ოზურგეთის მუნიციპალიტეტის სოფელ შრომაში მცხოვრებ რამდენიმე ოჯახს ენერგოვაუჩერი დღემდე არ მიუღია _ ამის შესახებ “გურია ნიუსს” ამ სოფლის მცხოვრებლებმა აცნობეს. აქ მოსახლეობა კომუნალური მრიცხველის მაჩვენებლის მიხედვით იხდის ელექროენერგიის საფასურს და თუ ზედმეტი თანხა იქნება გადასახდელი, მოსახლეობაზე თანაბრად ნაწილდება.
_ ენერგოვაუჩერი იმ ოჯახებს არ მიუღიათ, რომლებიც ყველაზე ნაკლებს ხარჯავენ და შეჭირვებულად ცხოვრობენ. ერთ-ერთმა აბონენტმა ცხელ ხაზზე დარეკა და იკითხა, რატომ ვერ მიიღო ენერგოვაუჩერი. _ რამდენი ხანია, რაც ვაუჩერების დარიგება დასრულდა და შრომა ვიღას ახსოვსო, უპასუხეს. სოფელში არც ბუნებრივი აირი შემოსულა, ინდივიდუალურ გამრიცხველიანებას გვპირდებიან და ჯერ არ ჩანს. მოკლედ, პატრონი არ გვყავს. იქნებ, თქვენ მაინც გაარკვიოთ, რატომ არ მოგვცეს ვაუჩერი? _ გვთხოვა სოფელ შრომის მკვიდრმა.
ჩვენ სოციალური მომსახურების გურიის საკოორდინაციო ცენტრს დავუკავშირდით, სადაც გვითხრეს, რომ სიების გადაგზავნა ისევ მიმდინარეობს, ვაუჩერის არმიღების ერთადერთ მიზეზად კი არასწორი სიების მიწოდება დაასახელეს და განმარტეს, რომ ამ სიების გადაგზავნა და კორექტირება ადგილობრივი ენერგოკომპანიის პრეროგატივა იყო.
“გურია ნიუსი” შრომის რწმუნებულის მოვალეობის შემსრულებელს დავით ჯაბუას დაუკავშირდა, რომელმაც გვითხრა, რომ შრომაში ენერგოვაუჩერი 1 109 ოჯახმა მიიღო, ვაუჩერის გარეშე კი 34 ოჯახია დარჩენილი. მან თქვა, რომ სრულად გადასცა სოფლის მცხოვრებლების სია ადგილობრივ ხელისუფლებას, მაგრამ ვაუჩერი სიის მიხედვით, არც პირველ და არც მეორე ეტაპზე არ ჩამოსულა და ახლა, უკვე მესამედ აგზავნიან ვაუჩერის გარეშე დარჩენილთა სიას.
_ სიები გადაეცა ადგილობრივ ხელისუფლებას და ამ სიაში მყოფ 34 ოჯახს არ შეხვდა ენერგოვაუჩერი. ვერ გეტყვით, რა მიზეზით მოხდა ეს, თუმცა, გვპირდებიან, რომ ვაუჩერს ეს ოჯახებიც აუცილებლად მიიღებენ. რაც შეეხება ინდივიდუალურ გამრიცხველიანებას, ადგილობრივი ენერგოკომპანიის დაპირებით, ეს პროცესი წლის ბოლოსთვის უნდა დაიწყოს, _ აღნიშნა ჯაბუამ.
ენერგოვაუჩერი არ შეხვდა ქალაქის ტერიტორიაზე მცხოვრებ ოჯახებსაც, რომლებიც ელექტროენერგიის აქტიური მომხმარებლები არიან:
_ ვარ პენსიონერი, ელექტროენერგიის აქტიური მომხმარებელი. დღემდე ვარკვევ, რა მიზეზით არ მომცეს ენერგოვაუჩერი და ვერ გავარკვიე. იქნებ, თქვენი გაზეთის საშუალებით მივიღო პასუხი ამ შეკითხვაზე. მპირდებიან, რომ მივიღებ, მაგრამ როდის _ ვერ გავიგე. სურსათის ვაუჩერს მალე დაარიგებენ, მე კი ელექტროენერგიისაც არ მიმიღია, _ გვითხრა პენსიონერმა ქალბატონმა.
ადგილობრივ ხელისუფლებაში გვიმტკიცებენ, რომ არც ერთი ოჯახი ვაუჩერის გარეშე არ დარჩება _ მთავარია, სია მიეწოდოს შესაბამის სამინისტროს და აბონენტი ელექტროენერგიის აქტიური მომხმარებელი იყოს.
