ზოგი იმასაც ვარაუდობს, რომ ტელეკომპანია ივანიშვილმა შეიძინა და სხვა რეგიონებშიც გეგმავს ტელევიზიების შესყიდვას.
ამ ინფორმაციას ოფიციალურად ტელეკომპანიის წარმომადგენლები არ ადასტურებენ, თუმცა, არც უარყოფენ და ამბობენ, რომ ჩხარტიშვილი და ივანიშვილი ტელეკომპანიის უკან კი არ დგანან, არამედ _ გვერდით. ამის დასტური კი ისაა, რომ 5 დეკემბერს, ორშაბათს, პირველ სამუშაო თათბირზე, რომელიც ტელეკომპანიაში გაიმართა, გენერალური დირექტორის, ზურაბ გობრონიძის მოადგილედ ვანო ჩხარტიშვილის მეგობარი ლევან სკამკოჩაიშვილი დაინიშნა. ახლა მას ივანიშვილის პარტიის ერთ-ერთ წარმომადგენლად მოიაზრებენ, თუმცა ამ ინფორმაციას სკამკოჩაიშვილი “გურია ნიუსთან” საუბარში უარყოფს. ტელეკომპანია “გურიას” მთავარ პროდიუსერად კი თბილისიდან მოწვეული, წარმოშობით ოზურგეთელი, კინორეჟისორი ელდარ მდინარაძე დაინიშნა, რომელიც “გურია ნიუსთან” საუბარში ადასტურებს, რომ ის ვანო ჩხარტიშვილის მეგობარია და მასთან მუშაობის მრავალწლიანი ურთიერთობა აკავშირებს, თუმცა, ივანიშვილთან ახლო ურთიერთობას უარყოფს. როგორც ისინი ამბობენ, მათთვის მნიშვნელობა არ აქვს, ვისი იქნება ტელეკომპანია, მთავარია, საქმე გაკეთდეს და ტელევიზია გახდეს ობიექტური.
“გურია ნიუსი”, ამ საკითხთან დაკავშირებით, ტელეკომპანია “გურიას” დირექტორს, ზურაბ გობრონიძეს, მის მოადგილეს ლევან სკამკოჩაიშვილს და ახლად დანიშნულ მთავარ პროდიუსერს, ელდარ მდინარაძეს ესაუბრა.
ზურაბ გობრონიძე “გურია ნიუსთან” საუბარში აღნიშნავს, რომ შპს-ს, რომლის მართვაშიც ტელეკომპანია “გურია” გადავიდა, დამფუძნებელი და დირექტორი ბაია შავიშვილია.
_ გვითხარით შპს-ს სახელი.
_ არ მახსოვს. შეგიძლიათ, საჯარო რეესტრიდან ამოიღოთ.
_ ფინანსურ მხარდაჭერას ეს შპს გიწევთ?
_ მაგიტომ გადავეცით ჩვენ ტელეკომპანია მმართველობაში, ის ერთ-ერთი მეწილეა ტელეკომპანიისა. თქვენ, ალბათ, გაინტერესებთ, რომ არის თუ არა ჩხარტიშვილი მეპატრონე? გეტყვით, რომ მე მაგ ინფორმაციას არ ვფლობ და არ ვადასტურებ.
_ დღევანდელ თათბირზე რა საკითხები განიხილეთ?
_ ჩატარდა პირველი თათბირი. დღეს უნდა დავწერო ბრძანება ახალი კადრების დანიშვნის შესახებ. თბილისიდან ჩამოვიყვანეთ წარმოშობით ოზურგეთელი ელდარ მდინარაძე, რომელიც მთავარ პროდიუსერად დაინიშნა. ჩემი მოადგილე ლევან სკამკოჩაიშვილი გახდა. ჯერჯერობით, რეორგანიზაცია ამით ჩერდება, თუმცა, კვლავ იგეგმება, რომელიც ფართომასშტაბიანი იქნება და ახალი კადრების დანიშვნით დაიწყება.
_ ვინ მოიწვია მთავარი პროდიუსერი მდინარაძე და ვისი კადრია სკამკოჩაიშვილი? რა მიზანს ემსახურება მათი ტელევიზიაში მოწვევა?
_ ლევან სკამკოჩაიშვილია არის ამ ფირმის წარმომადგენელი.
_ საზოგადოება საუბრობს იმაზე, რომ ტელეკომპანია ივანიშვილმა იყიდა. ამბობენ იმასაც, რომ მისი წარმომადგენელია სკამკოჩაიშვილიც. შეიძლება საზოგადოების ეჭვები გამართლდეს?
_ ჭორის დონეზე არ შემიძლია საუბარი. მე, პირადად, ეგ თემები არ მაინტერესებს. ჩემთვის მთავარია, ტელევიზია იყოს ძლიერი და თუ ვისია იგი, ამით არაფერი არ შეიცვლება, მით უმეტეს, პოლიტიკური თვალსაზრისით, პირიქით, გაძლიერდება ის. ტელეკომპანია “გურიას” უკან არავინ დგას, პირიქით, გვერდით დგანან, მნიშვნელობა არ აქვს, ვინა _ ყველა, ვინც დაგვეხმარება.
_ მაშინ გეკითხებით, ვინ დგას ტელეკომპანია” გურიას” გვერდით?
_ აი, ხომ გითხარით შპს. სახელი არ მახსოვს.
_ პოლიტიკური კუთხით რა შეიცვლება?
_ არაფერი. ეს იქნება სუფთა პროფესიული თვალსაზრისით.
