სააკაშვილმა ყურადღება ტურიზმის განვითარებაზეც გააკეთა და ის კურორტები დაასახელა, რომლის მოწესრიგებასაც მთავრობა მომავალ წელს აპირებს. დიდი ჩამონათვალში პრეზიდენტს არ უხსენებია ბახმარო, მიუხედავად იმისა, რომ ცენტრალური მედიასაშუალებები ბოლო რამდენიმე დღეა, ამ თემაზე ბევრს საუბრობენ.
პრეზიდენტის სასახლეში გამართულ შეხვედრას ჩოხატაურის მაჟორიტარი დეპუტატი კორნელი კუკულავაც ესწრებოდა. ჩვენც სწორედ მისგან ვცადეთ გაგვეგო, რატომ არ ახსენა გასავითარებელი კურორტების სიაში ბახმარო სააკაშვილმა.
_ ბატონო კორნელი, როდესაც პრეზიდენტი მომავალი წლის პრიორიტეტებზე და პრიორიტეტულ კურორტებზე საუბრობდა, ბახმარო არ უხსენებია. ხომ არ იცით, რა იყო ამის მიზეზი?
_ ეგ მას უნდა ჰკითხოთ. მე რა ვიცი. გამორჩა უბრალოდ.
_ თქვენ არ გიკითხავთ?
_ რატომ უნდა მეკითხა? ბახმაროზე უკვე მიღებული აქვს დავალება მთავრობას ცალკე, ეკონომიკას _ ცალკე, ინფრასტრუქტურას _ ცალკე. რეალურად დაწყებულია ეს პროექტი.
_ ამის შესახებ განცხადებები ჩვენც მოვისმინეთ, მაგრამ როდესაც პრეზიდენტი პრიორიტეტულ კურორტებს ასახელებს და მათ შორის, რატომღაც, ავიწყდება ბახმარო, ჩოხატაურის მაჟორიტარი დეპუტატი, რომელიც ამ თემაზე მუშაობდა, არ არის ანგარიშვალდებული ხალხის წინაშე, რომ მინიმუმ ეს კითხვა დაუსვას პრეზიდენტს? თუ იმ შეხვედრაზე არ მოგეცათ კითხვის დასმის საშუალება?
_ ჯერ ერთი, ნახეთ, რა ფორმატით იყო ეს შეხვედრა და რატომ დავუსვამდი იქ ამ შეკითხვას. არც გუდაური უხსენებია, არც თეთნულდი და არც სხვა ისეთი ადგილები, რომლებიც ახლა ვითარდება. ბახმაროში რამდენიმე კვირის წინ თავად ამობრძანდა და ახლა დამატებითი განცხადება თუ არ გააკეთა, მგონი, ეს სასაყვედურო არ არის. კვირას თქვენ რომ შეხვედრაზე იყავით (რამაზ ნიკოლაიშვილთან შეხვედრას გულისხმობს. ავტ.) და ყველანი რომ ბახმაროში ვიყავით (ბახმაროში რეგიონალური მედია არავის წაუყვანია. ავტ.) ეს არ არის პროექტის დაწყება? მთელი ავსტრიის საპროექტო მუშაობს და თავისთავად ცხადია, რომ კარგი კურორტი გაკეთდება. ყოველ წუთში ხომ არ შეახსენებ ადამიანს გამოგრჩაო? მით უმეტეს, რომ ფორმატი ამას არ ითვალისწინებდა. მან გააკეთა ანგარიში, წარმოადგინა ხედვები და პერსპექტივები.
_ იმ ხნის მანძილზე, რაც პარლამენტის დეპუტატი ბრძანდებით, პრეზიდენტისთვის კითხვის დასმის საშუალება არ გქონიათ?
_ გვქონდა რამდენიმე წლის წინ.
_ და რა ჰკითხეთ მაშინ პრეზიდენტს?
_ სწორედ ბახმაროსთან დაკავშირებით ვკითხე.
_ ამის შემდეგ, როგორც დეპუტატს მმართველი პარტიიდან არ მოგცემიათ საშუალება მისთვის რამე გეკითხათ?
