ოზურგეთელი “თავისუფალი დემოკრატების” მორიგი პრესკონფერენცია ამჟამად წყალმომარაგების პრობლემებს ეხებოდა. ოზურგეთის რაიონული ორგანიზაციის მიერ შესწავლილი იქნა წყალმომარაგებასთან დაკავშირებული საკითხები. ამავე პარტიის ახალგაზრდული ფრთის თავმჯდომარის ზაზა ცინცაძის თქმით, მათ საქართველოს გაერთიანებული წყალმომარაგების კომპანიის ოზურგეთის სერვისცენტრს და ოზურგეთის მუნიციპალიტეტის საკრებულოს წერილობით მიმართეს.
_ შპს “საქართველოს გაერთიანებული წყალმომარაგების კომპანიის” ოზურგეთის სერვისცენტრმა პასუხად გვაცნობა, რომ სათავე ნაგებობის მუშაობა არის სეზონური და დამოკიდებულია კლიმატურ პირობებზე. მოსახლეობას წყალი მიეწოდება 8_საათიანი გრაფიკით, სასმელი წყლის ვარგისიანობის ყოველდღიური კონტროლი ხდება სერვისცენტრის ლაბორატორიაში, ანასეულის რეზერვუარი არ ფუნქციონირებს, _ თქვა ზაზა ცინცაძემ.
ახალგაზრდული ფრთის წევრმა ნათია ზედგინიძემ შემოქმედის წყალსადენზე უფრო ვრცლად ისაუბრა:
_ ქალაქის წყალმომარაგების სისტემის გასაუმჯობესებლად, 2005 წელს ჩატარებულ ტენდერში გაიმარჯვა შპს “სმუ ინგეკომმა”, რომელმაც წარმოადგინა სატენდერო წინადადება თანხით _ 3 876 245 ლარი. ეს გახლავთ კომპანია, რომელმაც ვერ შეასრულა წინა ორი _ ბათუმის წყალკანალისა და ქობულეთის სანიაღვრე პროექტები. პროექტმა რამდენჯერმე განიცადა ცვლილება, რაც აისახა ხარჯთაღრიცხვაში და საინვესტიციო პროექტის ღირებულება გაიზარდა. თავად პროექტირებაში გადახდილია 113 ათას 400 ლარი. ამ პროექტის მიხედვით, ქალაქ ოზურგეთის მოსახლეობა უზრუნველყოფილი უნდა ყოფილიყო 24_საათიანი წყალმომარაგებით, მიწოდება უნდა მომხდარიყო ანასეულში მდებარე რეზერვუარებიდან. წყალი უნდა ყოფილიყო ხარისხიანი, თვითდენითი და არა დამოკიდებული სეზონურობაზე.
პროექტში მითითებულია, რომ ცენტრალური მილი უნდა დაიფაროს ქვიშით, რადგან წყალს აქვს მაღალი წნევა, რომელიც იწვევს მილების ვიბრაციას. დაზიანებულია ცენტრალური მილები, რადგან ქვიშის ნაცვლად, ზოგიერთ ადგილებში ქვანარევი მიწის გრუნტია გამოყენებული. ეს ჩვენს ფოტოებზეცაა ასახული.
მოკვლეული მასალებიდან ირკვევა, რომ დახარჯულია სოლიდური თანხა, რეალობა კი კატასტროფულია. გადაჭრით შეიძლება ითქვას, პროექტი ჩავარდა _ ოზურგეთის მოსახლეობას არც 8_საათიანი გრაფიკით მიეწოდება წყალი და რაც მიეწოდება, ისიც სასმელად უვარგისია.
ეჭვს იწვევს ექსპერტიზის დასკვნაც და შესაბამისად, ისმება კითხვა: რაზე აწერს ხელს იმჟამინდელი გამგებელი და რამდენად შეესაბამება, თუნდაც მაშინდელ რეალობას პროექტის შესრულების ხარისხი?
ჩვენ, “თავისუფალმა დემოკრატებმა”, შევძელით, მოგვეკვლია მასალები ამ საკითხებზე, მაგრამ მაინც ვერ მივიღეთ პასუხი, თუ რამდენად მიზნობრივად გაიხარჯა პროექტით გათვალისწინებული თანხა, _ თქვა პრესკონფერენციაზე ნათია ზედგინიძემ.
