ურეკის კულტურის სახლი ერთ-ერთი გამორჩეული კულტურის სახლია ოზურგეთის მუნიციპალიტეტში. როგორც მისი დირექტორი ნუგზარ დვალიშვილი “გურია ნიუსთან” საუბარში ამბობს, კულტურის სახლში სულ 38 თანამშრომელია, რომლებსაც ბიძინა ივანიშვილი ქველმოქმედების სახით ხელფასს უხდიდა. იანვრიდან მათ ეს დაფინანსება შეუწყდებათ. ჩვენი ინფორმაციით, თანამშრომლებს განუცხადეს, რომ ივანიშვილისგან დაფინანსებაზე უარი თავად განაცხადონ, წინააღმდეგ შემთხვევაში კი სამსახურს დატოვებენ. ამ ინფორმაციას ხელისუფლების წარმომადგენლები უარყოფენ _ მათი თქმით, ივანიშვილი დაფინანსებაზე თავად ამბობს უარს.
“გურია ნიუსს” ამ საკითხთან დაკავშირებით ურეკის კულტურის სახლის რამდენიმე თანამშრომელი ესაუბრა.
_ იცით, კულტურის სახლი როგორ კარგად მუშაობს? ტარდება ღონისძიებები, კონცერტები. ბავშვებს ყველანაირი კომფორტი აქვთ შექმნილი. აქამდე ივანიშვილი აფინანსებდა მასწავლებლებს ხელფასებით, იანვრიდან მოიხსნება ეს დაფინანსება და მთლიანად ოზურგეთის ბიუჯეტზე გადავა. დაცვას, რომელმაც დილიდან დილამდე უნდა იმორიგეოს და აქამდე 250 ლარი ჰქონდა ხელფასი, ექნება 80 ლარი. თანამშრომლებმა როცა ეს ამბავი გაიგეს, ტიროდნენ _ ბანკის ვალები აქვთ, ან შვილები რითი უნდა გამოკვებონ? 100 ლარზე ზევით ხელფასი არც ერთს აღარ ექნება, _ გვითხრა ერთ-ერთმა თანამშრომელმა.
_ ჩემი დისშვილი მუშაობდა კულტურის სახლში და მოუხსნეს ივანიშვილის დაფინანსება. ხალხს უთხრეს, არ მიიღოთ ივანიშვილის ფულებიო. იმყოფინეთ 80 ლარი, თუ არა, წადით სახლშიო, _ ამბობს ერთ-ერთი მოქალაქე.
ურეკის კულტურის სახლის მომღერალი ვახტანგ ასლანოვი “გურია ნიუსთან” ამ საკითხზე თამამად საუბრობს:
_ მე ვმუშაობ კულტურის სახლში, ვარ მომღერალი. თუ დამიჭერენ ამ სიტყვებისთვის, გეფიცებით, უკეთესია, საჭმელს მაინც მაჭმევენ უფასოდ. ვიღებდი ივანიშვილისგან დამატებით ხელფასს _ ყოველთვიურად ას ლარს. ოზურგეთის ბიუჯეტი კი გვიხდის 80 ლარს. ერთ დღესაც გამოგვიცხადეს, უარი თქვით მის დაფინანსებაზეო. ის კი არ გვიწყვეტს ხელფასის მოცემას, პირიქით, გვეუბნება, მოაწერეთ კონტრაქტს ხელი და გაგიგრძელდებათო, მაგრამ მთავრობამ გვითხრა, თუ მოაწერთ ხელს, იმასაც დაკარგავთ და ამასაცო.
_ ვინ გითხრათ ეს?
_ ოზურგეთის გამგებელმა, ვაშაყმაძემ უთხრა კულტურის სახლის დირექტორს, მან გაფრთხილება მოგვცა. ის კი არა, 5 ტონა საწვავი მოვითხოვეთ გათბობისთვის. გამგებელს უთქვამს, კიდევ კარგი რომ არ მოიტანე ეს განცხადება აქ, თორემ სამსახურს დაკარგავდითო და აღარ მოგვცეს სალიარი, ასობით ბავშვი სიცივით იყინება. ბიძინას ხელფასით ვარსებობდით და ახლა მაგასაც ხსნიან! _ გვითხრა ასლანოვმა.
ოზურგეთის მუნიციპალიტეტის გამგებლის მოვალეობის შემსრულებელი ილია ვაშაყმაძე “გურია ნიუსთან” საუბარში არ ადასტურებს აღნიშნულ ინფორმაციას:
_ ეს არის ტყუილი. ურეკის სახლის დირექტორთან კი არა, ყველა ორგანიზაციის წარმომადგენლებთან მქონდა წინასწარ შეხვედრა. როგორც ადრე ვაფინანსებდით, ახლაც ისე დავაფინანსებთ. ის დანამატი იყო ივანიშვილის და უწყდებათ იანვრიდან. ვინ იცის მერე, გაუფორმებს თუ არ გაუფორმებს, ან ვინ უთხრა თანამშრომლებს, არ გაიფორმოთო?!
