ოზურგეთის მუნიციპალიტეტის საკრებულომ სახელმწიფოს სასარგებლოდ ქონება კიდევ ერთხელ მიატოვა.
ამჯერად, საკრებულოს დეპუტატების გადაწყვეტილებით, დაბა ნარუჯის ტერიტორიაზე მდებარე გამანაწილებელი სადგურისა და მაღალი წნევის მილსადენი სახელმწიფოს სასარგებლოდ მიატოვეს.
როგორც საკრებულოს ინფრასტრუქტურის განვითარების კომისიის თავმჯდომარე, თამაზ სალუქვაძე განმარტავს, გადაწყვეტილება საქართველოს რეგიონების ბუნებრივი აირით მომარაგების უზრუნველყოფისა და შესაბამის დარგში ინვესტიციების მოზიდვის მიზნით მიიღეს.
როგორც სალუქვაძემ ჩვენთან საუბარში აღნიშნა, ქონების მიტოვებისას, გარდა ზემოთ ჩამოთვლილი ფაქტორებისა, ეკონომიკისა და მდგრადი განვითარების სამინისტროს წერილობითი თხოვნაც გაითვალისწინეს.
როგორც კომისიის თავმჯდომარე ირწმუნება, მილსადენის მიტოვების შემდეგ, ნავთობისა და გაზის კორპორაცია უზრუნველყოფს დაბა ნარუჯის, დაბა ლაითურის მოსახლეობისა და სოფელ ლიხაურის ტერიტორიაზე მდებარე დიდი წარმადობის მქონე ასფალტ-ბეტონის ქარხნის ბუნებრივი აირით მომარაგებას.
აღსანიშნავია, რომ ოზურგეთის მუნიციპალიტეტის საკრებულომ, ზუსტად ერთი წლის წინ, ქობალიას უწყებას ორმილიონნახევარი ლარის ქონება აჩუქა.
როგორც “გურია ნიუსი” გასულ წელს წერდა, ეკონომიკის მინისტრის მოადგილის, დავით გიორგაძის ხელწერით, შეტყობინება ოზურგეთის მუნიციპალიტეტის საკრებულომ 30 აგვისტოს მიიღო. ოფიციალური წერილის თანახმად, მდგრადი განვითარების სამინისტრომ ოზურგეთის მუნიციპალიტეტის საკრებულოს აცნობა, რომ მის უწყებაში “შესულია შპს “სოკარ ჯორჯია გაზის” 2010 წლის 2 აგვისტოს წერილი, რომელშიც, საქართველოს პრეზიდენტის განკარგულების საფუძველზე (“საქართველოს რეგიონების ბუნებრივი აირით მომარაგების უზრუნველყოფისა და შესაბამის დარგში ინვესტიციების მოზიდვის მიზნით გასატარებელ ღონისძიებათა შესახებ”) და მის საფუძველზე გაფორმებული ხელშეკრულებით ნაკისრი ვალდებულებების შესრულების უზრუნველსაყოფად, ადგილობრივი მუნიციპალიტეტების საკუთრებაში დანართში მითითებული მილსადენების პირდაპირი მიყიდვის ფორმით პრივატიზების თაობაზე. ყოველივე ზემოაღნიშნულიდან გამომდინარე, გთხოვთ, უზრუნველყოთ წერილის დანართში მითითებული ქონების მიტოვება სახელმწიფოს სასარგებლოდ”, _ ეწერა ვერა ქობალიას უწყებიდან გამოგზავნილ წერილში.
ოზურგეთის მუნიციპალიტეტის საკრებულომ საკუთრებაში არსებული ქონების მილსადენების სახელმწიფოს სასარგებლოდ საკუთრების უფლების მიტოვების შესახებ გადაწყვეტილება, 2010 წლის 1 სექტემბერს მიიღო.
“გურია ნიუსთან” საუბარში ეკონომიკის ექსპერტი დავით ნარმანია ამბობდა, რომ მართალია, გაზიფიცირება ადგილობრივი თვითმმართველობის ფუნქცია არ არის, თუმცა, არსად წერია, რომ დაუშვებელია ქონებას ფლობდეს ამ მიმართულებით.
“მუნიციპალიტეტს არ უნდა მიეღო ქონების მიტოვების შესახებ გადაწყვეტილება. ამ გადაწყვეტილებით, მან დაკარგა პოტენციური შემოსავალი ბიუჯეტისა და თავისი ამომრჩევლების სასარგებლოდ”, _ გვეუბნებოდა ზუსტად ერთი წლის წინ დავით ნარმანია.
მისივე თქმით, ასე ღირებული ქონება კომპენსაციის გარეშე არც ერთი უწყებისთვის არ უნდა დაეთმოთ: _ როცა კონტროლის პალატა შემოვა მუნიციპალიტეტში, აუცილებლად დასვამს საკრებულოს თავმჯდომარის პასუხისმგებლობის საკითხს, _ გვითხრა ეკონომიკის ექსპერტმა.
