ჩოხატაურის მუნიციპალიტეტის საკრებულოს ყოფილი თავმჯდომარე ვლადიმერ სიხარულიძე, რომელიც გასულ წელს, რამდენიმე თვის განმავლობაში, გამგეობის ზედამხედველობის სამსახურის უფროსი იყო, ჩოხატაურის პოლიციამ 19 ივლისს, დაბა ჩოხატაურის ცენტრში დააკავა _ სიხარულიძეს ბრალი ადმინისტრაციულ სამართალდარღვევათა კოდექსის 166-ე და 173-ე მუხლებით წაუყენეს.
ჩოხატაურის პოლიციის სამმართველოს საგამოძიებო მასალების თანახმად, 2011 წლის 19 ივლისს, 17 საათსა და 30 წუთზე, სიხარულიძე ავტომანქანით ჩოხატაურის ცენტრში გააჩერეს: “ვლადიმერ სიხარულიძემ სიტყვიერი შეურაცხყოფა მიაყენა პოლიციის თანამშრომლებს და არ დაემორჩილა პოლიციელთა კანონიერ მოთხოვნას, შეეწყვიტა აღნიშნული ქმედება. აღნიშნულის შემდეგ, შსს გურიის სამხარეო მთავარი სამმართველოს ჩოხატაურის რაიონული სამმართველოს თანამშრომლების მიერ იგი იქნა დაკავებული და შედგენილი იქნა ადმინისტრაციული სამართალდარღვევის ოქმი #ბბ 065574”, _ წერია საქმის მასალებში.
სასამართლო პროცესი, 20 ივლისს, ჩოხატაურის საავადმყოფოს პალატაში იმ მიზეზით გაიმართა, რომ გულზე ახალ ნაოპერაციები სიხარულიძე, პოლიციაში ცუდად გახდა და ის სასწრაფო სამედიცინო დახმარების მანქანით, საავადმყოფოში დაკავების დღესვე გადაიყვანეს.
სასამართლო პროცესზე, ინსპექტორ-გამომძიებელმა თემურ მდინარაძემ განმარტა, რომ ვლადიმერ სიხარულიძის მიმართ შედგენილი მასალები ნამდვილია და აღნიშნა, რომ სიხარულიძემ მას სიტყვიერი და ფიზიკური შეურაცხყოფა მიაყენა.
სასამართლომ, როგორც მოსალოდნელი იყო, მიიჩნია, რომ სამართალდარღვევის ფაქტი დადასტურებულია საქმეში არსებული მასალებით. სასამართლომ, რატომღაც, მიზანშეწონილად არ ჩათვალა, დაეკითხა ის ადამიანები, რომლებიც სიხარულიძის დაკავებას შეესწრნენ და საჯაროდ აფიქსირებენ, რომ მას პოლიციელებისთვის არც სიტყვიერი და არც ფიზიკური შეურაცხყოფა არ მიუყენებია. უფრო მეტიც, თვითმხილველები ამბობენ, რომ სიხარულიძემ პატრულს ოქმის დასაწერად საბუთები გადასცა, თავად კი მაღაზიაში შევიდა. მისი მაღაზიაში ყოფნის პერიოდში სამართალდამცველებმა კონსულტაციები ტელეფონით გაიარეს, სავარაუდოდ, ზემდგომთან და მაღაზიიდან გამოსული სიხარულიძე დააკავეს კიდეც.
თუმცა, როგორც აღვნიშნეთ, სასამართლო ამით არ დაინტერესებულა და მდინარაძის ჩვენების საფუძველზე, ვლადიმერ სიხარულიძე საქართველოს ასკ-ის 199-ე და 173-ე მუხლით (ხულიგნობა და პოლიციელისთვის წინააღმდეგობის გაწევა) დამნაშავედ ცნო _ მას 400-ლარიანი ჯარიმის გადახდა დაეკისრა.
