(გურია ნიუსი, ლანჩხუთი) _ ლანჩხუთში გამართული სათასო მერვედფინალის განმეორებითი მატჩის (“კოლხეთი”-“ზესტაფონი”) შემდეგ, “ევგრაფ შევარდნაძის” სახელობის სტადიონის მინდვრის საფარითა და საორგანიზაციო საკითხებით ზესტაფონური კლუბის მესვეურები უკმაყოფილოები დარჩნენ. მათი პრეტენზიები გამოქვეყნდა კლუბის ოფიციალურ საიტზე: “ერთ დროს დიდებული სპორტული ნაგებობის სადღეისო მდგომარეობას სავალალო ეთქმის. დავიწყოთ იმით, რომ ევგრაფი შევარდნაძის სახელობის სტადიონის საფარის მდგომარეობა, მარტივად რომ ვთქვათ, არ შეესაბამება პროფესიული ფეხბურთის ელემენტარულ მოთხოვნებს. გავაგრძელოთ იმით, რომ საქართველოს ჩემპიონისა და ქვეყნის ერთ-ერთი ტიტულოვანი, ფოთური კლუბის დაპირისპირება ბურთის მომტანი ბიჭების გარეშე ჩატარდა. ალბათ, სწორედ ამ მიზეზის გამო, თავდაპირველად მატჩი 1 სათამაშო და 3 სათადარიგო ბურთით დაიწყო, არადა, ეროვნული ჩემპიონატის დებულებაში გარკვევით წერია, რომ მატჩის ჩასატარებლად, მინიმუმ, 5 ბურთია საჭირო (“დავით აბაშიძეზე” მატჩების დროს 12 სათამაშო ბურთის გამოყენება ხდება). ამ ნაკლოვანების გამოსწორება მხოლოდ ზესტაფონელთა ზეპირი მოწოდების შემდეგ მოხდა, თუმცა ამ დროს ახალმა “გაჭირვებამ” იჩინა თავი _ აღმოჩნდა, რომ “სათამაშო” 5 ბურთიდან, მინიმუმ ორი, გასაბერი იყო. ამ პრობლემასთან ბრძოლა მატჩის მეოთხე არბიტრს ე.წ. “ნასოსით” ხელში მოუხდა. ამ ფონზე, ის, რომ სტადიონის ტრიბუნებზე არ აღმოჩნდა ერთი მოქმედი დენის წყარო, რომელშიც კომპიუტერის შეერთება იქნებოდა შესაძლებელი, სულაც აღარ გამოიყურება პრობლემად. არადა, სწორედ ამის გამო, საფეხბურთო კლუბ “ზესტაფონის” ოფიციალური საიტის მომხმარებელმა პირდაპირ ტექსტურ რეპორტაჟს ვერ ადევნა თვალი”, _ აღნიშნულია განცხადებაში.
როგორც ცნობილია, ფოთის სტადიონზე მიმდინარე სამუშაოების გამო, “კოლხეთი” საშინაო შეხვედრებს ლანჩხუთში ატარებს. ამავე არენაზე თამაშობს ადგილობრივი “გურია” და მიუხედავად იმისა, რომ ქართული საზომებით გურულთა მთავარი არენის საფარი აქამდე ყოველთვის ნორმალურად გამოიყურებოდა, ორი გუნდის “მასპინძლობა” გაუჭირდა. რა თქმა უნდა, ზესტაფონელთა გულისტკივილი გასაგებია _ გუნდს კარგ საფარზე თამაში სურს, თუმცა, ქართული რეალობა სულ სხვაა _ სამწუხაროდ, “გურიის” სტადიონის მდგომარეობაშია სტადიონების უმეტესობა საქართველოში. ჯერჯერობით არ ეშველა საფეხბურთო ინფრასტრუქტურას და თითო-ოროლა სტადიონი არაფერს ცვლის.
იმის გამო, რომ კვირას “ზესტაფონს” კიდევ ერთხელ უნდა ეთამაშა ლანჩხუთში იმავე “კოლხეთთან”, უკვე საჩემპიონატო მატჩი, კლუბის სურვილი იყო, მატჩი სხვა ქალაქში გადაეტანათ. თუმცა, ისევ ზემოთ ნახსენები პრობლემების გამო (ფოთელებს ალტერნატიული უკეთესი ვარიანტი არ აქვთ), ფოთელებს ზესტაფონში მოუწევდათ თამაში. ეს კი კოლხებს არანაირად არ “აწყობდათ”.
ვითარების გასარკვევად, ლანჩხუთს ფეხბურთის ფედერაციიდან საგანგებოდ ეწვია სპეციალური კომისია, რომლის გადაწყვეტილებითაც, “კოლხეთი” _ “ზესტაფონის” მატჩის ჩატარება ლანჩხუთში გადაწყდა. როგორც ჩანს, კომისიამ იძულებითი გადაწყვეტილება მიიღო, თორემ “ევგრაფ შევარდნაძე” იდეალურ მდგომარეობაში ნამდვილად არაა, მაგრამ ასეთ მინდვრის საფარზე თუ თამაში აიკრძალება, ეროვნული ჩემპიონატი ჩაიშლება, ან მხოლოდ 2-3 არენაზე უნდა გაიმართოს ყველა მატჩი.
თუმცა, მატჩის ჩატარება “ევგრაფ შევარდნაძეზე” მაინც არ მოხერხდა. ამის მიზეზი ლანჩხუთში მოსული უხვი ნალექი გახდა _ წინა დღიდან მოყოლებული თამაშის დაწყებამდე წვიმას არ გადაუღია, განსაკუთრებით უხვი ნალექი მოვიდა გამთენიისას. ყოველივემ დაღი, რა თქმა უნდა, მინდორსაც დაასვა. თამაშის დაწყებამდე საათზე მეტი დროით ადრე, უკვე მიღებული იყო გადაწყვეტილება მატჩის არჩატარების შესახებ. ეს არის მეორე შემთხვევა, როცა ლანჩხუთში უამინდობის გამო მატჩის გადადება გახდა საჭირო _ პირველად ეს წლების წინ მოხდა. მაშინაც მიზეზი გადაუღებელი წვიმები იყო, ოღონდ თამაშის დროს მოსული, თორემ “ევგრაფ შევარდნაძის” მოედნის დამწრეტი ინფრასტრუქტურა აქამდე იდეალურად მუშაობდა. როგორც ჩანს, ახლა მიხედვას საფარისქვეშა გაყვანილობაც მოითხოვს, რაზეც ჩვენს მიერ გადაღებული ფოტოებიც მოწმობს.
