“ბედნიერი ვარ, რომ ჩოხატაურის თეატრში მომიწვიეს”

ნელი ბასილაშვილი ოზურგეთის ალექსანდრე წუწუნავას სახელობის სახელმწიფო თეატრის ერთ-ერთი წამყვანი მსახიობია. წარმატებით განასახიერა როლები: ნუციკო _ ჭილაძის “სურათები საოჯახო ალბომიდან,” ფუსუცია _ კლდიაშვილის “ქამუშაძის გაჭირვება,” ია _ იოსელიანის “ექვსი შინაბერა და ერთი მამაკაცი,” პელაგია _ კლდიაშვილის ” დარისპანის გასაჭირი,” ოლღა _ ბათიაშვილის “ლალი, სიყვარული და სხვები,” დარეჯანი _ არეშიძის “შვილები და რძლები” და სხვა.

ნელი ბასილაშვილი სიღნაღის სოფელ ანაგაში დაიბადა. იგი ჯერ კიდევ სკოლის პერიოდში გაეცნო კოტე მარჯანიშვილისა და სანდრო ახმეტელის შემოქმედებას, რამაც მასზე განსაკუთრებული ზემოქმედება მოახდინა. სკოლის დრამატულ წრის აქტიური წევრი გახდა. სკოლის დამთავრების შემდეგ სწავლა განაგრძო თბილისის სერგო ზაქარიაძის სახელობის კულტურულ-საგანმანათლებლო სასწავლებელში (თეატრალური განყოფილება), რომლის დამთავრების შემდეგ, გაანაწილეს ზუგდიდის თეატრში, შემდეგ კი გადადის ოზურგეთის სახელმწიფო თეატრში, სადაც დღემდე მოღვაწეობს და მაყურებელს ხიბლავს თავისი უშუალო და ინდივიდუალური მანერით შესრულებული როლებით.

_ ქალბატონო ნელი, თქვენ 1971 წელს მიხვედით ოზურგეთის თეატრში, როგორ გაიხსენებთ ამ პერიოდს?

_ ძალიან კარგად მახსენდება ეს დრო; თეატრში არაჩვეულებრივი შემოქმედებითი ატმოსფერო სუფევდა. რეჟისორმა გურამ აბესაძემ, რომელიც ძალიან კეთილშობილი პიროვნება და შესანიშნავი რეჟისორი იყო, გულთბილად მიმიღო, გამაცნო თეატრის დასი და მეორე დღესვე როლზე გამანაწილა. ამ დღიდან შეიძლება ითქვას არ ჩამიმუხლავს. მაქსიმალურად ვცდილობ ჩემი საყვარელი მაყურებელი გავახარო და იმედი არ გავუცრუო.

_ ქალბატონო ნელი, ამჟამად ჩოხატაურის სახალხო თეატრის სპექტაკლში ნოდარ დუმბაძის “სისხლის ძახილი” მონაწილეობთ, სადაც რამდენიმე როლს ასრულებთ.

_ დიახ, ძალიან ბედნიერი ვარ, რომ ჩოხატაურის თეატრის სპექტაკლში მომიწვიეს. შესანიშნავი შემოქმედებითი ჯგუფია შეკრებილი. რაც შეეხება რეჟისორ გოგი ცინცაძეს, მე მას ოზურგეთის თეატრიდან ვიცნობ, სადაც ის წლების მანძილზე მუშაობდა და არაჩვეულებრივი მსახიობების გვერდით დასამახსოვრებელ სახეებს ქმნიდა. ძალიან დიდი შრომა ჩადო ამ სპექტაკლში. ნოდარ დუმბაძის ნაწარმოებები ერთი შეხედვით შეიძლება ადვილი მოგეჩვენოთ, მაგრამ მასზე მუშაობა ურთულესია _ ყველა ნიუანსს თავისებური ფსიქოლოგიური დატვირთვა აქვს. ჩვენ მაქსიმალურად ვეცდებით, რომ სათანადო დონეზე წარვდგეთ ჩოხატაურის თეატრის მოყვარე საზოგადოების წინაშე. ვიმედოვნებთ, რომ ეს სპექტაკლი როგორც რეჟისორული, ასევე საშემსრულებლო თვალსაზრისით, ერთ-ერთ წარმატებულ სპექტაკლად ჩაიწერება ჩოხატაურის სახალხო თეატრის ისტორიაში.