ჩვენი წყაროს ინფორმაციით, ოთხშაბათს, საღამოს, ლანჩხუთის მიხეილ ჩაჩავას სახელობის სამედიცინო ცენტრში 6 თვის პაციენტი გარდაიცვალა. როგორც გავარკვიეთ, პატარას გადასაყვანად სასწრაფო-სამედიცინო დახმარების ბრიგადა არ გამოუძახებიათ _ ის სამედიცინო ცენტრში ოჯახის წევრებმა, დაახლოებით, დღის 3 საათზე მიიყვანეს. საავადმყოფოში გვითხრეს, რომ პაციენტის მდგომარეობა იყო საშუალო სიმძიმის _ სავარაუდოდ, პატარას ანთება ჰქონდა: _ საავადმყოფოში მოყვანამდე, მშობლებმა ის უბნის ექიმს მიუყვანეს, რომელმაც ურჩია, რომ ბავშვი საავადმყოფოში წაეყვანათ. მეორე დღეს. 15 საათისთვის იგი საავადმყოფოში მოიყვანეს, მისი მდგომარეობა საშუალო სიმძიმის გახლდათ. ბავშვის მკურნალი ექიმი ნონა მურვანიძე იყო. პაციენტს ჩაუტარდა შესაბამისი პროცედურები. მიუხედავად იმისა, რომ პატარას საგანგაშო მდგომარეობა არ ჰქონია, სამწუხაროდ, დაახლოებით 8 საათზე, იგი გარდაიცვალა. თუ რა გახდა გარდაცვალების მიზეზი, ამაზე ვერაფერს გეტყვით, რადგან ექსპერტიზის დასკვნას ველოდებით, _ გვითხრა ცენტრ “ადიტის” დირექტორმა, თინათინ გოგუაძემ.
ჩვენი ინფორმაციით, დაღუპულის ოჯახი 6 თვის ჩვილის დაღუპვაში სამედიცინო ცენტრს ადანაშაულებს. პატარას დაღუპვით აღშფოთებულმა ნათესავებმა საავადმყოფოს ფანჯრები ჩაამტვრიეს. სამედიცინო ცენტრში გამოძახებული იყო პოლიცია _ სიტუაციის განმუხტვა სწორედ სამართალდამცველებმა მოახერხეს. “აქ ისეთი დაძაბული სიტუაცია იყო, რომ არა პოლიცია, არავინ იცის, რა მოხდებოდა,” _ გვითხრეს საავადმყოფოში.
როგორც გავიგეთ, გარდაცვლილი პატარას ოჯახი აკეთში ცხოვრობს. გვითხრეს ისიც, რომ მრავალშვილიან ოჯახს ფონდმა “იავნანამ” რამდენიმე თვის წინ აგარაკში სახლი შეუძინა.
შეგახსენებთ, რომ წელს, მიხეილ ჩაჩავას სახელობის სამედიცინო ცენტრი სკანდალში მეორედ ეხვევა _ წინა შემთხვევაში გია ორაგველიძის დაღუპვაში ოჯახი ასევე ლანჩხუთის სამედიცინო ცენტრს ადანაშაულებდა.
“გურია ნიუსი” გამოთქვამს უდიდეს გულისტკივილს პატარას დაღუპვის გამო და სამძიმარს უცხადებს ოჯახსა და ახლობლებს.
