“გკოცნით, გეფერებით, მთებო და ველებო, ჩემო ბუკისციხევ, ბუკისციხელებო!”

(გურია ნიუსი, ჩოხატაური) _ ჩოხატაურის მუნიციპალიტეტის სოფელი ბუკისციხე, რომელიც ერთ-ერთი გამორჩეულია აღმოსავლეთ გურიის სოფელთა შორის, თავისი ბუნებრივი სილამაზითა და კეთილშობილი ხალხით, მართლაც იმსახურებს გამორჩეულ პატივისცემასა და გულწრფელ სიყვარულს. აღნიშნულის მეტად ორიგინალური გამოხატულება იყო 2011 წლის 13 აგვისტოს, უკვე მეორედ გამართული სახალხო ზეიმი “ბუკისციხელობა”, რომელშიც მონაწილეობას იღებდა მთელი სოფელი, სოფლიდან დროებით თუ მუდმივად წასული ადამიანები და მოწვეული სტუმრები.

სოფლის დღესასწაულს საფუძველი 2010 წელს ჩაეყარა და მისი ორგანიზატორები იყვნენ სოფლიდან წასული ბიზნესმენები და ცნობილი ადამიანები _ თამაზ ძაგნიძე, დემურ სიხარულიძე, გულსუნდა სიხარულიძე, გიორგი სიხარულიძე, ბეგლარ სიხარულიძე, თეიმურაზ შარაშიძე, კოტე შარაშიძე, ვახტანგ შარაშიძე, გურამ შარაშიძე, გიორგი შარაშიძე. ღონისძიება სპორტული შეჯიბრებებით დაიწყო. ყველა გამარჯვებული საინიციატივო ჯგუფის წევრებმა მედლებითა და ფასიანი საჩუქრებით დააჯილდოვეს. საჩუქრები გადაეცათ სოფლის უხუცეს ადამიანებს, რომელთა დამსახურებაცაა სოფლის ისტორიის შექმნა და ტრადიციების დღემდე მოტანა: ელენე შარაშიძე, დარეჯან დიდია, ნატაშა სიმონია, ელვასი სიხარულიძე, აკაკი ჩხიკვაძე… ქსენია ბარამიძესა და ლავროსი ჩხიკვაძეს წელს მიენიჭათ სოფლის უხუცესის წოდება და გადაეცათ საჩუქრები. დღესასწაულის ინიციატორებს არც ერთ წლამდე პატარები დავიწყებიათ _ იოანე, ნინო და საბა სიხარულიძეებს გადაეცათ ასაკის შესაფერისი საჩუქრები. დღესასწაულზე დაჯილდოვდნენ მრავალშვილიანი დედებიც _ ლელა ლობჟანიძე და ნინო სიხარულიძე. შეკრებილებმა გულისტკივილით გაიხსენეს გარდაცვლილი ბუკისციხელები, რომლებმაც ნათელი კვალი დატოვეს ბუკისციხის ისტორიაში. ღონისძიება გაალამაზეს ბუკისციხის საჯარო სკოლის მოსწავლეთა მიერ წაკითხულმა ლექსებმა, მათ მიერ შესრულებულმა სიმღერებმა და ცეკვებმ. სკოლის კურსდამთავრებულებს ატესტატები გადასცა და სკოლის დამთავრება მიულოცა სკოლის დირექტორმა ციალა მახარაძემ. ბუკისციხელებს დღესასწაული მიულოცა ანსამბლმა “გურიამ”. ბუკისციხელთა ზეიმს თავისი მნიშვნელოვანი ხმა შეუერთა კულტურის დამსახურებულმა მუშაკმა, ფაზისის საერო აკადემიის გურიის რეგიონალური ორგანიზაციის კოორდინატორმა, რევაზ თედორაძემ.

ღონისძიების კულმინაცია გახლდათ უნიჭიერესი ქალბატონის, სოფლის რძლის _ მარინა თავართქილაძის მიერ მომზადებული და ბუკისციხელი ახალგაზრდების მიერ შესრულებული საკონცერტო პროგრამა. ნანახითა და მოსმენილით აღტაცებას ვერ მალავდნენ იტალიელი სტუმრები.

მფარველობას ბუკისციხელებს სოფლის ცენტრში აღმართული იოანე ნათლისმცემლის სახელობის ეკლესია გაუწევთ, რომლის წმინდა კედლებში მამა ბიქტორის (გიორგაძე) მიერ აღვლენილი წირვა-ლოცვა იყო ბუკისციხელობის ძალისა და ენერგიის მიმცემი.