ვლადიმერ სიხარულიძე ჩვენთან საუბრისას ამბობს, რომ პოლიციელებს მისი დაკავება გაცილებით ადრე სურდათ:
_ პოლიციაში, უფროსის მოადგილემ, ვინმე დოლიძემ, “დამამადლა” _ აპრილის დასაწყისში უნდა დაგვეკავებინეო. იმ დროს რაღაც ინციდენტს მართლაც ჰქონდა ადგილი _ 31 მარტს, ოზურგეთში, ჩატარდა სასამართლო, სადაც მე გამგებელს, გია გიორგაძეს სამსახურიდან უკანონოდ გათავისუფლებაში ვადანაშაულებდი. სასამართლომ გიორგაძე გაამართლა. გადაწყვეტილება სააპელაციოში გავასაჩივრე. ამავე პერიოდში ჩავატარე პრესკონფერენცია, სადაც იმ კანონდარღვევებზე ვისაუბრე, რომელსაც ადგილი ჰქონდა ჩოხატაურის მუნიციპალიტეტის გამგეობაში. აღვნიშნე უმოქმედო საკრებულოს შესახებაც, რომელმაც ჩემი განცხადება, რომ სამსახურიდან უკანონოდ ვიყავი გათავისუფლებული არც კი განიხილა. სწორედ ამ პერიოდში დაიწყეს ჩემი დევნა. ორი დღის განმავლობაში დამდევდა პოლიცია. 15-ში თუ 16 აპრილს გამაჩერეს გამგეობის წინ, იყო იგივე შემადგენლობა, რომელმაც 19 ივლისს დამაკავა. მიზეზიც იგივე ჰქონდათ _ ღვედი არ გეკეთაო. მაშინ აბსოლუტურად უკანონოდ გამაჩერეს და პატრულმა ვერ გაბედა დავეკავებინე, ან დავალება არ ჰქონდათ. გადაურეკეს უფროსობას და გამიშვეს. მე მაშინვე ავედი მაჟორიტარ დეპუტატთან და ჩავაყენე საქმის კურსში, დავანახე ვინ და როგორ დამდევდა. ის, რომ პოლიციის უფროსის მოადგილე დოლიძე აპრილის მერე ჩემს დაკავებას აპირებდა, ფაქტია და ეს მითხრა კიდეც. 19 ივლისს, მთელი დღის განმავლობაში დამყვებოდა უკან ე.წ. მოქალაქის (მის ვინაობას შეგნებულად არ ვასახელებ) ავტომობილი. დაბის ცენტრში ქატო ვიყიდე და პურის საყიდლად ვაპირებდი მეორე მაღაზიაში შესვლას. ღვედი მართლა არ მეკეთა და როგორც კი პატრულმა გამაჩერა, საბუთები ყოველგვარი წინააღმდეგობის გარეშე გადავეცი. ვუთხარი, რომ ოქმი დაეწერათ, რადგან ეს თანხა (40 ლარი) ჩემი დიდხნიანი დევნისთვის “ჯილდოდ” ნამდვილად ეკუთვნოდათ და ხელს მოვუწერდი. დავუტოვე საბუთები და მაღაზიაში შევედი. მაღაზიიდან გამოსულმა ვუთხარი, რომ ოქმი მოეცათ ხელის მოსაწერად. პატრულმა მდინარაძემ მიპასუხა, ოქმი კი არა, პოლიციაში უნდა წამოხვიდეთ, რაღაც არის გასარკვევიო. იქ მეორე პოლიციელიც იყო, გვარად ჟღენტი. რატომ,-მეთქი, ვკითხე. ასეა საჭიროო და ხელი მომკიდეს. თითქოს მსოფლიო დონის დამნაშავე ვიყავი, ისე ცდილობდნენ მანქანაში ჩავეტენე. სწორედ ამ დროს ვუთხარი, თავხედობთ,-მეთქი. რად მინდოდა ჭიდაობა, ჩემი ფეხით წავიდოდი _ ვერ ავიტანე, ნაძირალასავით რომ მომექცნენ. 27 წელი ვიმუშავე ამ რაიონში და ჩემი ნაგინები და შეურაცხყოფილი კაცი არავის ახსოვს. თუ პოლიცია პრინციპულ პოზიციას და გინებას შორის განსხვავებას ვერ ხედავს, ეს უკვე სხვა თემაა, _ ამბობს სიხარულიძე.
ჩვენი რესპონდენტი ყვება, რომ პოლიციის უფროსის მოადგილემ წამლის დალევის საშუალება არ მისცა და სასწრაფო სამედიცინო სამსახური დაგვიანებით, მას შემდეგ გამოიძახეს, რაც მისი ჯანმრთელობის მდგომარეობა ძალიან გართულდა:
_ საავადმყოფოში რომ გადამიყვანეს, თითქმის ნახევარი პოლიცია გამომყვა. როცა პალატაში დამაწვინეს, პატრულმა ჟღენტმა ენა გამომიყო, მაინც ხომ დაგიჭირეთო(?!). ჯერ გამეცინა, მერე გავბრაზდი, მაგრამ რა უნდა ელაპარაკო ასეთ პოლიციელს? მოდის და სახელმწიფოს სახელით გელაპარაკება, მერე ამას პოლიციის უფროსი “უპრავებს”. ამაზე დიდი შეურაცხყოფა რა უნდა იყოს?!
