მე თუ დანაშაული ჩავიდინე, ამას ნამდვილად გავითავისებ, მაგრამ, როცა დამნაშავე არ ვარ? ვითარება, რომელიც ოზურგეთში, უნივერმაღის წინ არის შექმნილი, ხელს უშლის საგზაო ნიშნის ხილვადობას. იგი არაკანონიერად არის დადგმული, როგორ არ დავიცვა ჩემი უფლებები?” _ გვითხრა “გურია ნიუსის” ოზურგეთის განყოფილებაში მოსულმა ოზურგეთის მუნიციპალიტეტის სოფელ ბახვში მცხოვრებმა გურამ გოგოლაშვილმა. მან უკვე მიმართა ოზურგეთის რაიონულ პროკურატურას, მისადმი გახორციელებული უკანონო ქმედების გამო. დარღვეული უფლებების გამო, შესაძლოა, ოზურგეთის რაიონულ სასამართლოსაც მიმართოს.
“მოძრაობის საწინააღმდეგო მიმართულებით ჩასაფრებული დამხვდა, ხაზს ვუსვამ, ჩასაფრებული დამხვდა პოლიციის საპატრულო მანქანა, რომელშიც იჯდა ორი პოლიციელი. მათ მომთხოვეს მანქანის გაჩერება, განმიცხადეს, რომ მე დავარღვიე მოძრაობის წესები. ერთმა მათგანმა დაიწყო ოქმის შედგენა. არცერთს არ ეკეთა პოლიციელისთვის განკუთვნილი ნომრიანი სამკერდე ნიშანი. შევეცადე, დამედგინა მათი ვინაობა. მათ არ წარმომიდგინეს პირადობის დამადასტურებელი საბუთი, მოვთხოვე, ეთქვათ სახელი და გვარი, რაზედაც პასუხი არ გამცეს. ერთმა, რომელიც ოქმს მიდგენდა, მიპასუხა, ჩემს გვარს საჯარიმო ქვითარში ჩავწერ და გაიგებო”, _ გვითხრა გურამ გოგოლაშვილმა.
მისი თქმით, ის პოლიციელებმა 3 სექტემბერს, მას შემდეგ დააჯარიმეს, რაც საკუთარი ავტომობილით ოზურგეთში, წულაძის ქუჩაზე, უნივერმაღის წინ ავტომანქანით გადაადგილდებოდა.
“ცენტრალურ უნივერმაღთან მოვუხვიე მარჯვნივ, წულაძის ქუჩაზე. საგზაო ნიშანი, რომელიც იქ ყოფილა დადგმული, არ შემინიშნავს. უნივერმაღიდან, დაახლოებით 50 მეტრის დაშორებით, მოძრაობის საწინააღმდეგო მიმართულებით ჩასაფრებული პოლიციის საპატრულო მანქანა იდგა. დაჯარიმების შემდეგ, გადავწყვიტე, შემემოწმებინა, სად იყო საგზაო ნიშანი და ფეხით მივედი იმ ადგილამდე. აღმოჩნდა, რომ საგზაო ნიშანი დადგმულია წესების დარღვევით და კიდევ უარესი _ უხეშადაა დარღვეული საგზაო ნიშნის დაყენების კანონით დადგენილი ნორმატივები. ეს საგზაო ნიშანი გზის სავალი ნაწილიდან 5,5 მეტრის დაშორებით დგას. ნორმატივით კი გათვალისწინებულია 0,5-დან მაქსიმუმ 2 მეტრამდე. ასევე, ამ ნიშნის ხილვადობას ხელს უშლის ტაქსების ავტოსადგომი და ავტომანქანები, რომლებიც იქვეა ჩამწკრივებული. გზის ამ მონაკვეთზე ქაოსურად მოძრაობს ხალხი და ყოველთვის ასი თვალი და ასი ყური უნდა გესხას, რომ ვინმეს, უნებლიეთ, არ დაეჯახო, თორემ 50-ლარიანი ჯარიმა, იმ თანხასთან შედარებით, რაც დაზარალებულის მკურნალობას დასჭირდება, სანატრელი გაგიხდება (საინტერესოა, ქვეითად მოსიარულეებს რატომ არ აჯარიმებენ პოლიციელები