ერთიანი ნაციონალური მოძრაობის ჩოხატაურის რაიონულ ორგანიზაციაში პარტიის წევრთა სია არ აქვთ. როგორც გვითხრეს, “ჩიპზე ჩაწერილი სია”, პარტიის რაიონული ორგანიზაციის პოლიტიკურმა მდივანმა, ზაურ ოსეფაიშვილმა იმ მიზეზით წაიღო, რომ ნაციონალების ოფისში კომპიუტერი აქვთ გაფუჭებული. მმართველის პარტიის ჩოხატაურის ოფისში არც ის იციან დაზუსტებით, ვინ არის პარტიის თავმჯდომარე:
_ თუ არ ვცდები, გამგებელი, ლელა იმედაშვილი. ბრძანება მასზე უნდა ჩამოსულიყო, _ გვითხრეს პარტიის ოფისში.
ჩოხატაურის მუნიციპალიტეტის გამგებელთან, ლელა იმედაშვილთან შეხვედრა იმ მიზეზით ვერ მოხერხდა, რომ ის გუბერნიაში თათბირზე იმყოფებოდა.
ზაურ ოსეფაიშვილი ჩოხატაურის საკრებულოს სოციალურ საკითხთა კომისიის წევრია. იგი ჩვენთან საუბრისას ამბობს, რომ პარტიის ჩოხატაურის ორგანიზაციის ხელმძღვანელის ვინაობა არ იცის და არც პარტიის წევრთა სია გააჩნია:
_ პარტიაში გითხრეს, რომ სია მე წამოვიღე? მოუტყუებიხარ! _ გვითხრა ოსეფაიშვილმა და აღნიშნა, რომ ჩვენთან საუბრის “დილიხორზე” არ იყო და განმარტებებს არ გააკეთებდა. უფრო მეტიც, ოსეფაიშვილი შეურაცხყოფაზე გადავიდა, კაბინეტში გადაღება აგვიკრძალა და დასძინა, რომ მას კითხვებზე პასუხის გაცემის ვალდებულება არ გააჩნია.
“ნაციონალური მოძრაობის” ოფიციალური ვებგვერდზე გამოქვეყნებული ინფორმაციის თანახმად, ჩოხატაურში პარტიის თავმჯდომარე გამგებლის მოადგილე გია გიორგაძეა, თუმცა, მან ამის შესახებ არაფერი იცის. პარტიის ხელმძღვანელის და წევრების შესახებ ინფორმაციას არც გამგებლის მეორე მოადგილე, დიმიტრი კორიფაძე ფლობს, რომელიც მისივე თქმით, ნაციონალური მოძრაობის წევრი არ არის.
ჩოხატაურში, სოფლის რწმუნებულების უმრავლესობა მმართველი პარტიის წევრია. დაბის რწმუნებული გოჩა ჯინჭარაძე, გოგოლესუბნის რწმუნებული აკაკი ყაჭეიშვილი და ნაბეღლავის რწმუნებული გია კალანდაძე ჩვენთან საუბრისას ადასტურებენ, რომ პარტიის წევრები არიან. ხევის რწმუნებულს, ლევან მამალაძეს კი დაზუსტებით არ ახსოვს:
_ კი ვიქნები, კი. თუმცა, მანდატი არ მაქვს და საწევროს არ ვიხდი, _ გვითხრა მამალაძემ.
სოფელ ზემო სურების რწმუნებულმა, ლევან ლომინეიშვილმა ჩვენთან საუბარში დაადასტურა, რომ მმართველი პარტიის წევრია, თუმცა, რამდენიმე წუთში დაგვირეკა და გვითხრა, რომ პარტიის წევრი არ არის(?!).
ასევე, “ნაციონალური მოძრაობის” ოფიციალურ ვებგვერდზე გამოქვეყნებული ინფორმაციით დასტურდება, რომ ოზურგეთში რაიონული ორგანიზაციის თავმჯდომარე ამჟამად პატიმრობაში მყოფი ყოფილი გამგებელი, გია ტაკიძეა, თუმცა, როგორც გამგებლის მოვალეობის შემსრულებელმა, ილია ვაშაყმაძემ გვითხრა, ნაციონალური მოძრაობის ოზურგეთის რაიონულ ორგანიზაციას ის ხელმძღვანელობს. მისივე თქმით, მას არ აქვს დაზუსტებული ინფორმაცია იმის შესახებ, თუ რომელი სოფლის რწმუნებულია პარტიის წვერი:
_ დაზუსტებით არ ვიცი, თუმცა, ალბათ იქნებიან, _ გვითხრა ვაშაყმაძემ.
რაც შეეხება ლანჩხუთს, აქ მმართველი პარტიის ადგილობრივ ორგანიზაციას გამგებელი, გია გოგუაძე უდგას სათავეში.
სოფელ სუფსის რწმუნებული ელგუჯა ჩხარტიშვილი კითხვაზე, არის თუ არა ნაციონალური მოძრაობის წევრი, იმ მიზეზით არ გვპასუხობს, რომ დაკავებულია, თუმცა, იმისთვის კი მოიცალა, რომ დაინტერესებულიყო, ვინ მოგვცა მისი ტელეფონის ნომერი, რომელიც ლანჩხუთის მუნიციპალიტეტის ოფიციალურ ვებგვერდზეა გამოქვეყნებული:
_ საახალწლოდ მეკითხებით რამეს? კარგით, მე თვითონ დაგირეკავთ, ახლა ხალხი მყავს და დაკავებული ვარ, _ გვითხრა ჩხარტიშვილმა.
ნიგვზიანის რწმუნებულის, ირაკლი გუჯაბიძის თქმით, იგი “ნაცმოძრაობის” წევრი არ არის:
_ წევრი არ ვარ, მხარდამჭერი ვარ, _ დაგვიკონკრეტა გუჯაბიძემ.
შუხუთის რწმუნებული გოჩა მოქიამ ამ კითხვაზე იმიტომ არ გვიპასუხა, რომ, თურმე, “ჟურნალისტებთან საუბარს მიჩვეული არ არის”(?!).
სოფელ აცანის რწმუნებულის, მინდია ქინქლაძის თქმით, ამჟამად არ არის “ნაცმოძრაობის” წევრი, თუმცა აპირებს, რომ გახდეს.
როგორც მოვიკვლიეთ, სოფლების რწმუნებულების უმეტესობა ნაციონალური მოძრაობის წევრია. იგივე სიტუაციაა იმერეთში, კახეთში, სამეგრელოში, ქართლში. სწორედ პარტიის წევრები დადიან კარდაკარ და 30-ლარიან ვაუჩერს არიგებენ პრეზიდენტის სახელით. და ეს მაშინ, როცა ხელისუფლება პოლიტიკური პარტიების თანაბარ საარჩევნო უფლებებზე საუბრობს, იღებს კანონს და კრძალავს საჩუქრების დარიგებას ნებისმიერი პარტიის წევრების მიერ. თუმცა, ჩვენს მიერ მოძიებული ეს ფაქტები ადასტურებენ, რომ ხელისუფლებისთვის კანონი არ კანონობს.
