(გურია ნიუსი, ოზურგეთი) _ მორიგი ყაჩაღობა ოზურგეთში გასულ კვირას დაფიქსირდა. როგორც “გურია ნიუსისთვის” გახდა ცნობილი, მერაბ ჭანიშვილი და მისი მეუღლე რუსიკო სიმონიშვილი რუსეთიდან ახალი ჩამოსულები იყვნენ, როცა დააყაჩაღეს. მათთან ორი პირი მივიდა, რომლებმაც მოახერხეს სახლიდან ფულის და ოქროს წაღება. დაზარალებულებმა ამ ყაჩაღობის შესახებ სამართალდამცველებთან განაცხადეს.
17 იანვარს, შინაგან საქმეთა სამინისტრომ საქმე გახსნილად გამოაცხადა და რამდენიმე პირის დაკავების შესახებ ოფიციალური ინფორმაცია გაავრცელა: “ქ. თბილისის დიდუბე-ჩუღურეთის რაიონის პოლიციის სამმართველოსა და ოზურგეთის რაიონული სამმართველოს თანამშრომლებმა, ერთობლივად გატარებული ოპერატიულ-სამძებრო ღონისძიების შედეგად, ქ. თბილისში, ყაჩაღობის ბრალდებით დააკავეს 1981 წელს დაბადებული კახაბერ კალანდაძე და 1984 წელს დაბადებული გიორგი გოგუაძე.
2012 წლის 12 იანვარს, ქ. ოზურგეთში, აღნიშნული პირები ნიღბებით და ცეცხლსასროლი იარაღით ყაჩაღურად თავს დაესხნენ რუსუდან სიმონიშვილის ოჯახს და მუქარისა და ფიზიკური ზეწოლის შედეგად გაიტაცეს ფულადი თანხა _ 3 000 ლარი, 1 100 აშშ დოლარი, 10 000 რუსული რუბლი და ოქროს ნივთები.
აღნიშნულ საქმესთან დაკავშირებით, ასევე დაკავებულია 1984 წელს დაბადებული კარლო შავიშვილი, რომელიც გატაცებული ნივთების რეალიზაციას ახდენდა. პოლიციის მიერ ჩატარებული ჩხრეკისას ამოღებულია აღნიშნული ფულადი თანხის ნაწილი და ოქროს ნაკეთობები.
სამივე დაკავებული აღიარებს მათ მიერ ჩადენილ დანაშაულს. გამოძიება მიმდინარეობს სსკ-ის 179-ე (ყაჩაღობა) და 186-ე (წინასწარი შეცნობით დანაშაულებრივი გზით მოპოვებული ნივთის შეძენა ან გასაღება) მუხლებით”.
ბოლო ერთი თვის განმავლობაში, ეს გურიაში მომხდარი რიგით მეხუთე ყაჩაღობაა.
