რა ხდება იმ შემთხვევაში, როცა გამგებლის მოადგილეები საკრებულოს თავმჯდომარეს გამგებლის მოვალეობის შესრულებაზე უარს ეუბნებიან? სხვა საკითხია, შესთავაზა თუ არა მათ საკრებულოს თავმჯდომარემ მოვალეობის შესრულება, თუნდაც ფორმალურად, რადგან, როგორც ოფიციალური დოკუმენტებიდან ირკვევა, გამგებლის ორმა მოადგილემ ერთობლივი, მეტად “საინტერესო” შინაარსის განცხადებით, საკრებულოს კანცელარიას 23 აგვისტოს მიმართეს: “ვაცხადებთ უარს ოზურგეთის მუნიციპალიტეტის გამგებლის მოვალეობის შესრულებაზე”, _ ვკითხულობთ განცხადებაში.
ამ ერთწინადადებიან განცხადებაზე ხელი გოგოტიშვილს და ღლონტს მას შემდეგ მოაწერინეს, რაც 22 აგვისტოს, საკრებულოს რიგგარეშე სხდომამდე ერთი ერთი დღით ადრე, “გურია ნიუსი” დაინტერესდა, იყო თუ არა სარეგისტრაციო ჟურნალში მათი განცხადება გატარებული. როგორც გაირკვა, საკრებულოს კანცელარიაში მსგავსი შინაარსის შეტყობინება 22 აგვისტოს შესული არ იყო. აქვე გვინდა აღვნიშნოთ, რომ ლავრენტი ქვილორიას განცხადებაც ამავე დღეს გატარდა კანცელარიაში, რომელიც საკრებულოს თავმჯდომარეს 23 აგვისტოს დაუკმაყოფილებია. ამავე დღესვე გამოიცა განკარგულება ილია ვაშაყმაძის გამგებლის თანამდებობაზე შემსრულებლად დანიშვნის თაობაზე _ იგი მოვალეობის შემსრულებლად, განსაზღვრული ვადით, ტაკიძის სამსახურში გამოსვლამდე, ან მისი თანამდებობიდან გათავისუფლებამდე დაინიშნა.
ოპოზიციონერი ლელა ნაცვალაძე ფიქრობს, რომ ეს განცხადებები ფორმალური ხასიათისაა და მოადგილეებისთვის არავის უკითხავს, შეასრულებდნენ თუ არა გამგებლის მოვალეობას, ან კიდევ რატომ უნდა ეკითხათ, როცა ამას მათ კანონი ავალდებულებდათ.
ოპოზიციონერის ამ არგუმენტს, საკრებულოს რიგგარეშე სხდომაზე საკრებულოს თავმჯდომარის მიერ გაკეთებული განცხადებებიც ამყარებს _ როგორც ალეკო მამეშვილმა ტრიბუნიდან დეპუტატებს განუცხადა, კანდიდატურის არჩევა არ იყო ადვილი: “ჩვენ გვინდა დავნიშნოთ ისეთი კანდიდატურა, რომელსაც შეიძლება ენდო და მე შემიძლია ის უსირცხვილოდ, უკაცრავად, თამამად წარვუდგინო საკრებულოს. ეს კანდიდატურა არ არის უცხო ფრაქციის და ბიუროს წევრებისთვის, რამდენადაც ჩემი მხრიდან დაცული იქნა ყოველგვარი პროცედურა”, _ აღნიშნა მამეშვილმა 23 აგვისტოს და დასძინა, რომ “ძალიან დიდი შრომაა გასაწევი, ამ სიტუაციას რომ თავი მოეყაროს, არიან ადამიანები, რომლებიც სარგებლობენ უფრო მეტი ნდობით. ჩვენი ერთადერთი მინუსი იყო ზედმეტი ნდობა. არის ადამიანი, ან ადამიანთა ჯგუფი, რომლებმაც შეიძლება ისარგებლონ ჩვენი ნდობით. ამან გამოიწვია უხერხულობა და უნდა ვყოფილიყავით ბევრ შემთხვევაში მკაცრი”, _ მოუბოდიშასავით ამომრჩევლებს მამეშვილმა.
როგორც “გურია ნიუსთან” საუბარში ქვილორიამ თქვა, მან იცოდა, რომ კანდიდატის მონახვამდე, მოადგილეს უნდა შეესრულებინა გამგებლის მოვალეობა, მაგრამ თუ ეს ვალდებულება სამ-ოთხ თვეს გაგრძელდებოდა, ვადებში ვერ ჩაეტეოდა, რადგან რეაბილიტაციის კურსი აქვს გასავლელი; რაც შეეხება გამგებლის კიდევ ერთ მოადგილეს, ლაშა ღლონტს, იგი ამბობს, რომ იყო საუბრები, თუმცა, თავი შეიკავა; კიდევ ერთი მოადგილე _ მიხეილ გოგოტიშვილი ზუსტ დროს ვერ ასახელებს, თუ როდის შეიტანა განცხადება კანცელარიაში. არადა, მას ამ კითხვით ზუსტად იმ დღეს მივმართეთ, როცა კანცელარიაში მისი ხელმოწერით შევიდა განცხადება.
როგორც “საერთაშორისო გამჭვირვალობა _ საქართველოს” დირექტორი ეკა გიგაური “გურია ნიუსთან” საუბარში ამბობს, გამგებლის არყოფნისას, მის მოვალეობას საკრებულოს თავმჯდომარის დავალებით ასრულებს გამგებლის მოადგილე. ეს მისი მოვალეობაა და ამ მოვალეობის შესრულებაზე უარის თქმა, შესაძლებელია, გახდეს მისი განთავისუფლების საფუძველი: “ადგილობრივი თვითმმართველობის შესახებ” საქართველოს ორგანული კანონის 39-ე მუხლის მე-4 ნაწილის შესაბამისად, გამგებლის არყოფნისას, მის მიერ უფლებამოსილების გახორციელების შეუძლებლობისას, ან თანამდებობიდან მისი გადადგომისას ან გათავისუფლებისას, გამგებლის მოვალეობას, საკრებულოს თავმჯდომარის დავალებით, ასრულებს გამგებლის მოადგილე. რაც შეეხება საკუთარი ინიციატივით გადადგომას, “საჯარო სამსახურის შესახებ” კანონის 95-ე მუხლის შესაბამისად, “პირი თავისი ინიციატივით თავისუფლდება სამსახურიდან, თუ მისი სამსახურში მიღების უფლების მქონე მოხელე ან დაწესებულება დააკმაყოფილებს მის წერილობით განცხადებას.” თუმცა დააყენებს თუ არა პირი აღნიშნულ ინიციატივას, მისი ნებაზეა დამოკიდებული და არ წარმოადგენს მის ვალდებულებას”, _ გვითხრა ეკა გიგაურმა.
