაკვეთი მაია თოიძის კერძო საკუთრებაა.
მურვანიძის თქმით, საჯარო რეესტრიდან ამონაწერის თანახმად, აღნიშნულ ნაკვეთზე ნებართვა 2011 წლის 28 იანვარს გაიცა.
საქართველოს პარლამენტმა საქართველოს დასახლებულ პუნქტებში გამწვანების ზონების, პარკების, ბაღებისა და სკვერების დაცვის შესახებ, დადგენილება 1998 წლის 17 ივლისს მიიღო: “სასწრაფოდ აღიკვეთოს საქართველოს დასახლებულ პუნქტებში გამწვანების ზონების, პარკების, ბაღებისა და სკვერების ხელყოფა, მათი საზღვრების ფარგლებში და მიმდებარე ტერიტორიებზე”, _ აღნიშნულია დადგენილებაში.
აქვეა მითითებული, რომ თუ საქართველოს პარკებში, ბაღებსა და სკვერებში უკანონოდ აშენდა ან შენდება მათთვის შეუფერებელი ფუნქციის მქონე ნაგებობები, მკაცრად დაისვას იმ თანამდებობის პირთა პასუხისმგებლობის საკითხი, რომლებმაც გასცეს ბაღ-პარკების ტერიტორიებზე ფართობების გამოყოფის ნებართვა მშენებლობებისა და სხვა მიზნით.
როგორც “გურია ნიუსთან” საუბარში “საქართველოს ახალგაზრდა იურისტთა ასოციაციის” იურისტმა ქეთი თოიძემ აღნიშნა, საქართველოს პრეზიდენტის 2005 წლის 8 აგვისტოს #687 ბრძანებულებით, განისაზღვრა ადგილობრივი თვითმმართველი ერთეულისთვის გადასაცემი ძირითადი (განუსხვისებელი) ქონების სახეობათა ნუსხა, რომელშიც გარკვევით არის მითითებული, რომ სახელმწიფო საკუთრებაში არსებული ადგილობრივი მნიშვნელობის მოედნები, სკვერები, ბულვარები, შადრევნები, პარკები, მწვანე ნარგავები და ნაპირსამაგრი ნაგებობები განუსხვისებელ ქონებას განეკუთვნება.
მისივე თქმით, “ადგილობრივი თვითმმართველი ერთეულის ქონების შესახებ კანონის” შესაბამისად, ძირითადი ქონების გასხვისება, შესაძლებელია, თვითმმართველი ერთეულის წარმომადგენლობითი ორგანოს ჴ საკრებულოს თანხმობით, მხოლოდ იმ შემთხვევაში თუ ამ ქონებამ დაკარგა თავისი ფუნქციური დანიშნულება.
