ოზურგეთში, ფარნავაზ მეფის ქუჩაზე მცხოვრებ მარტოხელა მოხუც სეფე კუპატაძეს, საკალანდოდ მიუტანეს “ენერგო-პრო ჯორჯიას” ქვითარი, სადაც მითითებულია გახარჯული ელექტროენერგიის საფასური _ 282 ლარისა და 43 თეთრი: _ თუ აღნიშნული დავალიანება 20 იანვრამდე არ იქნება დაფარული, შეგიწყდებათ ელექტროენერგიის მიწოდება, _ აფრთხილებენ მოხუცს.
“გურია ნიუსი” უკვე წერდა სეფე კუპატაძის გასაჭირის შესახებ. ის წარმოშობით იმერეთის ერთ-ერთი რაიონიდანაა, გურიაში ათეული წლების წინ ჩამოვიდა. გარკვეული დროის განმავლობაში ქირით ცხოვრობდა. შემდეგ ფარნავაზ მეფის ქუჩაზე მდებარე სახლში დროებით შეუშვეს, სადაც ორგანიზაცია “ოზურგეთის წყალკანალი” იყო განთავსებული. კუპატაძე და ეს ორგანიზაცია ერთი მრიცხველით სარგებლობდნენ. გასული წლის მაისში “წყალკანალი” სხვაგან გადავიდა. სწორედ “წყალკანალის” დავალიანების გამო, აღნიშნულ სახლში შეწყდა გაზის მიწოდება. დალუქეს მილი, რის გამოც სეფე კუპატაძეც დაზარალდა. იმავე ორგანიზაციას ელექტროენერგიის დავალიანებაც გააჩნდა, თუმცა “ენერგო პრო ჯორჯიას” ოზურგეთის სერვისცენტრის ხელმძღვანელი, გია ნაკაიძე “გურია ნიუსთან” ამბობს, რომ იმ ორგანიზაციამ საკუთარი დავალიანება დაფარა, ეს კი კუპატაძის დავალიანებაა გასული წლის 6 თვის განმავლობაში.
სეფე კუპატაძეს ხელთ აქვს 2011 წელს მიღებული ქვითარი, სადაც მითითებულია დეკემბრის თვეში გახარჯული ელექტროენერგიის საფასური _ 46 ლარი და 38 თეთრი, რაც აბონენტს გადახდილი აქვს და დაბეჯითებით განმარტავს, რომ ტექნიკოსმა, რომელიც დროთა განმავლობაში იწერდა მისი მრიცხველიდან გახარჯული კილოვატების რაოდენობას, უთხრა, რომ სულ ამ თვეების განმავლობაში მოხმარებული ელექტროენერგიის საფასური 46 ლარს შეადგენდა:
_ მეც ავდექი და ეს ფული დეკემბერშივე გადავიხადე. ახლა კი, იანვარში მოვიდა ახალი ტექნიკოსი. ადრე ვინც მუშაობდა, ის გაუთავისუფლებიათ. ეს ახალი ტექნიკოსი მეუბნება, 282 ლარი დავალიანება გაქვსო (?). ყოველთვის პატიოსნად ვიხდი ყველანაირ გადასახადს, ახლა თავი ჩამოვიხრჩო თუ სად წავიდე უპატრონო მოხუცი? ამ დავალიანების დაფარვას ჩემი სამი თვის პენსია არ ეყოფა. ალბათ, სიცივით სიკვდილი მიწერია, _ ამბობს სეფე კუპატაძე.
ამ ფაქტის შესახებ, ენერგო-პრო ჯორჯიას ოზურგეთის ფილიალის ბუღალტერიის თანამშრომელმა ასეთი განმარტება მოგვცა:
_ 2011 წლის დეკემბრის ბოლომდე სხვა ტექნიკოსი მუშაობდა აღნიშნულ ქუჩაზე, ის ზუსტად არ აღრიცხავდა მრიცხველს, ალბათ, მოხუცი ეცოდებოდა(?). როცა ის გაათავისუფლეს და ახალი თანამშრომელი დაინიშნა, ამ უკანასკნელმა სწორი აღრიცხვა ჩაატარა და გაირკვა, რომ სეფე კუპატაძეს ბლომად გაუხარჯავს ელექტროენერგიაო (?).
სეფე კუპატაძე დაჟინებით იმეორებს: _ ჩემს დღეში არავისთვის მითხოვია დანახარჯის დამალვა. პირიქით, იმავე დღეს გავრბოდი ბანკში, რომ რაიმე დავალიანება არ დამრჩენოდა. ხომ უნდა ეთქვა მაინც დალოცვილს, თუ ასე ზრუნავდა ჩემზე? ამისთანა დახმარებაზე მადლობას არა, მაგრამ თავაზიან უარს მაინც ვეტყოდი.
სეფე კუპატაძე დღეის მდგომარეობით იმდენად დაუძლურებულია, უმწეოთა სასადილოშიც ვეღარ მიდის, რათა საკუთარი ულუფა მიიღოს. ქვედა კიდურები დაუსივდა, რის გამოც ყავარჯნით გადაადგილებაც უჭირს. მართალია, მას ოზურგეთის მუნიციპალიტეტის გამგეობამ გასულ წელს დახმარება გაუწია საშეშე მერქნით და შინ მიტანაშიც დაეხმარა, მაგრამ კუპატაძის მდგომარეობა მაინც გამოუვალია. მოხუცი ამბობს, რომ ელექტროქურის გარეშე მას არსებობა არ შეუძლია. მისივე თქმით, შეამოწმეს კიდეც, თუ რამდენს გახარჯავდა მისი ქურა 24 საათის განმავლობაში. ასეთი რაოდენობით მოხმარება წარმოუდგენელიაო, უთხრეს თურმე.
_ რასაც ვხარჯავ და ვხარჯავდი, მე იმის გადახდა შემიძლია და შემეძლო. ამ სიბერეში უნამუსობის კადრებასაც მაბრალებენ. ამას სიკვდილი სჯობს! ვის ახსოვს, რომ ერთი თეთრი სადმე ზედმეტად მიმეთვისებინოს? _ კითხვას სვამს გაუგებრობაში მოხვედრილი სეფე კუპატაძე.
თავად “ენერგო პრო ჯორჯია” კი კატეგორიულად ითხოვს კუპატაძისგან დავალიანების გადახდას, რაც მოხუცის ბიუჯეტს აშკარად აღემატება. დავა სეფე კუპატაძესა და “ენერგო-პრო ჯორჯიას” შორის, ალბათ, სასამართლომდე მივა.