“გურია ნიუსი” ამ საკითხთან დაკავშირებით ოზურგეთის მუნიციპალიტეტის საკრებულოს თავმჯდომარის მოადგილეს ავთანდილ მექვაბიშვილს ესაუბრა, რომელიც 2008 წელს ოზურგეთის რაიონის გამგებელი იყო და სწორედ მან მოაწერა ხელი პროექტის ჩაბარების აქტს:
_ მუნიციპალიტეტმა ჩაიბარა შემოქმედის თვითდინებითი წყალსადენი, სადაც, დაახლოებით 4 მილიონამდე ლარი დაიხარჯა. რაც შეეხება შემოქმედის წყალსადენს, რომელიც დაპროექტებული იქნა სპეციალისტების მიერ, მისი გამწმენდი ნაგებობა დგას შემოქმედში და თვითდინებითია. წყაროს წყლით ვერ უზრუნველყოფ ამხელა ქალაქს, ამიტომ, ბუნებრივია, წყალსადენი მდინარეზე უნდა იყოს. ეს წყალსადენი ჩავიბარეთ და პროექტით გათვალისწინებული ყველა სამუშაო შესრულებულია. ამ წყალსადენით წყალი მიიღო ქალაქმა და იღებს დღესაც.
_ როგორც “თავისუფალი დემოკრატები” ამბობენ, პროექტის მიხედვით, ქალაქ ოზურგეთის მოსახლეობა უზრუნველყოფილი უნდა ყოფილიყო 24_საათიანი წყალმომარაგებით.
_ ეს არის ტყუილი. როგორ შეიძლება, თვითდენითმა წყალსადენმა უზრუნველყოს ქალაქი წყლით, როდესაც ის ფუნქციონირებს რვა_ცხრა თვეს?
_ ოპოზიცია ამბობს, რომ წყალი უნდა ყოფილიყო თვითდენითი, ხარისხიანი და არა დამოკიდებული სეზონურობაზე…
_ ვინც ეს თქვა, პროექტს არ იცნობს. ეს არის თვითდენითი წყალსადენი, მიერთებულია მდინარეზე და გამწმენდი ნაგებობა წმენდს მხოლოდ იმ წყალს, რომელიც არ არის 10%_ზე მეტად ამღვრეული. 10%_ზე ზემოთ თუ იქნება, იკეტება, შესაბამისად, იმის თქმა, რომ თვითდენითმა წყალსადენმა ქალაქი მუდმივად უნდა მოამარაგოს წყლით, სისულელეა. პროექტით ეს არ იყო გათვალისწინებული.
_ “თავისუფალი დემოკრატები” პროექტის ჩავარდნაზე საუბრობენ და არსებული რეალობიდან გამომდინარე, ეჭვი შეაქვთ ექსპერტიზის დასკვნაში. რაზე აწერს ხელს იმჟამინდელი გამგებელი და რამდენად შეესაბამება, თუნდაც მაშინდელ რეალობას პროექტის შესრულების ხარისხი?
_ რბილად ვიტყვი _ ბატონი თემურ სალუქვაძე ამ თემაში აბსოლუტურად გაურკვეველია. ჩვენ ხელი მოვაწერეთ იმას, რომ თვითდენითი წყალსადენი მუშაობს გამართულად. პროექტი აბსოლუტურ პარამეტრებს აკმაყოფილებს, გაკეთდა წყალსადენი, ბუნებრივი ფილტრატები, რეზერვუარები. თუ ქალაქი წყალს არ იღებს კარგად, ეს არის ძალიან მოძველებული შიდა სისტემის ბრალი. რაც მთავარია, ამ სისტემების რეაბილიტაცია დაწყებულია და ბევრგან შეიცვალა, მაგრამ ყველგან _ არა. გაცრეცილია ქალაქის შიდა წყალმომარაგების სისტემა, ანუ ბევრი წყალი იკარგება. შესაბამისად, წყალს, ამ დაცრეცილი მილებიდან, ერევა ათასგვარი სიბინძურე, რომელიც არ არის შემოქმედის თვითდინებითი წყალსადენიდან შემოტანილი _ იქ იფილტრება, იქლორება, ხდება დამუშავება და ქალაქში შემოდის სუფთა წყალი. შემოქმედის წყალსადენი რომ არ ყოფილიყო, მოსახლეობა წყურვილით ამოწყდებოდა!
