გასულ პარასკევს, ჩოხატაურის მუნიციპალიტეტის გამგებელი, ლელა იმედაშვილი ჟურნალისტებს შეხვდა. გამგებელი იმ პრობლემებით დაინტერესდა, რომელიც მედიის წარმომადგენლებს საჯარო მოხელეებთან ურთიერთობისას ექმნებათ. მისი თქმით, იგი ყველაფერს გააკეთებს იმისთვის, რომ სამსახურში ყველა მოხელე პასუხისმგებლობით მოეკიდოს საკუთარ საქმეს.
_ ჩემთვის ნამდვილად არ არის უმნიშვნელო, რა იწერება გაზეთებში. ყველა სტატიას, ყველა ნიუსს ყურადღებით ვეცნობი და მაქსიმალურად ვცდილობ, რაიმე არ შემეშალოს. ამიტომ, ორ კვირაში ერთხელ, პარასკევს, მექნება ჟურნალისტებთან შეხვედრის დღე. ეს არ იქნება ბრიფინგი ან რაიმე მსგავსი _ ეს იქნება ჩვეულებრივი ხასიათის შეხვედრა, სადაც თქვენთან ერთად გავივლი იმ საკითხებს და პრობლემებს, რომლებიც ჩოხატაურის რეალობაში დგას. მე ვიცი, რომ თქვენი ინტერესი ჩოხატაურის კეთილდღეობაა. იგივე ინტერესი მაქვს მეც და იმედი მაქვს, რომ ურთიერთთანამშრომლობით კარგ საქმეს გავაკეთებ, _ აღნიშნა იმედაშვილმა.
მისივე თქმით, ჟურნალისტებს პრესრელიზების სახით, ყოველდღიურად ექნებათ ინფორმაცია გამგებლის ყოველი ნაბიჯის შესახებ: _ არანაირი პრობლემა არ მაქვს პირდაპირი ინტერვიუების. ამიტომ, თუკი სურვილი გექნებათ, ჩემთან ინტერვიუ ჩაწეროთ, ან რაიმე კონკრეტული საკითხი გაქვთ სასწრაფოდ გასავლელი, ნებისმიერ დროს შეგიძლიათ დაუკავშირდეთ პრესამსახურს, რომელიც ჩემთან შეხვედრის დროს შეათანხმებს. გპირდებით, რომ ბარიერები არ იქნება, _ თქვა იმედაშვილმა.
ამავე შეხვედრაზე გამგებელმა ის პრობლემები ჩაინიშნა, რომლებზეც ჟურნალისტებმა მიუთითეს და პირობა მოგვცა, რომ ამ საკითხებზე პასუხს მომავალ შეხვედრაზე გაგვაცნობს.
იმედაშვილის თქმით, ამ კვირაში ყველა იმ ადამიანს შეხვდება, რომლებმაც ჩოხატაურის გამგეობას დასაქმების თხოვნით მიმართეს: _ ამ ეტაპზე დასაქმების თხოვნით გამგეობას 36-მა განმცხადებელმა მომართა. ყველა მათგანს შევხვდები და გავესაუბრები. პირობას ვერ ვდებ, რომ თითოეული მათგანი საჯარო სამსახურში დასაქმდება, მაგრამ დაზუსტებით შემიძლია გითხრათ, რომ არავის ექნება განცდა იმისა, რომ სამსახურში მიღება “პატრონის” საშუალებით ხდება. აქვე გეტყვით, რომ მე სამსახურიდან არავინ გამიშვია. ვფიქრობ, ყველა ადამიანს უნდა მისცე შანსი. დავალება მივეცი ყველა სამსახურს, რომ დღის ბოლოს, იმ დღეს გაკეთებული საქმეების ახსნა-განმარტებითი ბარათი მომცენ. ეს ეხება ნებისმიერს, როგორც სპეციალისტს, ასევე სამსახურის უფროსებს. ახლა გადავხედავ ამ ახსნა-განმარტებებს და მერე შევამოწმებ, რეალურია თუ არა ეს ყველაფერი. ის მოხელე, რომელიც აქ ტყუილად მოდის და საქმეს არ აკეთებს სახლში წავა, რადგან ჩოხატაურს ნამდვილად არ სჭირდება უსაქმური ადამიანები, _ დასძინა იმედაშვილმა.
გამგებლის ცნობით, სოფლის გახორციელებულ პროექტებს ადგილობრივი კომისია აღარ ჩაიბარებს: _ მივიღე გადაწყვეტილება, რომ სოფლის პროგრამებს ლევან სამხარაულის ექსპერტიზის ბიურო შეამოწმებს. მე ვერ ვაგებ პასუხს, რამდენად სწორად შეირჩა მიმდინარე წლის პრიორიტეტები, რადგან მაშინ გამგებელი არ ვიყავი. გეტყვით მხოლოდ იმას, რომ თუ ექსპერტიზის ბიურო რომელიმე ნამუშევარზე შესაბამის დასკვნას არ დაწერს, ინდმეწარმეს ჯარიმის გადახდა და საქმის ხარისხიანად შესრულება მოუწევს, _ აღნიშნა იმედაშვილმა.
გამგებელი უახლოეს დღეებში სოფლებში სტუმრობასაც გეგმავს და როგორც ამბობს, რიგ შემთხვევებში ამის შესახებ რწმუნებულებს არაფერი ეცოდინებათ: _ მე გთავაზობთ, რომ ჩემთან ერთად წამოხვიდეთ. მინდა, ყველაფერი ვიცოდე და ყველა სოფლის სატკივარი თავად ვნახო და მოვისმინო, _ დასძინა იმედაშვილმა.