_ ისინი ამბობენ, რომ გვეუბნებიან, თავად თქვით უარი დაფინანსებაზეო.
_ მე ვფიქრობ, რომ არც არავინ გაუგრძელებს დაფინანსებას. ჩემი აზრით, ეგეც რომ არ იყოს, არავის არაფერი არ უთქვამს მაგათთვის. ეგ ტყუილია.
_ საწვავთან დაკავშირებით არსებულ პრობლემაზე რას გვეტყვით? როგორც ვიცით, ეს თემაც ივანიშვილს უკავშირდება.
_ ნამდვილად არ არის იმის საშუალება, რომ ყოველდღე გავათბოთ კულტურის სახლი. ეს ძალიან დიდ თანხებთან იქნება დაკავშირებული. არ გვქონდა ჩვენ ეს ბიუჯეტით წელს გათვალისწინებული. ეგ საკითხი არ ვიცი, შეიძლება კი უკავშირდება ივანიშვილს. ალბათ, აძლევდა ის საწვავს, რადგან მათ ჰქონდათ გათბობა და ეს ჩვენგან არ მიდიოდა. შევთავაზე, რომ რეპეტიციები ჩატარდეს ერთ ოთახში, რომელიც შედარებით ადვილად გათბება და იმ დღეებში, როცა იქნება ღონისძიებები და დღესასწაულები, გავათბობთ კულტურის სახლს. ყოველდღე რომ იყოს გათბობა, ამის საშუალება არ გვაქვს.
_ იმას თუ დაადასტურებთ, რომ კულტურის სახლის თანამშრომლები შემცირებაში მოჰყვნენ.
_ შემცირებაში არავინ არ მოყოლია, ყველა მუშაობს.
ინფორმაციის გადასამოწმებლად “გურია ნიუსი” ურეკის კულტურის სახლში მივიდა. იქ მისულებს, სამხატვრო ხელმძღვანელმა, კახა გვარამაძემ დირექტორის ოთახში შესვლა, ლამის, აგვიკრძალა:
_ სად მიდიხართ? რატომ? ჩვენ გვყავს პრესსამსახური და მას მიმართეთ, _ შემოგვყვა დირექტორის ოთახში გვარამაძე, თავად დირექტორი კი საუბარზე უპრობლემოდ დაგვთანხმდა.
ნუგზარ დვალიშვილი “გურია ნიუსთან” საუბარში ამბობს, რომ ჯერ ივანიშვილის მიერ დაფინანსება მოხსნილი არაა და ის იანვრიდან შეწყდება:
_ ჯერჯერობით, ივანიშვილის დაფინანსება მოხსნილი არ არის, ვადა დეკემბრის ბოლომდეა. მაგრამ თუ ხელშეკრულება არ აღდგება, რა თქმა უნდა, აღარ ექნებათ დაფინანსება.
_ როგორც ვიცი, თქვენ ყოფილხართ შუამავალი გამგებელსა და თანამშრომლებს შორის ამ საკითხთან დაკავშირებით.
_ ვინ მოგაწოდათ ეს ინფორმაცია?! გამგეობა აქ არაფერ შუაში არაა. თუ თვითონ, ამ ქველმოქმედების გამცემი უარს იტყვის დაფინანსებაზე, ეს მისი ნებაა. ასე კატეგორიულად არავის არაფერი უთქვამს. გამგებელთან ერთად ბიუჯეტი გავიარე. მას რომ ისეთი დილემის წინაშე დავეყენებინეთ, თანამშრომლებს უარი თავად ეთქვათ, ასეთი რამ არ ყოფილა. ეს არ არის სწორი.
_ გათბობასთან დაკავშირებით რა ხდება? ივანიშვილი ყოველ ზამთარს 5 ტონა საწვავს გაძლევდათ.
_ ამ წუთში მწვავედ დგას ეს საკითხი. ფიზიკურად არ არის ამის საშუალებაო და უარი მივიღეთ გამგეობიდან. წუთს კულტურის სახლი არ თბება, ეს შეგიძლიათ, თქვენც ნახოთ.
_ სულ რამდენი თანამშრომელი გყავთ?
_ 38. აქ არის მუსიკალური სტუდია, ქორეოგრაფიული, ხალხური სიმღერებისა და ესტრადის წრეები.
ურეკის რწმუნებული კი ამბობს, რომ ივანიშვილი კულტურის სახლს აფინანსებდა და ახლა აღარ დააფინანსებს. იგი არჩევნებში მონაწილეობას მიღებას აპირებს და გამოვა, რომ ხმებს ყიდულობს.