_ ბატონო ზურაბ, რამდენადაც ვიცით, საქმე ჯერ უზენაეს სასამართლოშია.
_ კი, ნამდვილად ასეა. საქმე უზენაეს სასამართლოშია და ტელეკომპანიას ყადაღა ადევს. როგორც კი დამთავრდება საქმე ჩვენს სასიკეთოდ, მაშინვე გადავცემთ ოფიციალურად შპს-ს, თუმცა, საჯარო რეესტრში დაფიქსირებულია, რომ ჩვენ გადავეცით 51% წილი და მმართველობაში უნდა შემოვიდეს ეს ფირმა, რომელმაც უნდა მართოს ტელევიზია.
ახალდანიშნული მთავარი პროდიუსერი ელდარ მდინარაძე “გურია ნიუსთან” საუბარში აღნიშნავს, რომ გურია იმსახურებს ჰქონდეს ერთი კარგი, ობიექტური ტელევიზია:
_ სპეციალობით კინორეჟისორი ვარ. ვიყავი ტელეკომპანია “მზის” გენერალური დირექტორი (სტაჟიან მკითხველს, ალბათ, ახსოვს, რომ იმ დროს “მზე” ყველაზე მაღალრეიტინგული და მაღალპროფესიონალური ტელევიზია იყო. რედ.). როცა “მზე” გადავიდა სხვის მფლობელობაში, წამოვედი. იქამდე კი ვმუშაობდი მეცხრე არხზე, რეჟისორი ვიყავი. რამდენჯერმე მქონდა შეთავაზებები, ჩამოვსულიყავი და გამეკეთებინა კარგი ტელევიზია, იმ შესაძლებლობებით, რაც მე გამაჩნია და გამიკეთებია. ახლა გადაწყდა რომ გამეკეთებინა დაბალანსებული, ნორმალური, ობიექტური ტელევიზია.
_ ვინ მოგიწვიათ?
_ თქვენ რა გაინტერესებთ _ ვანო ჩხარტიშვილმა ხომ არ მომიწვია ან ბიძინა ივანიშვილმა? მოდით, გეტყვით, რომ ეს ადამიანები ჩემგან შორს არც ერთი არ დგას. პირიქით, მე მოვიწვიე ისინი, მე ჩამოვედი, ვინც მომეხმარება და შემიქმნის ტექნიკურ ბაზას, გამომიცხადებს აბსოლუტურ ფინანსურ მხარდაჭერას, ეგ იქნება.
_ ანუ თქვენ არ უარყოფთ, რომ ტელევიზიის უკან ვანო ჩხარტიშვილი და ბიძინა ივანიშვილი დგანან?
_ არაფერს არ უარვყოფ, როგორ უნდა უარვყო? როგორ შეიძლება ასეთი რამ? ივანიშვილთან ძალიან ახლოს არ ვარ, მაგრამ ვანოსთან მეგობრობის წლები მაკავშირებს _ ტელეკომპანია “მზე” ერთად ჩამოვაყალიბეთ. როგორ არ მაქვს შეხება?! მაგათთანაც მაქვს და სხვებთანაც. უკან არავინ დგას, ეს ცნებები გადავდოთ _ პირდაპირ გეტყვით, გვერდით დგანან. ყველა ის ადამიანი, ვინც მე დამეხმარება, ეს იქნება ვანო ჩხარტიშვილი თუ ბიძინა ივანიშვილი, ან ჩემი ძმა, რომელიც უკრაინაში ცხოვრობს და არის ერთ-ერთი გავლენიანი პიროვნება. გეუბნებით პირდაპირ, ყოველგვარი მიკიბ-მოკიბვის გარეშე, რომ მე დავიხმარებ ყველას, ვინც დამეხმარება, რომ გავაკეთო ერთი ნორმალური ტელევიზია, რომელსაც იმსახურებს ოზურგეთი. არ იმსახურებს? რა არის ამაში გასაკვირი? ფული და შესაძლებლობები მაგათ აქვთ.
_ ხომ არ იქნება ტელევიზია მიკერძოებული?
_ არა, არანაირად არ იქნება მიკერძოებული. ეს იქნება აბსოლუტურად წესიერი და ნორმალური ტელევიზია, სადაც იქნება ყველა მხარე დაბალანსებული.
ტელეკომპანია “გურიას” ახალდანიშნული დირექტორის მოადგილე ლევან სკამკოჩაიშვილი “გურია ნიუსთან” საუბარში არ ადასტურებს ინფორმაციას იმის შესახებ, რომ ის ბიძინა ივანიშვილის პარტიის წარმომადგენელი იქნება ოზურგეთში.
_ არ შეესაბამება ეგ ინფორმაცია სიმართლეს. მე დღემდე საუბარი არ მქონია ბიძინასთან და არც მის წარმომადგენელთან. დღემდე ოფიციალურად ჩემთვის არავის არაფერი შემოუთავაზებია. თუ რაიმე იქნება, პირველად თქვენ გეტყვით.
_ არც შეიძლება მოხდეს?
_ არ მგონია. ერთადერთი, მე რისთვისაც აქ ვარ, არის ის, რომ ელდარს ყველანაირად შევუწყო ხელი და დავეხმარო, რომ შექმნას ობიექტური ტელევიზია.
_ თქვენ ჩხარტიშვილის ახლო მეგობარი ხართ, ისევე როგორც ბატონი ელდარი და ეს ყველაფერი დამთხვევაა?
_ მე იქ ვარ, სადაც ვარ…
