ამის შესახებ, იმდროინდელმა შრომის, ჯანმრთელობისა და სოციალური დაცვის მინისტრმა ალექსანდრე კვიტაშვილმა პარლამენტის ჯანმრთელობის დაცვისა და სოციალურ საკითხთა კომიტეტის სხდომაზე განაცხადა:
_ “აიჰოპს” სახელმწიფოს წინაშე ნაკისრი ყველა ვალდებულება გაუუქმდა. თუმცა, თუ კომპანია დაფინანსების წყაროს მოიძიებს და პროექტის გახორციელებაში მონაწილეობის სურვილს გამოთქვამს, მთავრობა მასთან თანამშრომლობისთვის მზად იქნება, _ აღნიშნა კვიტაშვილმა.
ამ განცხადებიდან რამდენიმე ხანში გამოჩნდა შპს “ადითი”, რომელიც მთავრობის მიერ გაკრიტიკებული “აიჰოპის” შვილობილი კომპანიაა. “ადითმა” მოახერხა და საავადმყოფოები საქართველოს 9 ქალაქში შეიძინა _ მათ შორის, ჩოხატაურსა და ლანჩხუთში. უცნობია, რა გადაიხადა ებრაულმა კომპანიამ საავადმყოფოებში და რა ვალდებულებები აქვს აღებული მას სახელმწიფოს წინაშე, თუმცა, ცნობილია, რომ “ადითმა” საავადმყოფოებში შესვლისთანავე მედპერსონალს ხელფასები გაუნახევრა, ბოლოს კი კადრებიც მინიმუმამდე დაიყვანა. გამონაკლისი არც ჩოხატაური აღმოჩნდა _ რამდენიმე კვირის წინ, უხელფასობით შეწუხებულმა ჩოხატაურელმა მედიკოსებმა უკეთესი მომავლის იმედით გაფიცვა მოაწყვეს, ხელისუფლებიდან და პოლიციიდან(?!) სიტყვიერად მხარდაჭერის პირობაც მიიღეს, თუმცა უშედეგოდ _ “ადითმა” ხელფასების მომატების და მისი დროულად დარიგების ნაცვლად, გასული წლის მიწურულს სამსახურიდან ათეული ადამიანი გაუშვა.
ჩოხატაურის საავადმყოფოს _ შპს “ადითის” დირექტორი, თემურ კოროშინაძე ამბობს, რომ თანამშრომლების გათავისუფლება კომპანიის ცენტრალურ ოფისში გადაწყდა:
_ რაოდენობრივად არ დამითვლია გათავისუფლებული ადამიანების რიცხვი, მაგრამ დაახლოებით 20-მდეა.
_ რატომ გაუშვით ამდენი თანამშრომელი სახლში?
_ ამოიწურა ხელშეკრულების ვადა და ამის გამო მოხდა თანამშრომლების გათავისუფლება სამსახურიდან. სამედიცინო დაწესებულება ახალი თანამშრომლებით დაკომპლექტდება.
_ ახალი ვინ იქნება?
_ ვისაც გაუფორმდება ხელშეკრულება.
_ როგორც გვითხრეს, საავადმყოფო დატოვეს ცნობილმა მედიკოსებმა _ პოლინა დგებუაძემ, ლევან მეგრელიშვილმა, ფატიმა ბაიაჯანმა…
_ არა. ეს შეეხო საშუალო და უმცროს პერსონალს _ ექთნებსა და სანიტრებს.
_ რა პრინციპით გაათავისუფლეთ კადრები?
_ ცენტრალური ოფისის გადაწყვეტილება და პოზიციაა ეს.
_ ცენტრალური ოფისის წარმომადგენლები თქვენს თანამშრომლებს იცნობენ? საავადმყოფოს პერსონალი ჩვენთან საუბრისას ამბობს, რომ კომპანიის ხელმძღვანელობა მათ არც კი შეხვედრია…
_ რა თქმა უნდა იცნობენ.
_ ბატონო თემურ, “ადითის” ხელმძღვანელობას ჩოხატაურში მომუშავე პერსონალის პროფესიონალიზმის შესახებ რა ინფორმაცია აქვს? თქვენგან მიწოდებული?
_ მათ ყველა თანამშრომლის შესახებ აქვთ დეტალური ინფორმაცია, _ გვითხრა კოროშინაძემ.
