ოზურგეთის მუნიციპალიტეტის საკრებულოს წევრს, მაისის აქციების მონაწილე ლელა ნაცვალაძეს შინაგან საქმეთა სამინისტროს გურიის სამხარეო მთავარი სამმართველოს გამომძიებელი მიხეილ სიხარულიძე 31 მაისს, 5 საათის განმავლობაში, მოწმის სტატუსით კითხავდა. დაახლოებით, 47 კითხვა ერთი და იმავე თემას ეხებოდა: შეფიცულებთან კავშირი, სახელმწიფოს გადატრიალების მცდელობა და აქციაში მონაწილე პირთა ვინაობის გამხელა.
_ ლელა, რას არკვევდა და რის გაგებას ცდილობდნენ თქვენგან სამართალდამცავები ხუთი საათის განმავლობაში?
_ არასწორი ინფორმაციის საფუძველზე ცდილობდნენ, გაერკვიათ ვიყავი თუ არა “სახალხო კრების” ოზურგეთის რაიონული კომიტეტის ხელმძღვანელი. ამის შემდეგ, შეეცადნენ მიეღოთ ჩემგან ინფორმაცია “შეფიცულებთან” დაკავშირებით, ვგულისხმობ ოზურგეთში ამ კავშირის არსებობას, რომელიც ბუნებაში არ არსებობს. ვაკონკრეტებ _ როცა მოითხოვეს შეფიცულების 50-კაციანი სია, გადავაგზავნე 52-კაციანი ე.წ. “ბალვანკა”.
_ სად გადააგზავნეთ და რა არის ე.წ. “ბალვანკა”?
_ სიაში ჩამონათვალი პიროვნებები ფიზიკურად, ბუნებაში არ არსებობენ. ეს არარსებული სიები ე.წ. “შეფიცულთა რაზმის” ერთ-ერთ ლიდერს გადავუგზავნე. აქვე განმარტავ, რომ ძალიან დიდი გამოცდილება მაქვს იმის, როცა არჩევნების პერიოდში ჩვენს მიერ შედგენილი აგიტატორების სია, დაიდო სხვადასხვა ჩინოვნიკების კაბინეტში. ამიტომაც დავიზღვიე თავი ნებისმიერი პროვოკაციისგან.
_ რა კითხვები წამოვიდა სამართალდამცავების მხრიდან?
_ პირველ რიგში დეტალურად მომაყოლეს ბიოგრაფია, რომელიც საკმაოდ ინფორმაციულია. შემდეგ შეეცადნენ ჩემი ოჯახის წევრებზე ინფორმაცია შეეგროვებინათ.
იყო სხვა სახის შეკითხვებიც, რომელიც შეეხებოდა ოფისის ხარჯებს და სხვა ფინანსურ საკითხებს.
_ ყველაზე მეტად რით დაინტერესდნენ?
_ თანხებით, რომელიც შეიძლებოდა, და ისინი ვარაუდობდნენ, რომ დაიხარჯა აქციის დროს, ანუ მისი ორგანიზებისას.
_ იყო თუ არა რაიმე სახის ზეწოლა?
_ იყო ზეწოლა, რაც გამოიხატა ერთი და იგივე შინაარსის შეკითხვის სხვადასხვა ინტერპრეტაციით მრავალჯერ დასმაში.
_ ყველაზე მეტად რის გაგებას ცდილობდა თქვენგან გამომძიებელი?
_ ვიცნობდი თუ არა ე.წ. “შეფიცულთა რაზმის” სამოქმედო გეგმას და მქონდა თუ არა ინფორმაცია, ქვეყანაში სახელმწიფო გადატრიალების შესახებ. ბუნებრივია, მსგავსი რამ არ იგეგმებოდა და ასე რომ ყოფილიყო, მე აქციებში არ მივიღებდი მონაწილეობას.
_ თუ ეს ასე არ იყო, საიდან აქვთ ინფორმაცია, რომ ბურჯანაძე სახელმწიფო გადატრიალებას გეგმავდა?
