26 დეკემბერს გაიმართა ოზურგეთის მუნიციპალიტეტის საკრებულოს რიგგარეშე სხდომა, სადაც დღის წესრიგით გათვალისწინებული 6 საკითხი, მეტ-ნაკლები ხმაურით, მოკლე დროში განიხილეს. პირველი საკითხი _ ოზურგეთის მუნიციპალიტეტის 2011 წლის ბიუჯეტის დამტკიცების შესახებ, ოზურგეთის მუნიციპალიტეტის საკრებულოს 2010 წლის 29 დეკემბრის #49 დადგენილებაში ცვლილების შეტანას შეეხებოდა. ოზურგეთის მუნიციპალიტეტის გამგეობის საფინანსო სამსახურის უფროსმა, ლია ქათამიძემ განმარტა, რომ საახალწლო ღონისძიებებისთვის, საქართველოს პრეზიდენტის განკარგულებით, პრეზიდენტის ფონდიდან ოზურგეთის მუნიციპალიტეტს 45 000 ლარი გამოეყო. ხოლო პრემიერ-მინისტრის 2011 წლის 21 დეკემბრის #927 ბრძანებით ოზურგეთის მუნიციპალიტეტისთვის საქართველოს სარეზერვო ფონდიდან 75 200 ლარი გამოიყო, რაც ძვირადღირებული ავტომანქანის შესაძენად გაიხარჯება!
პირველი საკითხის განხილვისას, ოპოზიციონერი დეპუტატი ლელა ნაცვალაძე ხმამაღალი განცხადებით ჩაერთო პოლემიკაში და დაუყოვნებლივ მოითხოვა პასუხი კითხვაზე _ რაში, რატომ და ვისთვის უნდა დაიხარჯოს საახალწლოდ 45 000 ლარი! მას უმალ უპასუხეს, რომ დედაქალაქიდან ნიაზ დიასამიძე ჩამოვა თავისი ანსამბლით, ისინი იმღერებენ ოზურგეთელებისთვის, შემდეგ კი ამ თანხას მიიღებენ, პრეზიდენტმა გამოუყოო(?). აი, ამას მართლა კი ჰქვია ხალხისთვის ენის გამოყოფაო, _ ჩაილაპარაკა ნაცვალაძემ და ხმას აუწია: ჩვენი ანსამბლისთვის გამოგეყოთ თანხა და იმათ ემღერათ, კარის მომღერალს რომ ჩუქნითო. ალეკო მამეშვილმა სასწრაფოდ მოუჭრა, შენ არ იყავი, კულტურის ცენტრის დაფინანსებას რომ აპროტესტებდი, ხან ჭრი და ხან კერავ?! ნაცვალაძე კვლავ გაჯიქდა: მე იმას ვაპროტესტებდი, იქ 93 თანამშრომელი რომ გყავთ და არა მომღერლების დაფინანსებასო, გაბერეთ კიდევ 93 შტატით, რა გენაღვლებათ… ქალბატონმა ლელამ იმ 39 500 ლარის გაშიფვრაც მოთხოვა კოლეგებს, რომელიც ადგილობრივი ბიუჯეტით არის გამოყოფილი საახალწლო ღონისძიებებისთვის. რა თქმა უნდა, პასუხი აქაც წინასწარ იყო იყო მზად: სცენის მოწყობას და ნაძვის ხის მორთვას დასჭირდებაო… მიუხედავად საახალწლო “ფეშქეშებზე” ხმაურისა, ლელა ნაცვალაძის გვერდის ავლით, ამ საკითხს კენჭი მაინც უყარეს.
დღის წესრიგით გათვალისწინებულ მეორე საკითხზე “ოზურგეთის მუნიციპალიტეტის 2012 წლის სახელმწიფო შესყიდვების გეგმის დამტკიცების შესახებ” _ ოზურგეთის მუნიციპალიტეტის საკრებულოს განკარგულების დამტკიცების თაობაზე ამირან გირკელიძემ ისაუბრა. უფრო სწორად, მოკლედ მოჭრა, ცვლილებებია და წერილობით დარიგებულ დღის წესრიგში გაეცანითო.
ასე ჩქარ ტემპში განიხილეს დანარჩენი 4 საკითხიც _ სოციალური დახმარებების, მუნიციპალიტეტის ტერიტორიაზე სათამაშო ბიზნესის მოსაკრებლის შემოღების, საკუთრებაში არსებული ძირითადი ქონების გასხვისების შესახებ განკარგულების და ოზურგეთის მუნიციპალიტეტის საკრებულოს 2012 წლის სამუშაო გეგმის დამტკიცების შესახებ. საკრებულოს თავმჯდომარე დეპუტატებსა და მოწვეულ სტუმრებს საახალწლო სურვილებით დაემშვიდობა.