“გურია ნიუსთან” საუბრისას ქირურგი პოლინა დგებუაძე ამბობს, რომ ის სამსახურიდან არ გაუშვიათ. პედიატრ ფატიმა ბაიაჯანის თქმით კი, ის სამსახურიდან საკუთარი სურვილით წამოვიდა: _ მე უფრო ადრე წამოვედი, ვიდრე გათავისუფლებები დაიწყებოდა. წამოვედი იმიტომ, რომ მიზერულ ხელფასზე მუშაობა წარმოუდგენელია. კაპიკებს გვაძლევდნენ და იმასაც აგვიანებდნენ, _ აღნიშნა ბაიაჯანმა.
ჩვენი წყაროს ინფორმაციით, ჩოხატაურის საავადმყოფოდან გაათავისუფლეს ლევან მეგრელიშვილი, ლიანა თოდრაძე, მაია ბეთხობელი, ხათუნა შათირიშვილი, ლია მამალაძე, თამარ თოლოდრავა, ნანა სიხარულიძე, ნინო მეგრელიშვილი, ლიანა ჟღენტი, ეთერი ჯიქია, ნატო კობიძე, ნათია ბენდელიანი, ნათია ცინცაძე, სვეტლანა საჯაია, მელანო ვაჩეიშვილი, ნუნუ კალანდაძე, ქეთევან ონიანი, ნანი ხაბეიშვილი, ციალა ბოდოკია, იამზე მეფარიშვილი და დინერი ჭიხვარია.
ჩოხატაურის მუნიციპალიტეტის გამგებლის, ლელა იმედაშვილის თქმით, “ადითი” კერძო კომპანიაა და სახელმწიფო მის საქმიანობაში ვერ ჩაერევა: _ ძალიან სამწუხარო ფაქტია, რომ ამდენი ადამიანი უმუშევარი დარჩა. “ადითი” კერძო კომპანიაა და ჩვენ მის საქმიანობაში ჩარევის უფლება არ გაქვს, თუმცა, უმოქმედოდ ნამდვილად არ ვართ, _ გვითხრა გამგებელმა.
“გურია ნიუსი” ამ საკითხზე ჯანდაცვის მინისტრს, ანდრია ურუშაძეს დაუკავშირდა: _ თანამშრომლების გათავისუფლების შესახებ ვერაფერს გეტყვით, რადგან “ადითი” კერძო კომპანიაა და ჩვენ მათ საქმიანობაში ჩარევის უფლება არ გვაქვს. თუმცა, არ უარვყოფ, რომ ჩოხატაურის საავადმყოფოში პრობლემებია, ვფლობთ ყველა ინფორმაციას და იანვრის ბოლომდე ეს საკითხი მოგვარდება, _ ასეთია მინისტრის კომენტარი ამ თემასთან დაკავშირებით, თუმცა, როცა პრეზიდენტი ახალ საავადმყოფოებს ხსნის, არავინ ამბობს, რომ ეს ობიექტები კერძო კომპანიის საკუთრებაა.
ჩვენ მიერ მოპოვებული ინფორმაციით კი, “ადითი” შეუსრულებელი ვალდებულების გამო, “აიჰოპის” ბედს გაიზიარებს და მალე მას ჩოხატაურის დატოვება მოუწევს. მით უმეტეს, რომ ერთ-ერთი ვალდებულების თანახმად, “ადითს” 2012 წელში ჩოხატაურში ახალი საავადმყოფო უნდა გაეხსნა, მშენებლობა კი დღემდე არ დაწყებულა. თემურ კოროშინაძის თქმით, მას ამის შესახებ ინფორმაცია არ აქვს:
_ მე ამ ინფორმაციას არ ვფლობ. მოარული ხმების დონეზე მსჯელობა კი ალბათ არასწორი იქნება და ოფიციალურად ამის შესახებ არაფერია ცნობილი, _ გვითხრა კოროშინაძემ.
ამ ინფორმაციას არც ჩოხატაურის მუნიციპალიტეტის გამგეობაში ადასტურებენ. ლელა იმედაშვილის თქმით, ჯანდაცვის სამინისტრო ჩოხატაურის საავადმყოფოში განვითარებული მოვლენების საქმის კურსშია:
_ ჯანდაცვის სამინისტრო ყველა ინფორმაციას ფლობს. ჩვენც მოვლენების განვითარებას ველოდებით, _ აღნიშნა გამგებელმა.
ჯანდაცვის სამინისტროში დაგვიდასტურეს, რომ ამ საკითხზე აქტიურად მუშაობენ და დეტალები თვის ბოლოს გახდება ცნობილი.
წყაროს ინფორმაციით, “ადითს” მამული გუდავაძის კლინიკა “მამქოლი” ჩაანაცვლებს, რომლის მშენებლობა უკვე დასრულებულია და ახალი საავადმყოფო ფუნქციონირებას მიმდინარე წელს, არჩევნებამდე ცოტა ხნით ადრე დაიწყებს.
