(გურია ნიუსი, ჩოხატაური) _ ჩოხატაურის კინო-სახლის ფოიეში არჩილ კუტალაძის ნამუშევრების პერსონალური გამოფენა მოეწყო. გამოფენაზე ძირითადად წარმოდგენილი იყო მხატვრის ფერწერული ნახატები მრავალფეროვანი თემატიკით: გურული პეიზაჟები და ტიპაჟები, ძველი თბილისის ხედები, ნატურმორტები, აბსტრაქცია, რომლებშიც ძირითადად გურული მოტივები დომინირებდა. არჩილ კუტალაძის შემოქმედების შესახებ ისაუბრეს კულტურის სამსახურის ხელმძღვანელმა დოდო მამალაძემ, სამხატვრო სკოლის დირექტორმა მზია კვინტრაძემ, რეჟისორებმა ვასილ ჩიგოგიძემ და ირაკლი აზიკურმა, ჩოხატაურის მაჟორიტარმა დეპუტატმა კორნელი კუკულავამ, ადგილობრივი ხელისუფლების წარმომადგენელმა ზაურ ოსეფაიშვილმა და სხვებმა. გამოფენის გახსნას ესწრებოდნენ მხატვარი ზაალ სულაკაური და ალექსანდრე ციხელაშვილი.
ზაალ სულაკაური: _ გურია ძალიან მიყვარს. ბებია მყავდა აქაური _ რამიშვილის ქალი იყო სურებიდან, ძალიან მჭევრმეტყველი და სოცარი იუმორის მქონე ადამიანი. არჩილმა რომ დამპატიჟა ჩოხატაურში, ძალიან გამიხარდა და იმწამსვე დავეთანხმე. ძალიან მიხარია, რომ ასეთ შესანიშნავი საზოგადოება გყავთ; რაც შეეხება აჩიკოს, მისი ნამუშევრები მართალი, ალალი და სიკეთით სავსეა. მინდა ყოველივე საუკეთესო ვუსურვო მას და მთელ გურიას.
ალექსანდრე ციხელაშვილი: _ არჩილი უდავოდ ნიჭიერი მხატვარია; ამასთან, მინდა აღვნიშნო მისი უდიდესი შრომისმოყვარეობა, თავდადება და უსაზღვრო სიყვარული თავისი საქმისადმი. ის ჯერ ახალგაზრდაა და მჯერა, რომ თავის სიტყვას იტყვის ქართულ სახვით ხელოვნებაში. მადლობა ამ კუთხეს, რომ ასეთი ნიჭიერი ხელოვანი და კეთილშობილი პიროვნება აღზარდა.
