ერთი შეხედვით, ჩვეულებრივი თაღლითობის ისტორია, რომლის შესახებაც გიამბობთ, იმით გამოირჩევა, რომ ამ დიდად ჩახლართულ ამბავში სახელმწიფო გადამწყვეტ როლს ასრულებს.
2009 წლის ერთ დღეს, მოქალაქე ვლადიმერ მიქაუტაძემ მოქალაქე ნანული გათენაშვილს 10 000 დოლარი, 3 თვის ვადითა და ყოველთვიური სარგებლის მიღების პირობით ასესხა. ამასთან დაკავშირებით, გაფორმდა ხელშეკრულება და ნანული გათენაშვილის კუთვნილი ქონება, კერძოდ, კოჯორში მდებარე 1500 კვ/მ ფართობის ნაკვეთი, იპოთეკით დაიტვირთა. აღნიშნული ნაკვეთი მხოლოდ საკადასტრო კოდით აღირიცხებოდა. გარკვეული პერიოდის გასვლის შემდეგ, როდესაც ვლადიმერ მიქაუტაძეს თვიური სარგებელი არ მისცეს და თანხის დაბრუნებაზე უარი განუცხადეს, დაიწყო დავა.
როცა ჯერი კოჯრის ნაკვეთის შეფასებაზე მიდგა, აღმოჩნდა რომ აღნიშნული მოქალაქე მოატყუეს და რეალურად სულ სხვა, გაცილებით უფრო მცირე ღირებულების მქონე ნაკვეთი დატვირთეს იპოთეკით. 2010 წლის 14 აპრილს, მიქაუტაძემ ოფიციალურად მიმართა ძველი თბილისის შინაგან საქმეთა სამმართველოს, რათა საქმე აღძრულიყო და აღდგენილიყო დაზარალებულის უფლებები. თუმცა, მიქაუტაძის ადვოკატის თედო კობახიძის თქმით, ეს საქმე ერთი უწყების სხვადასხვა სამმართველოებში მოგზაურობდა და რეალური შედეგი მხოლოდ 5 ივნისს დადგა. აღსანიშნავია, რომ მიქაუტაძემ პარალელურ რეჟიმში მიმართა შსს-სა და გენერალურ პროკურატურას, რათა ყადაღა დადებოდა ნანული გათენაშვილის ქონებას: “არსებობდა სერიოზული ეჭვი, რომ ნანული გათენაშვილი თავიდან მოიცილებდა მის სახელზე რეგისტრირებულ ქონებას”, _ აღნიშნავს კობახიძე.
2011 წლის 11 იანვარს ნანული გათენაშვილი ცნობილ იქნა დამნაშავედ თაღლითობის მუხლით და შეეფარდა შესაბამისი სანქცია, პირობითი მსჯავრის სახით.
შემდეგი ნაბიჯი, რომელიც მიქაუტაძემ ადვოკატთან ერთად გადადგა, სამოქალაქო კოლეგიისადმი მიმართვა იყო, რომელმაც ბრალდებულს 15 000 დოლარის გადახდა დააკისრა. ამ თანხაში შედიოდა ძირი თანხა, პროცენტი, პირგასამტეხლო და ადვოკატის ჰონორარი.
სამოქალაქო კოლეგიაში საქმის მოგების შემდეგ, ჯერი აღსრულებაზე მიდგა. თუმცა, სააღმსრულებო ბიუროში ვლადიმერ მიქაუტაძეს განუცხადეს, რომ ნანული გათენაშვილის სახელზე არანაირი ქონება არ ირიცხებოდა. საჯარო რეესტრის ამონაწერის მიხედვით ტერიტორიაზე, საკადასტრო კოდით 81.01.04.311 საკუთრების უფლება მიტოვებულია, მესაკუთრე არ არსებობს, ანუ ტერიტორია სახელმწიფოს კუთვნილებაშია.
“გამოდის რომ ამ ყველაფრით სახელმწიფომ ისარგებლა და ტერიტორია იჩუქა” _ ამბობს თედო კობახიძე.
დაზარალებული ვლადიმერ მიქაუტაძე აპირებს, რეგრესის წესით შეედავოს სახელმწიფოს და მისგან მოითხოვოს ზიანის ანაზღაურება, რაც შეადგენს იმ თანხას, რომლის ამოღებაც “სახელმწიფოს წყალობით” დაზარალებულმა ვერ შეძლო.
“შესაბამისი უწყებები ვალდებულნი იყვნენ, მითითებულ პერიოდში დაეყადაღებინათ გათენაშვილისთვის ქონება, მაგრამ რადგან გულგრილობა გამოიჩინეს, დაზარალებული შსს-სა და პროკურატურისგან მოითხოვს თანხის ანაზღაურებას”, _ დასძინა თედო კობახიძემ.