_ ჩემი აზრით, ვიღაცას სჭირდება, რომ შექმნას ასეთი მითი და “სახალხო კრება” თუ მისი მხარდამჭერები სახელმწიფო მოღალატეებად გამოაცხადონ. იგივე სცენარი მეორდება, როგორც იყო 2007 წლის ნოემბრის მოვლენების შემდეგ, როცა, სხვათაშორის, ბურჯანაძე პარლამენტის თავმჯდომარე იყო.
_ თუ ასეა, ბუნებრივია, უნდა ეკითხათ, რა კავშირი აქვს “სახალხო კრებას” რუსეთის ხელისუფლებასთან?
_ დიახ, იყო ასეთი შეკითხვა და არა ერთხელ. მეკითხებოდნენ, ვიცოდი თუ არა რუსეთის ხელისუფლებასა და “სახალხო კრების” წევრებს შორის კავშირების შესახებ. მე ვუპასუხე, თუ ამას კავშირს დავარქმევთ, და მით უფრო სახელმწიფო გადატრიალების მცდელობას, ერთხელ იყვნენ ნინო ბურჯანაძე და ზურაბ ნოღაიდელი ომში დაღუპულ ქართველთა მემორიალის გახსნაზე რუსეთში. გასაკვირია, რატომ სვამენ ამ კითხვას მაშინ, როცა სახელმწიფოს სტრატეგიული ობიექტები უკვე რუსეთს მიჰყიდეს? ჩვენ ვართ რუსეთის რეზიდენტები თუ ისინი, ვინც ამ ეკონომიკურ ექსპანსიას შეუწყო ხელი?
_ ქალბატონო ლელა, ამ დროის განმავლობაში სხვა არაფერი გკითხეს, თუ არ გინდათ რაღაც საკითხების გახმაურება?
_ დასამალი არაფერი მაქვს. როგორც აღვნიშნე, ძირითადად, შეფიცულების შესახებ ეძებდნენ ინფორმაციას; ასევე ზედმიწევნით აინტერესებდათ, იგეგმებოდა თუ არა სახელმწიფო გადატრიალება. ამ თემების ირგვლივ 47 შეკითხვა დამისვეს, აღვნიშნავ, რომ იმ პირთა სახელობითი სია აინტერესებდათ, რომლებიც მონაწილეობდნენ მაისის აქციებში, როგორც ბათუმში, ისე თბილისში.
გარდა ამისა, მკითხეს, თუ რა მოვალეობა ჰქონდათ “შეფიცულებს”, რა იარაღით იყვნენ აღჭურვილნი, ჰქონდათ თუ არა “მოლოტოვის კოქტეილები” და რას წარმოადგენდნენ ე.წ. “შეფიცულები”. ასევე იყო ე.წ. ზოგადი საუბრები, ანუ სამართალდამცავები განიხილავდნენ 26 მაისს გამთენიისას საქართველოში მომხდარ მოვლენებს, რომელიც ეხებოდა მშვიდობიანი მომიტინგეების დარბევას. სახელისუფლებო არხების მეშვეობით მოსახლეობა მიზანმიმართულად შეჰყავთ შეცდომაში. მიმაჩნია, რომ სამართალდამცავების მხრიდან ეს არის მიზანმიმართული პოლიტიკური ზეწოლა ოპოზიციურად მოაზროვნე ადამიანებზე მათი დაშინებისა და სულიერად დაკნინების მისაღწევად. შეიძლება, ერთეულებმა ვერ გაუძლოს ამ ზეწოლას, მაგრამ უმრავლესობა ორმაგად დაუპირისპირდება რეჟიმს და ეს იქნება სწორედ ამ პოლიტიკური რეპრესიების პასუხი ქართველი საზოგადოებისგან.
P.S. ნაცვალაძის დაკითხვის შემდეგ, საღამოს დაახლოებით, ათი საათისთვის, ოზურგეთის პოლიციის სამმართველოში დაკითხვაზე “სახალხო კრების” ოზურგეთის ოფისის ხელმძღვანელი თამარ ნადირიძე შეიყვანეს.