გზის სავალ ნაწილზე უთავბოლო სიარულისთვის?!). ეს არის ამ საგზაო ნიშნის შეუმჩნევლობის მთავარი მიზეზი. ამ პოლიციელებს ვუთხარი, რომ საგზაო ნიშანი დაყენებულია კანონისა და ნორმატივების დარღვევით. მიპასუხეს, რომ საგზაო ნიშნებს აყენებს “გზამშენი-18″-ის დირექტორი, თეიმურაზ ჯახვა და ოზურგეთის მუნიციპალიტეტის გამგეობის ზედამხედველობის სამსახურის უფროსი, შუქრი გაბრიჩიძე. ამ საკითხზე მათ ესაუბრეო, _ დამაკვალიანეს. დავურეკე თეიმურაზ ჯახვას და შევეკითხე ამ პრობლემის შესახებ, ასევე, თუ ჰქონდა ამ ნიშნების დადგმის დამგეგმარებელს შესაბამისი სერტიფიკატი. მან მიპასუხა, ქალაქში ქაოსი სუფევს, მე სადაც გამგეობა მიმითითებს, ნიშანი იქ უნდა დავდგა, ამ საქმეზე ისევ გამგეობას მიმართეო”, _ ჰყვება გოგოლაშვილი.
მისი თქმით, კანონმდებლობით, რომლითაც ევროკავშირი სარგებლობს, საგზაო ნიშანი “მარჯვნივ მოხვევა აკრძალულია”, შეიძლება დაიდგას სავალი ნაწილის უახლოეს გადაკვეთაზე. მაშინ, როცა შეუძლებელია მოძრაობის მოწესრიგების უზრუნველყოფა 4.1.1.; 4.1.6 ან 5.15.1. ; და 5.15.2. საგზაო ნიშნების საშუალებით. ეს კი ამ ადგილას არ არსებობს, მაგრამ როგორც ეტყობა, გამგეობის რომელიღაც მესვეურს მოძრაობის თავისი საკუთარი ევროწესები დაუდგენია.
_ მოვითხოვ, დადგეს ამ უკანონობაში დამნაშავე პირების პასუხისმგებლობის საკითხი და ჩამომეწეროს შეუფერებელი ჯარიმა. აქვე გეტყვით, გარდა შესაბამისი სამსახურების არაკომპეტენტურობის ბრალეულობისა, ამ ქუჩაზე უნივერმაღის წინ ვაჭრობენ სიგარეტით. როგორც ამბობენ, ეს ბიზნესი გამგეობაში მომუშავე საჯარო მოხელის ყოფილა. ეზარებათ მძღოლებს მანქანიდან გადმოსვლა, გადააწოდებდნენ ფულს და ფერხდება მოძრაობა, იქმნება საცობები. იმასაც ამბობენ, რომ სწორედ იმიტომ გაკეთდა ეს ნიშანი, ხელი რომ შეეწყოთ სიგარეტის რეალიზაციისთვისო. პოლიციელს შეედავები და როგორ შეედავები, რაიმე ხმამაღალი, რომ უთხრა, შეიძლება, დაგადოს ხელბორკილები, ისინი დღეს განუსაზღვრელი ძალაუფლებით სარგებლობენ. მე თუ დანაშაული ჩავიდინე, ამას ნამდვილად გავითავისებ, მაგრამ, როცა დამნაშავე არ ვარ და გარემოება, რომელიც იქ არის შექმნილი, ხელს უშლის ამ ნიშნის ხილვადობას, როგორ არ დავიცვა ჩემი უფლებები?” _ გვითხრა გოგოლაშვილმა.
როგორც ოზურგეთის მუნიციპალიტეტის გამგეობის ზედამხედველობის სამსახურის უფროსი, შუქრი გაბრიჩიძე ამბობს, საგზაო ნიშნების დაყენებას საკრებულოს სპეციალური კომისია არეგულირებს საპატრულო სამსახურთან შეთანხმებით: პარამეტრებს საგზაო სამსახური განსაზღვრავს, ხოლო რა ნიშანი იქნას დადგმული ჴ საპატრულო. რაც შეეხება სიგარეტების გამყიდველებს და მათ მფარველობას, გაბრიჩიძე აბსურდულს უწოდებს.
