აჭარის ტელევიზიასთან შეკრებილ აქციის მონაწილეებს, პოლიცია მას შემდეგ გაუსწორდა, როცა დაუდგენელმა პირებმა ტელევიზიის შენობას ქვები დაუშინეს.
ბათუმში, ერას მოედანზე, “სახალხო კრების” საპროტესტო აქცია 21 მაისს, დღის სამ საათზე დაიწყო. თავიდანვე მოედანზე, დაახლოებით ოპოზიციის 4 000-მდე მხარდამჭერი შეიკრიბა, თუმცა, მოგვიანებით, მათმა რიცხვმა საგრძნობლად იკლო. აქციის ორგანიზატორები აცხადებდნენ, რომ პროტესტი მანამ გაგრძელდებოდა, სანამ დადებით შედეგს არ მიიღებდნენ, თუმცა, სამი საათის შემდეგ, ორგანიზატორებმა, აჭარის ტელევიზიასთან გადანაცვლების გადაწყვეტილება მიიღეს.
ტელევიზიასთან მდგომმა ოპოზიციის ლიდერებმა, ხელმძღვანელობას პირდაპირი ეთერის დათმობა მოსთხოვეს. სანამ ლიდერები საკუთარ მოთხოვნებს აყენებდნენ, ტელევიზიის მიმდებარე ტერიტორიაზე, როგორც სამოქალაქო ფორმაში ჩაცმული მაღალჩინოსანი სამართალდამცავების, ისე ფორმიანი პოლიციელების მობილიზება დაიწყო. ტელევიზიასთან შეკრებილ აქციის მონაწილეებს პოლიცია ფიზიკურად მას შემდეგ გაუსწორდა, როცა დაუდგენელმა პირებმა აჭარის ტელევიზიის შენობას ქვები დაუშინეს. რამდენიმე წუთი სიტუაცია აბსოლუტურად უმართავი იყო _ პოლიციელები აქციის მონაწილეებს დროშის ტარებით და სხვადასხვა საგნებით უსწორდებოდნენ, ინციდენტის შემდეგ კი რამდენიმე პირი დააკავეს.
აქციის დარბევის შემდეგ, ოპოზიციის მხარდამჭერები ისევ, ერას მოედანს დაუბრუნდნენ, თუმცა, როგორც ისინი აცხადებდნენ, სამოქმედო გეგმა შემუშავებული არ ჰქონდათ.
მიუხედავად, წვიმისა, ერას მოედანზე დაახლოებით 500 მომიტინგე რჩებოდა, ლიდერებმა კი “სახალხო კრების” ოფისში, პოლიტიკური გადაწყვეტილების მიღების მიზნით გადაინაცვლეს.
ერას მოედანზე მობილიზებული იყვნენ სპეცრაზმის, პოლიციის, კუდის, სოდის და კონტრდაზვერვის თანამშრომლები. დაახლოებით 23 საათზე, ჩოჩქოლის ხმა გაისმა, რა დროსაც რამდენიმე პირი, მათ შორის ერთი ოზურგეთელი, სპეცრაზმმა მანქანაში “ჩატენა” და გაურკვეველი მიმართულებით წაიყვანა. ოპოზიციონერები დაკავებულების ბედის გარკვევას იქვე მდგომ სამართალდამცველებთან ცდილობდნენ, თუმცა, ისინი არანაირ განმარტებებს არ აკეთებდნენ _ როგორც მათ “გურია ნიუსს” უთხრეს არაფერი დაუნახავთ და არაფერი გაუგიათ(?!)
ამ ინციდენტიდან, დაახლოებით, საათნახევრის შემდეგ, “სახალხო კრების” ბათუმის ოფისთან, დაახლოებით 12 მანქანა გაჩერდა, საიდანაც სპეცრაზმისა და პოლიციის თანამშრომლები გადმოვიდნენ. ისინი “სახალხო კრების” ოფისში შეიჭრნენ და დაარბიეს.
დარბევის დროს ნაცემი აქტივისტები ბათუმის ცენტრალურ საავადმყოფოში სასწრაფო-სამედიცინო მანქანით გადაიყვანეს.
როგორც ჟურნალისტებს “სახალხო კრების” წევრმა თემურ შაშიაშვილმა განუცხადა, 9 ნაცემი ადამიანი საავადმყოფოში რჩება, სამი კი პირველადი დახმარების აღმოჩენის შემდეგ სახლში გაუშვეს.
აქცია, 22 მაისს, ისევ ერას მოედანზე განახლდება. შაშიაშვილის თქმით, ბათუმში მიმდინარე აქციის ორგანიზებაზე პასუხისმგებლობას თავად იღებს.
გურულები აქციაზე
ლანჩხუთელები აქციაზე
აქციაზე მიწაწართმეული გონიოელებიც იყვნენ
კადრში ქედისა და ხელვაჩაურის გამგებლები ჩანან
სოდის შემადგენლობა და პოლიციის გურიის სამხარეო სამმართველოს
პრესსამსახურის უფროსი მაია გიორგაძე აქციაზე
აჭარის მაღალჩინოსანი პოლიციელები
პოლიციელები ამ მანქანით გადაადგილდებოდნენ
პოლიციელთა კორდონი ტელევიზიასთან
ხალხი გარბის
დარბევის დროს დაშავებული აქციის მონაწილე
თემურ შაშიაშვილი და აქციის სხვა ორგანიზატორები
პოლიტიკურ გადაწყვეტილებას იღებენ
ერას მოედანი, ღამის 11 საათი
ამ დროს დააკავეს აქციის მონაწილეები, მათ შორის, ერთი ოზურგეთელიც
