(გურია ნიუსი, ლანჩხუთი) _ ლანჩხუთის ცენტრალურ საფეხბურთო არენას რეკონსტრუქცია ჩაუტარდება _ ამის შესახებ განცხადება რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა ლანჩხუთში სტუმრობისას გააკეთა. მან საფეხბურთო კლუბ “გურიას” სტადიონი არქიტექტორებთან ერთად მოინახულა. მინისტრს ახლდნენ გურიის გუბერნატორი ვალერი ჩიტაიშვილი და ადგილობრივი ხელისუფლების წარმომადგენლები.
რამაზ ნიკოლაიშვილის თქმით, ცენტრალური სტადიონის რეკონსტრუქცია უახლოეს პერიოდში დაიწყება და თანამედროვე სტანდარტების შესაფერისი სტადიონი გაკეთდება. არქიტექტორები პირველ რიგში დეტალურად შეისწავლიან არსებულ მდგომარეობას, კონსტრუქტორები დაადგენენ სტადიონის ტრიბუნის მდგრადობას და ამის შემდეგ გაკეთდება პროექტი.
გურიის რეგიონული ფეხბურთის ფედერაციის პრეზიდენტის, კახაბერ ებრალიძის განცხადებით, ხელისუფლებამ ლანჩხუთელ გულშემატკივრებს დიდი საჩუქარი გაუკეთა: “ლანჩხუთის საფეხბურთო საზოგადოებისა და ქომაგების სახელით, მინდა, დიდი მადლობა გადავუხადო ბატონ რამაზ ნიკოლაიშვილს და იმ ადამიანებს, რომლებიც ამ გაჭირვების ჟამს ლანჩხუთის “გურიას” გვერდში დაუდგნენ. ჩვენი მხრივ ვეცდებით, რომ მათი მხარდაჭერა გავამართლოთ და მაქსიმუმს გავაკეთებთ იმისთვის, რომ “გურია” ჯერ უმაღლეს ლიგას, შემდეგ კი ქართული ფეხბურთის ელიტას დაუბრუნდეს”, _ გვითხრა ებრალიძემ.
შეგახსენებთ, რომ ლანჩხუთის მთავარ არენას ბოლოს რეკონსტრუქცია ზუსტად 26 წლის წინ ჩაუტარდა _ “გურიას” უმაღლეს ლიგაში გადასვლასთან დაკავშირებით არენა ზამთრის სუსხიან ერთ თვეში გაკეთდა, რაც 25 მილიონი მანეთი დაჯდა, როცა რაიონის ბიუჯეტი მხოლოდ ამის მეხუთედი იყო. მაშინ დაგებული მინდვრის საფარი და სადრენაჟე გაყვანილობა ბოლო დრომდე იდეალურად გამოიყურებოდა.
სტადიონი “გურიას” ყველა დროის საუკეთესო პატრონის, ევგრაფი შევარდნაძის სახელს ატარებს _ ეს 90-იანი წლების დასაწყისიდან, მანამდე არენა ანდრო ჟორდანიას სახელობისა გახლდათ.
რაც შეეხება კლუბ “გურიას”, მან უკვე გაინაღდა უმაღლესი ლიგის პლეი-ოფში თამაშის უფლება. ლანჩხუთელები წელს უმაღლეს ლიგაში გადასვლას გეგმავენ და საამისოდ კარგი გუნდის შეკრება სურთ. მთავარი მწვრთნელის, გიგლა იმნაძის განკარგულებაში ამჟამად 28 ფეხბურთელია, რომელთაგან ნახევარზე მეტი ადგილობრივები არიან. კლუბს 13 ახალწვეული ჰყავს, თუმცა, რამდენს დაიტოვებენ, ჯერ გადაწყვეტილი არ არის. ცნობილი სახეებიდან აღსანიშნავია დავით ბაქრაძის “გურიაში” გამოჩენა _ იგი ბოლოს გორის “დილას” ღირსებას იცავდა. გუნდში სინჯებს, როგორც ვთქვით, 13 ახალწვეული (ანო ჩასემი, მოსიაშვილი, ჩარგელიშვილი, ბაკარნაძე, სამსეიშვილი, ხაჩიძე, გედენიძე, საცერაძე, ზურაბ კვარაცხელია, გორგუჩაძე, ჯოხაძე, თორნიკე შალიკაშვილი) გადის, მათგან ნაწილს უმაღლეს ლიგაში თამაშის გამოცდილება აქვს. კლუბში ერთი კამერუნელი ვარჯიშობს _ ესაა ანო ჩასემი. ორი წლის წინ კლუბში 4 კამერუნელი ირიცხებოდა, თუმცა, მათთვის დოკუმენტების მოგვარება ვერ მოხერხდა და ოფიციალურ შეხვედრაში არ უთამაშიათ.
როგორც კლუბის ადმინისტრაციაში გვითხრეს, ამჟამად სინჯებზე მყოფთაგან ნაწილს დაიტოვებენ და კლუბის გაძლიერებას რამდენიმე გამოცდილი ფეხბურთელით გეგმავენ. “გურიას” ამ ეტაპზე მეკარის პრობლემა აქვს და რამდენიმე გამოცდილ კიპერთან აწარმოებენ მოლაპარაკებას.
რაც შეეხება ტესტ-მატჩებს _ “გურიამ” ოზურგეთში თანაკუთხელ “მერცხალს” 4:1 მოუგო. 19 იანვარს ლანჩხუთელები გრიგოლეთში ფოთის “კოლხეთს” შეხვდებიან, ხოლო 21-ში ზუგდიდში “ბაიას” ესტუმრებიან.
შეგახსენებთ, რომ 2012 წელი “გურიის” აღორძინების წლად გამოცხადდა და ამ ეგიდით კლუბის უმაღლეს ლიგაში გადასვლა და სტადიონის გაკეთება იგეგმება.