შპს “გზამშენი -18”-ის დირექტორი თეიმურაზ ჯახვა ამბობს, რომ გამგეობა მის სამსახურთან აფორმებს ხელშეკრულებას და კომპანია ასრულებს ნაკისრ ვალდებულებას. თუმცა, კონკრეტულად ეს ნიშანი, მის სამსახურს არ დაუდგამს.
ოზურგეთის მუნიციპალიტეტის საკრებულოს ინფრასტრუქტურის კომისიის თავმჯდომარე თამაზ სალუქვაძე “გურია ნიუსთან” საუბარში ამბობს, რომ ეს საკითხი, მის კომისიას გარკვეულწილად ეხება.
“ამ ადგილზე საგზაო ნიშნის დადგმა 2 წლის წინანდელი გადაწყვეტილებით მოხდა, რომელიც ზეპირად არ მახსოვს, მოვძებნი და მოგვიანებით დამიკავშირდით”, _ გვითხრა სალუქვაძემ.
მისი თქმით, აღნიშნული ქუჩა დატვირთული იყო და გადაწყვეტილება, საპატრულო სამსახურის თანამშრომლებთან ერთად მიიღეს:
_ პატრულის თანამშრომლებმა გვითხრეს, ასე სჯობიაო. ამ საქმეში სპეციალისტები იყვნენ ჩართული. მე მგონი, განიტვირთა ქუჩა. მალე “პსპ” კლინიკის მშენებლობაც დასრულდება და მერე უფრო გამოთავისუფლდება ადგილი და მოძრაობა უფრო მოწესრიგდება იმასთან შედარებით, რაც იყო. კარგად რომ ვერ მოწესრიგდება, ამას კი ვატყობ, მაგრამ რაც იყო იმასთან შედარებით, განიტვირთება”, _ გვითხრა სალუქვაძემ სატელეფონო საუბარში.
_ ბატონო თამაზ, მოქალაქე ამბობს, რომ კანონმდებლობა, რომელიც ევროკავშირის ქვეყნებში და, მათ შორის, ჩვენთანაც ვრცელდება, დარღვეულია. მისი თქმით, “მარჯვნივ მოხვევა აკრძალულია”, შეიძლება, დაიდგას სავალი ნაწილის უახლოეს გადაკვეთაზე მაშინ, როცა შეუძლებელია მოძრაობის მოწესრიგების უზრუნველყოფა.
_ აქ მშენებლობა ხომ მიმდინარეობს და ტერიტორია შემოფარგლულია. დაახლოებით, ერთ თვეში აიღება ხარაჩოები. მერე, როგორც ევროსტანდარტის წესია, ისე დაიდგმება მაგი ნიშნები. დამერწმუნეთ, ასე იქნება.
_ ბატონო თამაზ, ის ამბობს, რომ არაკანონიერად დააჯარიმეს, ვინაიდან საგზაო ნიშანი არსებული ნორმატივების დარღვევით არის დადგმული.
_ როცა აიღება ის შემოფარგული, მაშინ იქნება ისე, როგორც სტანდარტია. ახლა ამ გარემოებამ შეუშალა ხელი და შეიძლება, თვალსაჩინოებისთვის ცოტა გამოაჩოჩეს აქეთ. შესაბამისი გადაწყვეტილება არსებობს ამ საკითხის დარეგულირებასთან დაკავშირებით, ჩვენ ახლა მაგას პატრულის გარეშე ვერ გადავწყვეტდით, ხომ იცით. პატრული, რომელიც უშუალოდ განახორციელებს წესრიგს, მათთან შეთანხმების გარეშე, ვერაფერს ვერ ვიზამთ ამაშია საქმე. საპატრულოსთან შეთანხმებით ხდება საგზაო ნიშნების განთავსება, _ გვითხრა სატელეფონო საუბარში ოზურგეთის მუნიციპალიტეტის საკრებულოს ინფრასტრუქტურის კომისიის თავმჯდომარემ.
