(საინფორმაციო სააგენტო პირველი) _ საქართველოს მომხმარებელთა ფედერაციის მიერ სამომხმარებლო ბაზარზე შემოწმებული ოცი დასახელების ხორცპროდუქტიდან თერთმეტი ჯანმრთელობისთვის საშიში აღმოჩნდა.
ამის შესახებ მომხმარებელთა ფედერაციის თავმჯდომარემ მადონა კოიძემ დღეს “პრაიმ თაიმის” პრეს-კლუბში გამართულ პრესკონფერენციაზე განაცხადა, რომელზეც საზოგადოებას თბილისის და ქუთაისის სამომხმარებლო ბაზარზე არსებული ხორცპროდუქტების შემოწმების შედეგები გააცნო.
მისივე თქმით, შემოწმებული პროდუქციიდან დადებითი შედეგი შ.პ.ს. “იოლის”, შ.პ.ს “ნიკორას”, შ.პ.ს. “კავკასია+”-ის, შ.პ.ს. “ლიდერფუდის”, შ.პ.ს. “ნიკორა 7”-ის, შ.პ.ს.P “ფორვარდის”, შ.პ.ს. “გერმანელი ყასაბის”, შ.პ.ს. “ონიმასა” და შ.პ.ს “შაორის” ხორცპოდუქტებმა აჩვენა.
რაც შეეხება ჯანმრთელობისთვის საზიანო პროდუქტებს, კვლევის შედეგად მათ რიცხვში ფირმა “ზეიკიძე+”-ის მიერ წარმოებული ნახევრად შებოლილი ძეხვი, შ.პ.ს. “ეკო მითის” მიერ წარმოებული მოხარშული და ნახევრად შებოლილი მოსკოვური, “ახალი ნობათის” მიერ წარმოებული უკრაინული სუთი, “რუსთავის მონადირული” და “ბაკალეა-გასტრონომიას” მიერ წარმოებული ნახევრად შებოლილი მონადირული აღმოჩნდა.
“ქუთაისში და თბილისში სამომხმარებლო ბაზარზე 20 დასახელების ხორცპროდუქტი შევიძინეთ, რომელთაგან ჯანმრთელობისთვის უსაფრთხო მხოლოდ ცხრა აღმოჩნდა. მაგალითად, ქუთაისში ხორცპოდუქტები ანტისანიტარიულ ადგილზე, ღია ცის ქვეში იყიდება. “ტორპედოს” სტადიონის მიმდებარე ტერიტორიაზე სამარშრუტო ტაქსებს ძეხვეული მოაქვთ და იქიდან პირდაპირ სარეალიზაციო პუნქტებში გადააქვთ. აღსანიშნავია ისიც, რომ ჩვენ პროდუქტები საფირმო მაღაზიებსა და საბითუმო წერტილებში შევიძინეთ, რითაც მეწარმის იმიჯს გავუფრთხილდით, თორემ შეიძლებოდა, უარესი შედეგიც მიგვეღო” – განაცხადა კოიძემ.
ამასთან, მომხმარებალთა ფედერაციის თავმჯომარემ ჯანმრთელობისთვის საზიანო ძეხვეულზე საუბრისას განსაკუთებული ყურადღება “ახალი ნობათის” მიერ უკრაინული წესით წარმოებულ სუთზე და უცნობი მწარმოებლის ნახევრადშებოლილ მოსკოვურზე გაამახვილა.
“სამომხმარებლო ბაზარზე იყიდება ნახევრადშებოლილი მოსკოვური ძეხვი, რომელიც მიკრობიოლოგიურად დაბინძურებულია. მის მწარმოებელს ვერ მივაგენით. ასევე განსაკუთებით მინდა, აღვნიშნო “ახალი ნობათის” მიერ უკრაინული წესით წარმოებული სუთი, რომელშიც პროტეუსი აღმოჩნდა. ეს პირობითი პათოგენია, რომელმაც შეიძლება, გარკვეულ პირობებში მომხმარებლის ორგანიზმის მოშხამვა გამოიწვიოს”, – განმარტა მადონა კოიძემ.
ამასთან, კოიძის განცხადებით, ეტიკეტირებასთან დაკავშირებით გარკვეული ხარვეზები ჯანმრთელობისთვის უსაფრთხო ხორცპროდუქტებსაც აღმოაჩნდათ. კერძოდ, პროდუქციაზე მითითებულია, რომ ის 14-15 დღის განმავლობაშია ვარგისი, მაგრამ ეტიკეტზე პროდუქიის წამოების თარიღი აღნიშნული არაა.
წყარო: http://pirweli.com.ge/index.php?option=com_content&task=view&id=80531
ცნობისთვის, 20-მდე დასახელების ხორცპროდუქტის კვლევა მომხმარებელთა ფედერაციამ ქუთაისის ლიცენზირებულ ლაბორატორიაში და ლაბორატორიებში “ნორმა” და “ციტო” განხორციელდა.
