ნატანების სამანქანო მომსახურების ცენტრის გახსნას, ჯონ ბასის მეუღლე, დედა და დეიდაც ესწრებოდნენ.
ნატანებელმა ინდმეწარმემ გელა გამყრელიძემ გრანტის სახით 110 ათასი აშშ დოლარი მიიღო. მან ახალი ცენტრის ასაშენებლად და აღსაჭურვად საკუთარი სახსრების ინვესტირებაც მოახდინა. სამანქანო მომსახურების ცენტრი 9 ტრაქტორით და 21 სამანქანო იარაღით არის დაკომპლექტებული, სადაც, როგორც სერვისცენტრის წარმომადგენლები ამბობენ, ადგილობრივი, მცირე ფერმერებს მაღალტექნოლოგიურ ფასიან მომსახურებას: თესვას, ხვნას, კულტივაციას გაუწევენ, ასევე სარგებელს 400 ფერმერი ნახავს და დამუშავდება 800 ჰექტარი სასოფლო-სამეურნეო სავარგული.
_ მექანიზაციის პროექტი 30 თვეს მოიცავს და 5.1 მლნ. აშშ დოლარის ოდენობის პროგრამაა. ეს თანხა იმ დაპირებული 1 მილიარდი დოლარის ნაწილია, რომელიც ამერიკის მთავრობამ ომის შემდგომ პერიოდში გამოუყო საქართველოს დახმარების მიზნით. პროექტი დააფინანსებს კერძო მფლობელობაში არსებულ 25-მდე სამანქანო მომსახურების ცენტრის განვითარებას მთელი ქვეყნის მასშტაბით. პროგრამის გახორციელების შედეგად, სასოფლო სამეურნეო მანქანა-დანადგარები უფრო ხელმისაწვდომი გახდება მცირე ფერმერებისთვის. ქვეყნის მასშტაბით დაახლოებით 250 სამუშაო ადგილი შეიქმნება. მომსახურება გაეწევა 14 ათას მცირე ფერმერს, რომელთა შემოსავალი 10 მლნ აშშ დოლარით გაიზრდება, _ თქვეს აღნიშნული პროექტის წარმომადგენლებმა.
ჯონ ბასი: _ მოხარული ვარ, რომ დღეს ჩვენ ყველა ერთად ვუერთდებით გურიაში მექანიზაციის ცენტრის გახსნას. ეს ჩემთვის პირადად ძალიან ბევრს ნიშნავს _ მე ვიზრდებოდი ფერმასთან ახლოს, ბაბუაჩემი კი ფლობდა რძის გადასამუშავებელ საწარმოს. ამიტომაც ძალიან კარგად ვგრძნობ თავს, როცა ტრაქტორებთნ ვიმყოფები. მოხარულები ვართ, რომ გურიის ამ ნაწილში ხელს ვუწყობთ ახალი შესაძლებლობების ზრდას და ასევე ფერმერებს ვეხმარებით, რომ მიიღონ გაზრდილი მოსავალი თავის ფართობზე, ვაძლევთ შანსს, გაზარდონ დამუშავებული მიწის ნაკვეთი. მინდა ვისურვო, რომ ეს პროექტი, რომელსაც ჩვენ ვახორციელებთ, იყოს წარმატებული და საქართველოს მომდევნო წლებშიც გამოადგეს.
როგორც ინდმეწარმე გელა გამყრელიძე “გურია ნიუსთან” საუბარში ამბობს, ჯერჯერობით, მხოლოდ 12 ადგილობრივია დასაქმებული, თუმცა, თანამედროვე ტექნიკას თანამედროვე სპეციალისტი დასჭირდება და, ალბათ, საჭირო გახდება მისი დაქირავება: _ ჩვენ ჯერ დავაკამყოფილებთ სოფელ ნატანებს, რადგან ის ტერიტორიულად ძალიან დიდია და შემდეგ გარშემო სოფლებს, ვეცდებით, შეღავათიან ფასებში მოვემსახუროთ ფერმერებს.
ღონისძიების დაწყებამდე “გურია ნიუსი” სოფელ ნატანების მცხოვრებლებს შეხვდა და დაინტერესდა, დაესწრებოდნენ თუ არა ისინი სერვისცენტრის გახსნას და რას ნიშნავდა ეს მათი სოფლისთვის, თუმცა, გამოკითხული რესპონდენტებიდან სურვილი არავის გასჩენია დასწრებოდა ღონისძიებას, რადგან როგორც თავად ამბობენ, გლეხისთვის სარგებელი არასდროს ყოფილა და არც ახლა აქვთ იმედი. ზოგიერთმა კი საერთოდ არ იცოდა, თუ მის სოფელში სერვისცენტრი იხსნებოდა: _ მინისტრები და შეხვედრები უკვე ამოვიდა კისერში. ბოდიში, ამას რომ ვამბობ, მაგრამ მე არავის არ მეშინია. უბრალოდ, აზრი არ აქვს რომ დავესწრო. ახლოს მაინც არავინ მიმიშვებს და რა მინდა?! _ თქვა ერთ-ერთმა ნატანებელმა.