სიხარულიძე ამბობს, რომ ჩოხატაურში პოლიციის კრიმინალიზაციაა დაწყებული:
_ ამ დაკავებით პოლიციამ მე კი არ მომაყენა შეურაცხყოფა, არამედ თავად პოლიციას, საზოგადოებას, ჩოხატაურელებს. როცა ხელი მომკიდეს მანქანაში ჩასასმელად, ვუთხარი, პატივი ეცით რაიონს, თქვენს სამსახურს და ჩემს ასაკს,-მეთქი. მათ თავიანთი საქციელით დაამტკიცეს, რომ ჩოხატაურის პოლიცია პოლიტიზირებულია, მაგრამ უბედურება ისაა, რომ დაწყებულია ჩოხატაურის პოლიციის კრიმინალიზაცია. ამიტომ, მაჟორიტარ დეპუტატს, საკრებულოს წევრებს, საზოგადოებას, ოპოზიციას მივმართავ, რომ რაღაც ფორმა იქნას შემუშავებული, რათა ჩოხატაურელები დაცული იქნან ჩოხატაურის პოლიციისგან, რომელიც უხეშად არღვევს ადამიანის უფლებებს. “მხედრიონის” დროსაც კი არ ყოფილა ისეთი ხმაურიანი დაკავებები, როგორი ფორმითაც მე დამაკავეს. პოლიციას ძალიან დიდი უფლებები აქვს. პოლიციაში მოდიან მაჟორიტარი დეპუტატი, საკრებულოს თავმჯდომარე, გამგებელი, პარტიის აღმასრულებელი მდივანი _ მათ ეუბნებიან, რომ მხოლოდ 40-ლარიანი ჯარიმა ექნება გადასახდელიო და მერე ეს თანხა 400 ლარამდე აჰყავთ. შეიძლება ის მე მთვლის კრიმინალად, მაგრამ მან ჩოხატაური, სადაც მუშაობს, ფეხებზე დაიკიდა. საავადმყოფოში იყვნენ ექიმები, რომლებიც საკრებულოს წევრები არიან. მე ვუთხარი გარკვევით, რომ პოლიციის ასეთი სითავხედე მათი ბრალია, რადგან ამდენ თანხას უკანონოდ აძლევენ პოლიციას.
ვლადიმერ სიხარულიძე ფიქრობს, რომ პატრული მდინარაძე, პროცესის წინ, საგანგებოდ იყო დარიგებული.
_ პროცესზე ჩემი ოზურგეთელი მეგობრები იყვნენ ამოსულები. პატრულმა მდინარაძემ განაცხადა, თითქოს, მე არა მატრო მას, არამედ ყველა ოზურგეთელს მივაყენე შეურაცხყოფა და ვუთხარი, ყველა ოზურგეთელის დედა…,-მეთქი. მე ამის მთქმელი კაცი არ ვარ _ ბევრი ოზურგეთელი მეგობარი მყავს და მათ დიდ პატივს ვცემ. ხშირად ვაკრიტიკებ სამხარეო ადმინისტრაციას და ვამბობ, რომ ისინი უკანონოდ ერევიან ადგილობრივი თვითმმართველობის კომპეტენციებში. ალბათ, უთხრეს პროცესზე თქვი, რომ სიხარულიძემ სამხარეო აგინაო; მდინარაძემ ეს მის ჭკუაზე მოთარგმნა და სისულელე თქვა.
ფაქტია, რომ იმ ეკიპაჟს, რომელმაც მე დამაკავა, დიდი ხანია ჰქონდათ ეს დავალებული. შეიძლება ეს ვერ დავამტკიცო, მაგრამ ასეა.
ჩვენი რესპონდენტი ერთ საკმაოდ მნიშვნელოვან გარემოებაზეც ამახვილებს ყურადღებას და ამბობს, რომ დაკავების ოქმი 20 ივლისს შეადგინეს: _ 19-ში დამაკავეს და ოქმი 20-ში, სასამართლოს დაწყებამდე რამდენიმე წუთით ადრე დაწერეს. პალატაში მომიტანეს ხელის მოსაწერად. ბუნებრივია, არ მოვუწერე, მაგრამ ეს მათთვის არანაირი დაბრკოლება არ არის. მოსამართლე ზვიადაძეს, რომელიც, როგორც ჩანს, დავალებებს კარგად ასრულებს, ვუთხარი, რომ ეს არის გაგრძელება იმ გადაწყვეტილებისა, რომელიც მან მიიღო და რომლის თანახმადაც, თითქოს გიორგაძემ ჩემი გათავისუფლების ბრძანებას კანონიერად მოაწერა ხელი, _ აღნიშნა სიხარულიძემ.