_ ჩვენ ამ საკითხებს ვსვამთ ფრაქციაში, პარლამენტის შესაბამის კომიტეტებში, გურიაში, ადგილზე და, რა თქმა უნდა, სამხარეო ადმინისტრაციის, გუბერნატორის მეშვეობით მთავრობის სხდომაზე და შემდგომ, შესაბამის სამინისტროებში.
_ უშუალოდ თქვენი კონტაქტი როგორია პრეზიდენტთან? საუბრობს თუ არა ის დეპუტატებთან და ისმენს თუ არა მათგან კონკრეტული რაიონის პრობლემებს?
_ თქვენ გუშინ (საუბარი ჩაწერილია 8 ნოემბერს) რომელიმე დეპუტატის გამოსვლა ნახეთ პრეზიდენტის სასახლეში?!
_ საინტერესოა, ზოგადად რას აკეთებს ხალხის არჩეული კორნელი კუკულავა ჩოხატაურისთვის საქართველოს პარლამენტში…
_ რას ჰქვია რას ვაკეთებ?! აბა, ტყუილად ვართ აქ?
_ ჩვენ გვაინტერესებს, კონკრეტულად რას საქმიანობთ.
_ ეს ამხელა პროექტი რომ დაიწყო, მარტო კორნელი კი არ აკეთებს ამას. ყველა ვაკეთებთ ერთად.
_ თქვენი წვლილი რა არის ამ პროექტში?
_ ვაი, ღმერთო ჩემო! რა არის და 2008 წლიდან მოყოლებული აბსოლუტურად ყველა ერთად, მთელი გუნდი, ჩვენი რაიონის და სამხარეო ადმინისტრაციის ხელმძღვანელობა მიმართულია იქითკენ. კორნელი ან რომელიმე მინისტრი ამის გამკეთებელი მარტო არ არის. ერთობლივად მომზადდა და გაკეთდა პროექტი, რომელიც შემდეგ სამჯერ თუ ოთხჯერ გადამუშავდა, გავიდა მთავრობის სხდომაზე, დაურიგდა შესაბამის სამინისტროებს, სადაც გაკეთდა შენიშვნები, რომელთა საფუძველზე კიდევ გადამუშავდა ეს პროექტი, კიდევ მოხდა განხილვები ეკონომიკის სამინისტროში და ტურიზმის დეპარტამენტში.
_ არის ერთი ძალიან დიდი კითხვა, რომელსაც პასუხს ვერავინ ვერ სცემს _ რა უნდა ქნან იმ ადამიანებმა, რომლებსაც ბახმაროში წლებია უძრავი ქონება აქვთ და მიუხედავად კანონიერი საფუძვლებისა, არც საჯარო რეესტრი და არც ლეგალიზაციის კომისია არ უკანონებს, რომლებიც თავის მხრივ, არ ასრულებენ პრეზიდენტის ბრძანებულებას და კანონს. ამ საკითხში როგორ ხართ ჩართული, როგორც დეპუტატი?
_ ეს საკითხი, როგორც თქვენ გაინტერესებთ, ისევე მაინტერესებს მეც, იმიტომ, რომ ძალიან ბევრი შეკითხვები შემოდის მაგ საკითხის ირგვლივ. ამიტომ, ეკონომიკის სამინისტრო დღეს მუშაობს მაგ საკითხებზე და პასუხიც ასეთია _ თუკი ვინმეს ბახმაროში გააჩნია მიწა ან შენობა, ის უნდა მოექცეს კანონის ჩარჩოებში.
_ როდის უნდა მოხდეს ეს?
_ ახლა, როცა დაიწყო ეს პროექტი და ამოდენა დავალებები მიიღეს, თავისთავად, ცხადია ამაზეც მუშაობს ეს ხალხი.
_ ანუ ეს სამომავლო პერსპექტივაა, რადგან ამ ეტაპზე ყველანაირი დაკანონება გაჩერებულია?
_ ამ ეტაპზე, რა თქმა უნდა, მაგრამ ჩავთვალეთ, რადგან წავიდა ბახმაროს განვითარება, ეს საკითხებიც დარეგულირდება პარალელურად. არავის არ დატოვებენ გულნატკენს. მთავარია, მათაც ჰქონდეთ ელემენტარული ჩანაწერი, რაც საფუძველი იქნება ლეგალიზაციის კომისიისთვის.
